Lembrieko 16 - The Holy Bible In Alur (Lur) Revised Orthography

Lembrieko pi Kura Bedo ku Kura Tim

¹ Lembapora mir adunde en e mi dhanu; Ento lembaloka mi leb ai ba Yehova.

² Yo ceke mi dhanu leng’ i wang’e gire; Ento Yehova poro tipo ku mukero.

³ Wek tic peri ba Yehova, E lembakeca peri bicungo.

⁴ Ku ba gin ceke Yehova timo pire gire; Eyo, cil judubo pi ceng’ ma rac.

⁵ Ku ba dhanu ceke ma kuhaya ni i adundene en e ginmajudagu ni Yehova: Kadok cing’ ribre ku cing’, ebibedo mbe send ungo.

⁶ Kier rucre ni kum kisa ku lemandha; Man dhanu ai i dubo ni kum lworo Yehova.

⁷ Tek yo pa ng’atu moko bedo ber ni Yehova, Eketho cil jukwoje gibedo kugi ku kwiocwiny.

⁸ Piny ma nyanok ku bedopwe, e ber Sagu kuloka ma dit ma ku kuvuga.

⁹ Adunde dhanu poro yo pare; Ento Yehova nyutho ka dakutielo pare.

¹⁰ Ng’eyolembe ni i dendhu ubimo; Dhoge bikier ungo i lembapoka.

¹¹ Mukero ma cu ku jampor en e pa Yehova; Lelo mir usau ceke tic pare.

¹² Timo dubo en e ginmajudagu ni ju m’ubimo; Kum komker ucungo ni kum bedopwe.

¹³ Dendhok ma pwe en e anyong’a mi ju m’ubimo; E gimaru ng’atu ma weco atira.

¹⁴ Kwinyo p’ubimo en e calu jukwenda mi tho; Ento jarieko bikwio wie.

¹⁵ Kwo ni i der mi wang’ ubimo; Man bero pare en e calu afuru mi dong’ koth.

¹⁶ Nwang’u rieko e ber ma sagu mola ma kwar mire ma! Eyo, nwang’u ng’eyothelembe jufoyo ma sagu mola ma tar.

¹⁷ Yo ma lac pa ng’atu m’atira en e ai i dubo: Ng’atu m’umoko kum yo pare egwoko ng’eyong’ec pare.

¹⁸ Kuhaya lar wok ni nyoth, Man cwiny mi tingri lar wok ni podho.

¹⁹ Bedo ku cwiny ma mol karacelo ku jucan e ber, Sagu poko ayeki ku jukuhaya.

²⁰ Ng’atu ma ng’io i lembe binwang’u gin ma ber; Man ng’atu ma tek geno Yehova, nwang’u en e jamutoro.

²¹ Ng’atu ma riek i adunde jubilwong’e won pidoic; Man mido mi dendhok emedo ponji.

²² Ng’eyothelembe en e pi m’atong’a mi kwo ni ng’atu m’ubedo ko; Ento juk mi jukusegu en e lem migi ma kite mbe.

²³ Adunde jarieko ponjo dhoge, Man emedo ponji kum dendhoge.

²⁴ Lembe ma mit e calu pedekic, Mit ni ng’eyong’ec, man leng’kum ni cogo.

²⁵ Yo nuti ma nen atira ni dhanu, Ento kajikne en e yo mi tho.

²⁶ Kec pa jatim tic timo tic ire; Kum dhoge cuke.

²⁷ Ng’atu ma kite mbe poro lem ma rac; Man mac ma wang’ ni i dendhoge.

²⁸ Ng’atu ma kite mbe rweyo pi piem; Man jagobdhanu poko kind jurimo ma cu.

²⁹ Ng’atu ma jarop bidho jadhugola pare, Man etelo wie i yo ma ber ungo.

³⁰ Ng’atu ma mio wang’e jwi jwi, en e mi porolembe ma rac: Ng’atu ma mio dhoge kpa eketho lembe ma rac timbre.

³¹ Wie ma ju lwar en e jamkermiwic mi dwong’; Tek junwang’e i yo mi bedopwe.

³² Ng’atu ma ng’ecwiny make pio ngo e ber ma sagu jarukara; Man ng’atu ma bimo cwinye, sagu ng’atu ma maku adhura.

³³ Jugoyo gagi wi bamb; Ento ng’olne ceke en e pa Yehova.