Lembrieko 24 - The Holy Bible In Alur (Lur) Revised Orthography

¹ Kumira kud unegi kum dhanu ma rac; Kadi kud iyeny ibed karacelo kugi:

² Kum adundegi paru masendi, Man dendhoggi weco lembe ma rac

³ Ot gombre ni kum rieko; Man ecungo ni kum ng’eyothelembe;

⁴ Man kusikane pong’ ni kum ng’eyong’ec Ku jukupiny ma pire tek ma mit de.

⁵ Ng’atu ma riek e tek; Eyo, ng’atu ma won ng’eyong’ec nyayu tego.

⁶ Kum ibitimo lwiny peri ni kum lembapora mi rieko; Man lembe bedo ber ni kum udul juporlembe.

⁷ Rieko ni malu hai ni jakasegu: Eyabu dhoge ngo i dhugang’.

⁸ Ng’atu ma pido ya etim rac, Dhanu bilwong’e jatimrac.

⁹ Pidoic mi lemkasegu en e dubo: Man jacac en e ginmajudagu ni dhanu.

¹⁰ Tek ivoc i nindo mi ruvwa, Nwang’u tego peri nok.

¹¹ Bodh ju ma juterogi mi tho, Man ju m’ubedo mi nek cergi.

¹² Tek iwacu kumae, Nen, wang’eyo maeni ngo; Ng’atu m’uporo adunde ng’eyo maeni ngo? Man ng’atu m’ugwoko ng’eyong ec peri, ng’eyo maeni ngo? Man ebiculo ni dhanu kubang’gi kubang’gi ngo ng’atuman calku tic pare?

¹³ Woda, cam kic, kum e mit; Man mio kic ma i pedene, m’e mit i dhogi:

¹⁴ Kum kumeno ibing’eyo nia rieko bedo mi ng’eyong’ec peri; Tek inwang’e, sukulia bibedo nuti, Man genogen peri bikabre woko ngo.

¹⁵ Kud ikan adhi, E ng’atu ma jadubo, kum kabedo pa ng’atu ma pwe; Kud inyoth ka mi yom pare:

¹⁶ Kum ng’atu ma pwe podho wang’ abiro, man eai kendo; Ento jung’ielo judubo ku ruvwa.

¹⁷ Anyong’a kud unegi kinde ma jadegini podho, Man kud iyi anyong’a neg adundeni kinde ma jung’iele;

¹⁸ Yehova maru neno maeni, man emaru ton i ie, u Man emaru loko kwinyo pare woko kud i bang’e.

¹⁹ Cwinyi kud uring kum jutim rac; Kadok kumira de kud unegi kum judubo:

²⁰ Kum sukulia moko bibedo umbe ni ng’atu ma rac; Thala pa jadubo bitho.

²¹ Woda, lwor Yehova kud ubimo; Man kud ibed karacelo ku ju ma lokri:

²² Kum ruvwa migi biwok vur; Man nyoth kud i bang’gi gin ario, ng’a m’ung’eye?

²³ Maeni bende en e wec mi jurieko. Bedo tung’ tung’ i wang’jo i pokolembe e ber ungo.

²⁴ Ng’atu m’uwacu ni jadubo kumae, in i pwe, Kodhidhanu bilame, thek de bidage;

²⁵ Ento mutoro bibedo ni ju m’ujuke, Man mugisa ma ber biwok i wigi.

²⁶ Ng’atu ma mio lembaloka m’atira Ecwio dendhok.

²⁷ Yik tic peri yo woko, Man iketh ebed ayika iri i podho; Man yo ku ng’eye igom ot peri.

²⁸ Kud ibed jamulembe kum wedu ma lembe mbe; Man kud ibomb abombi ku dendhogi.

²⁹ Kud iwac kumae, Abitimo i kume calu etimo i kuma; Abiculo ni dhanu calku tic pare.

³⁰ Akadhu ku ng’et podho pa janyap, Man i ng’et podho mir ulok pa ng’atu ma ng’eyothelembe mbe kude;

³¹ Man, nen, ukudho twi uume ceke, Man ayilayila umo wang’e, Man gang’ mi kidine tur.

³² Alund aneno, man ia pido cu; Aneno, man ajolo ponji:

³³ Fodi nindo ma nok, rip rip ma nok, Dolocing’ ma nok kara unindi;

³⁴ Kum kumeno canpiny peri bibino calu won ayeki, Man canpiny peri calu ng’atu ma won jamtho.