Lembrieko 18 - The Holy Bible In Alur (Lur) Revised Orthography

¹ Ng’atu ma koire gire nwang’u eyenyo gin ma cande nege gire, Man kwinyo nege kum rieko ceke ma cu.

² Anyong’a nego jakasegu ngo kum ng’eyothelembe, Ento kara adunde nyuthre kende.

³ Ka jadubo bino, e cac de bino, Man karacelo ku bedo umbe yung cac wok.

⁴ Lembe mi dhu dhanu calu pi ma thuth; Kulo mi rieko en e calu kulo ma mol.

⁵ Jolo wang’ ng’atu ma jadubo e ber ungo, Kadi eoro ng’atu ma pwe cen kum pokolembe.

⁶ Dendhu jakasegu nyayu piem, Man dhoge lwong’o goc.

⁷ Dhu jakasegu en e nyoth pare, Man dendhoge en e uwic mi ng’eyong’ec pare.

⁸ Lembe pa jayernying’ en e calu kwen ma mit, Man gicidho piny i ic.

⁹ Ng’atu ma janyap i tic pare bende, En e umin ng’atu ma janyoth.

¹⁰ Nying’ Yehova en e ot ma tek ma wiu; Won bedopwe ringo i ie, e ebedo museme.

¹¹ Piny pa jalonyo en e adhura pare ma tek, Man en e gang’kidi ma malu i pidoic pare gire.

¹² Adunde dhanu lar tingre ni nyoth; Man jwigri lar wok ni yung.

¹³ Ng’atu ma loko lembe ma fok’ewinjo ngo, En e lem ma kite mbe man lewic ire.

¹⁴ Cwiny dhanu bijenge i mulima pare; Ento cwiny m’utur ng’a ma copo cire?

¹⁵ Adunde won pidoic nwang’u ng’eyong’ec; Man ith jarieko yengo ng’eyong’ec.

¹⁶ Jamblembe mi dhanu nwang’u kaka ire, Man ekele i wang’ ju ma dongo.

¹⁷ Ng’atu ma lar cungo kum lembe pare enen pwe; Ento jadhugola pare bino man ekoro i lembe pare.

¹⁸ Gagi jigo piem, Man ekoyo kind ju ma tek.

¹⁹ Loko umego ma lembe ton i ie tek ma sagu rwombo adhura ma tek; Man wadi piem ma kumeni e calu utwindi mi ot ma tek.

²⁰ Jubiyeng’o dhanu ku nying’ lembe m’i dhoge; Ebiyeng’ ku nyai mi dendhoge.

²¹ Leb ubedo ku tego i tho ku kwo; Man ju m’umare bicamu nyinge.

²² Ng’atu ma tek unwang’u dhaku nwang’u enwang’u gin ma ber, Man egamu bero ba Yehova.

²³ Jucan timo ku pakudhok; Ento julonyo loko lembe ku kwinyo.

²⁴ Ng’atu ma maku jurimo dupa emaku ni nyoth ire; Ento jarimo nuti ma moko ki sagu umego.