Lembrieko 19 - The Holy Bible In Alur (Lur) Revised Orthography

¹ Jacan ma wotho i bedocu pare e ber Sagu ng’atu ma kit lembe mi dendhoge mbe man en e jakasegu.

² Man, yeny ma ng’eyong’ec umbe kude ber ungo; Man ng’atu ma timo pio ku tiende dubo.

³ Kasegu mi dhanu nyotho yo pare; Man adundene jai ni Yehova.

⁴ Jukupiny medo jurimo dupa; Ento kind jacan pokre ku jarimbe.

⁵ Jamulembe mi ndra bibedo umbe send ungo; Man ng’atu ma cwayu ndra biboth ungo.

⁶ Dhanu dupa biyenyo bero ba ng’atu ma cinge lac; Man ku ba dhanu ceke ng’atuman en e jarimb jami giramia.

⁷ Umego ceke pa jacan gidage: Jurimbe gicidho bor kude ma sagu mire ma! Elubogi ku lembe ento gimbe.

⁸ Ng’atu m’unwang’u rieko nwang’u emaru ng’eyong’ec pare gire: Ng’atu m’ugwoko ng’eyothelembe binwang’u lem ma ber.

⁹ Jamulembe mi ndra bibedo umbe send ungo; Man ng’atu ma yero lemndra binyothre.

¹⁰ Bedo kwo ma cwinyjo kwio ko maku jakasegu ngo; Man ke bimo wi wot ker umaku jatic ki ngo.

¹¹ Riu mi dhanu kwio wi ng’ecwiny pare; Man en e dwong’ pare ya ewek kier.

¹² Kwinyo p’ubimo calu rundo mir umvor; Ento bero pare en e calu thoi wi lum.

¹³ Wodo ma jakasegu en e ruvwa ni won; Man piem pa dhaku en e calu giraoda ma thiri thiri.

¹⁴ Ot ku lonyo en e aba ma ai ba wego; Ento dhaku ma won pidoic ai ba Yehova.

¹⁵ Nyap kelo nindo ma pek; Man kec binego ng’eyong’ec mi nyap.

¹⁶ Ng’atu ma woro lembang’ola gwoko ng’eyong’ec pare; Ento ng’atu ma paru pi yo pare ngo bitho.

¹⁷ Ng’atu ma ngisi nege kum jacan mio banja ni Yehova, Man ebidwoko wang’ tic ma ber pare ire kendo.

¹⁸ Ponj wodi, ma fodi genogen nuti; Man kud iketh adundeni kum nyoth pare.

¹⁹ Ng’atu ma kwinyo pare dit bisendre kum lembene; Kum tek ibodhe ibitime kendo be.

²⁰ Winj lembapora, man ijol ponji, Kara ibed riek i kajik peri.

²¹ Lembapora dupa ni i adunde dhanu; Ento lembapora pa Yehova, e ma bicungo.

²² Can dhanu negojo ni bedober pare; Man jacan e ber ma sagu jandra.

²³ Lworo Yehova kelo kwo; Man ng’atu m’ubedo kudo cwinye bikwio; Lem ma rac biwok i kume ngo.

²⁴ Janyap panu cinge i tabu, Man kadok kele ba dhoge kendo de eyenyo ngo.

²⁵ Goi jacac, e ng’atu ma cobo biponjo ng’eyo pidoic; Man juk ng’atu ma won ng’eyothelembe, e ebing’eyo girang’eya.

²⁶ Ng’atu ma timo rop kum won, man ma riemo min, En e wodo ma kelo lewic ku cac.

²⁷ Woda kwer winjo ponji Tek en e kier kum lembe mi ng’eyong’ec kende.

²⁸ Jamulembe ma rac cayu pokolembe; Man dhu jadubo mwonyo kier.

²⁹ Juyiko lembapoka mi jucac, Man goc ni ng’ei jukusegu.