Lembrieko 21 - The Holy Bible In Alur (Lur) Revised Orthography

¹ Adunde ubimo ni i cing Yehova calu ora mi pi: Eloke ka ma tek eyenyo.

² Ku ba yo ceke mi dhanu en e atira i wang’e gire; Ento Yehova poro adunde.

³ Timo bedopwe ku pokolembe Eyire ni Yehova ma sagu lam.

⁴ Wang’ ma tingre, man adunde mi kuhaya, En e thala mi judubo, en e dubo.

⁵ Pidoic mi ju ma kud amora ni yo kum udul piny kende; Ento ku ba dhanu ceke ma ting’o lembe vur vur etundo kum canpiny kende.

⁶ Gamu piny m’akana ma ku leb mi ndra En e calu afuru ma ju m’uyenyo ka tho leko kun ku kun.

⁷ Rop mi judubo biyweyogi woko, Kum gikwero timo lembapoka.

⁸ Yo pa ng’atu m’unur ku dubo gondre apila, Ento pi ng’atu ma leng’, tic pare atira.

⁹ Bedo i gui ma malu wi ot e ber, Sagu bedo i ot ma lac karacelo ku dhaku ma jadhau.

¹⁰ Ng’eyong’ec pa ng’atu ma rac yenyo gin ma rac: Jadhugola pare nwang’u bero ngo i wang’e.

¹¹ Kinde ma jusendo jacac, judwoko ju ma cobo riek; Man tek juponjo ng’atu ma riek enwang’u ng’eyong’ec.

¹² Ng’atu ma pwe pido pi ot pa jadubo, Maram juredho ko judubo ni nyoth migi.

¹³ Ng’atu ma tek culo ithe kum ywak pa jacan, En bende ebiywak, ento jubiwinje ngo.

¹⁴ Giramia ma lwe kwio wi ng’ecwiny; Man giramia ma i kor, kwio wi kwinyo ma tek.

¹⁵ Timo pokolembe en e mutoro ni ng’atu ma pwe; Ento en e nyoth ni jutim kier.

¹⁶ Ng’atu m’ukier kud i yo mi ng’eyothelembe Biyom i cokri mi ju m’utho.

¹⁷ Ng’atu m’umaru anyong’a bibedo jacan: Ng’atu m’umaru pigulok ku mo bilony ungo.

¹⁸ Judubo en e jambwar ni weg bedopwe; Man won aroi bino ka ng’atu m’atira.

¹⁹ Bedo i ng’om ngele e ber, Sagu bedo karacelo ku dhaku ma jadhau ku thungo.

²⁰ Piny m’akana ma pire tek ku mo nutii kabedo pa ng’atu ma riek; Ento ng’atu ma kite mbe mwonye ceke.

²¹ Ng’atu ma lubo bedopwe bibedo ber Enwang’u kwo, ku bedopwe, man yung.

²² Ng’atu ma riek idho i adhura mi ju ma tek, Man eredho tego mi genogenne piny

²³ Ng’atu ma tek gwoko dhoge ku lebe Nwang’u egwoko ng’eyong’ec pare ni can dupa.

²⁴ Ng’atu ma jakuhaya man ma foire gire, nyinge bedo jacac; Etimo ku tingri mi kuhaya.

²⁵ Ava gin ma janyap uyenyo nege; Kum cinge kwero timo tic.

²⁶ Gin moko nuti ma ketho cwiny hai kum piny ceng’ duu; Ento ng’atu ma pwe mio man etwono ngo

²⁷ Lam mi judubo en e ginmajudagu; Ma sagu dit, kan ekele ku pidoic mi dubo!

²⁸ Jamulembe mi ndra birwinyo; Ento ng’atu m’uwinjo biyero ma kajikne mbe.

²⁹ Ng’atu ma jadubo dwoko wang’e tek; Ento ng’atu m’atira, ketho yo pare cungo.

³⁰ Rieko moko mbe kadi ng’eyothelembe Kadi lembapora kum Yehova.

³¹ Ri uni bedo ayika mi ceng ali; Ento aloci en e pa Yehova.