Lembrieko 13 - The Holy Bible In Alur (Lur) Revised Orthography

¹ Nyathin ma nico ma riek winjo ponji pa won; Ento jacac winjo juk ungo.

² Dhanu bicamu gin ma ber ni kum nying’ mi dhoge; Ento ng’eyong’ec mi weg abombi bicamu rop.

³ Ng’atu ma kuro dhoge gwoko kwo pare; Ento ng’atu m’uyabu dendhoge lac ebinwang’u nyoth.

⁴ Ng’eyong’ec pa janyap yenyo, man ebedo ku gin moko ngo; Ento ng’eyong’ec pa won amora bicwe.

⁵ Ng’atu ma pwe dagu yero ndra; Ento jadubo cidre, man etundo kum lewic.

⁶ Bedopwe gwoko ng’atu m’atira i yo; Ento dubo ng’ielo jadubo.

⁷ Gin moko nuti ma lonjre gire, ento ebedo ku gin moko ngo: Gin moko nuti ma dwokre gire jacan, ento ebedo ku piny ma dit.

⁸ Jambwar mi kwo mi dhanu en e piny pare; Ento jacan winjo cim moko ngo.

⁹ Anyong’a nego der pa ng’atu ma pwe; Ento thala pa jadubo jubinego.

¹⁰ Kuhaya kelo kar kar kende; Ento rieko ni karacelo ku ju m’ubedo ku lembapora ma cu.

¹¹ Piny ma junwang’u ku gin ma kite mbe jwik, Ento ng’atu m’ucoko ku tic mi muli pare binyai.

¹² Genogen ma galu remo adunde; Ento kinde ma gin ma cande nuti wok, en e yen mi kwo.

¹³ Ng’atu ma cayu lembe ekelo nyoth ire gire; Ento jubimio sukulia ni ng’atu ma lworo lembang’ola.

¹⁴ Cik pa ng’atu ma riek en e kulo mi kwo, Kara ng’atu moko ai kud i uwic mi tho.

¹⁵ Ng’eyothelembe ma ber mio bero; Ento yo pa jakier tek.

¹⁶ Ku ba dhanu ceke ma riek etimo ku ng’eyong’ec; Ento jakasegu moyo lem pare ma kite mbe.

¹⁷ Jakwenda ma jadubo podho i lem ma rac; Ento jadhulembe mi bedo mandha en e leng’kum.

¹⁸ Canpiny ku lewic bibedo ni ng’atu ma kwero ponji; Ento jubiyungo ng’atu ma winjo juk.

¹⁹ Tek junwang’u gin ma cande nuti en e mido ni ng’eyong’ec; Ento ai i dubo en e ginmajudagu ni jukusegu.

²⁰ Woth ku jurieko, e ibibedo riek; Ento wadi jukusegu bitur.

²¹ Lem ma rac lubo tok judubo; Ento jubimio gin ma ber ni ju ma pwe.

²² Ng’atu ma ber weko aba ni nyithindho mi nyithindhe; Man piny pa jadubo kandre ni ju ma pwe.

²³ Cemo ma dit ni i ng’om m’afura pa jacan; Ento gin moko nuti ma nyothre kum lembapoka ma pwe ngo.

²⁴ Ng’atu ma cero ukede nwang’u edagu wode; Ento ng’atu m’umare ponje nindo moko.

²⁵ Ng’atu ma pwe camu ma romo ng’eyong’ec pare; Ento i jadubo yeng’ ungo.