Lembrieko 15 - The Holy Bible In Alur (Lur) Revised Orthography

¹ Lokolembe ma yo kwio wi kwinyo; Ento lembe ma ton nyayu ng’ecwiny.

² Leb jurieko weco lembe mi ng’eyong’ec atira; Ento dhu jukusegu thwogo lem ma kite mbe.

³ Wang’ Yehova ni i kaka ceke, M’eneno ko lem ma rac ku lem ma ber.

⁴ Leb ma yo en e yen mi kwo; Ento lem ma kite mbe ma i leb en e tur mi cwiny.

⁵ Jakasegu cayu ponji pa won; Ento ng’atu ma ketho wang’e kum juk nwang’u rieko.

⁶ Piny m’akana dupa ni i ot mi ju ma pwe; Ento can ni i kuloka mi judubo.

⁷ Dendhu jurieko moyo ng’eyong’ec; Ento adunde ju ma kitgi mbe timo kumeno ngo.

⁸ Lam pa jadubo en e ginmajudagu ni Yehova; Ento rwo pa ng’atu m’atira nyayu mutoro i ie.

⁹ Yo pa jadubo en e ginmajudagu ni Yehova; Ento emaru ng’atu m’ulubo bedopwe.

¹⁰ Ponji ma tek nuti ni ng’atu m’uweko yo; Man ng’atu m’udagu juk bitho.

¹¹ Liel ku Nyoth ni i wang’ Yehova; E kan adunde mi nyithindho mi dhanu ke bibedo i wang’e kani!

¹² Jacac yenyo ngo jujuke; Ebicidho ba jurieko ngo.

¹³ Adunde mi mutoro nyayu mutoro i wang’; Ento cwiny tur ni kum can mir adunde.

¹⁴ Adunde ng’atu ma won ng’eyothelembe yenyo ng’eyong’ec; Ento dhu jukusegu camu lembe ma kite mbe.

¹⁵ Nindo ceke mi ju ma jusendogi rac; Ento ng’atu ma mutoro nego adundene bedo kud agba thiri thiri.

¹⁶ Piny ma nok, karacelo ku lworo Yehova, e ber, Sagu piny m’akana ma dit karacelo ku can.

¹⁷ Cemo mi dek ma col, ka ma mer ni i ie, e ber Sagu ring’ dhiang’ ma mio karacelo kud adegi.

¹⁸ Ng’atu ma kwiny nyayu piem; Ento ng’atu ma ng’ecwiny make pio ngo kwio wi piem.

¹⁹ Yo pa janyap en e calu arara mir ukudho; Ento yo pa ng’atu m’atira judwoke ni gengi.

²⁰ Wodo ma riek nyayu mutoro i won; Ento ng’atu ma kite mbe cayu min.

²¹ Lem ma kite mbe en e mutoro ni ng’atu ma rieko mbe kude; Ento ng’atu ma won ng’eyothelembe dwoko yo pare atira.

²² Ka ma lembapora mbe i ie, lembakeca nyothre; Ento gicungo ni kum udul juporlembe.

²³ Anyong’a nego dhanu ni kum lokolembe mi dhoge; Man lembe i nindo ma kakare, e ber mire ma!

²⁴ Yo mi kwo idho ni jarieko, Kara eai ku ba liel ma piny.

²⁵ Yehova bimugo ot pa jakuhaya; Ento ebiketho kieu pa dhaku ma cware tho cungo.

²⁶ Lembapora ma rac en e ginmajudagu ni Yehova; Ento lembe mi mer en e lembe ma leng’.

²⁷ Ng’atu ma ketho cwinye kum kuloka, sendo ot pare gire; Ento ng’atu m’udagu jamblembe bibedo kwo.

²⁸ Adunde ng’atu ma pwe pido pi lembaloka; Ento dhu ng’atu ma rac thwogo lembe ma rac.

²⁹ Yehova ni bor ku judubo; Ento ewinjo rwo pa ng’atu ma pwe.

³⁰ Der mi wang’ nyayu anyong’a i adunde Man rwonglembe ma ber dwoko cogo mio.

³¹ Ith ma winjo juk mi kwo Bibedo kind jurieko.

³² Ng’atu ma kwero ponji cayu ng’eyong’ec pare gire; Ento ng’atu ma winjo juk nwang’u ng’eyothelembe.

³³ Lworo Yehova en e ponji mi rieko; Man cwiny ma mol lar telo yo ni yung.