Lembanyutha 7 - The Holy Bible In Alur (Lur) Revised Orthography

Dhanu rubanga 144 mi Israel, Juketho Ayi i Kumgi

¹ Yo ng’ei maeni aneno malaika ang’wen m’ucungo i gund ng’om ang’wen, ma gitwio yamu ang’wen mi ng’om, kara yamu moko kud ukot wi ng’om, kadi wi nam, kadi wi yath moko.

² Man aneno malaika mange idho ku yo ku ma ceng’ wok i ie, m’ebedo kud ayi Mungu ma kwo: man ekok ku dwal ma dit ni malaika ang’wen ma jumio igi ya gitim ng’om ku nam de rac,

³ ewacu kumae, Kud wutim ng’om rac, kadok nam, kadi yedhi, ma fodi wakuketho ayi temyim jumiru pa Mungu mwa.

⁴ Man awinjo wel ju ma juketho ayi i kumgine, rubanga dak acel ku pier ang’wen wi ang’wen, ma juketho ayi i kumgi kud i suru mi nyithi Israel kubang’gi nzu:

⁵ Mi suru pa Yuda juketho ayi kum dhanu rubanga apar wi ario; Mi suru pa Ruben rubanga apar wi ario; Mi sura pa Gad rubanga apar wi ario;

⁶ Mi suru pa Acer rubanga apar wi ario; Mi suru pa Naftali rubanga apar wi ario: Mi suru pa Manase rubanga apar wi ario;

⁷ Mi suru pa Simeon rubanga apar wi ario; Mi suru pa Lawi rubanga apar wi ario; Mi suru pa Isakar rubanga apar wi ario;

⁸ Mi suru pa Zabulon rubanga apar wi ario; Mi suru pa Yusuf rubanga apar wi ario; Mi suru pa Benyamin juketho ayi kum dhanu rubanga apar wi ario.

Udul Dhanu kud i Thek Ceke

⁹ Yo ng’ei gin maeni aneno, man nen, udul dhanu ma dit, ma ng’atu moko mbe ma copo kwanu, m’uai kud i thek ceke kubang’gi nzu man kud i suru ceke man kodhidhanu ku dhok, gicungo wang’ komker man i wang’ Nyathi Rombo, ma gironyo kendi ma tar ma lot, ku ndhendhe i cing’gi;

¹⁰ man gikok ku dwandgi ma dit, giwacu kumae, Both ubed ni Mungu mwa m’ujany wi komker, man ni Nyathi Rombo.

¹¹ Man malaika ceke gicungo gitieko komker gbur, ku judongo man yedi ma kwo ang’wen man gipodho arieba wang’gi nyim komker, man girwo ni Mungu,

¹² giwacu kumae, Amen: Mugisa, ku dwong’, ku rieko, man foyofoc, ku yung, man tego, ku tek, ubed ni Mungu mwa rondo ku rondo. Amen.

¹³ Man ng’atu acel ma kind judongo loko lembe, ewacu ira kumae, Maeni ma gironyo kendi ma tar ma lot e, gi ng’agi, man giai kani?

¹⁴ Man awacu ire kumae, Rwoth para, ing’eyo. Man ewacu ira kumae, Maeni gi ju m’uai i masendi ma dit, man gilwoko kendi migi, gidwokogi tar de i rimo pa Nyathi Rombo.

¹⁵ Ka kumeno gini i wang’ komker pa Mungu; man gitimo ire dieceng’ ku diewor i hekalu pare: man ng’atu m’ujany wi komker biguro hema pare i wigi.

¹⁶ Kec binegogi kendo ngo, kadok rieupi de kendo ngo; kadok ceng’ de bigoyogi kendo ngo, kadi lietho moko:

¹⁷ kum Nyathi Rombo ma ni i kind komker ebibedo jakwac migi, man ebitelo wigi ba pi mi kwo ma dhenyni: man Mungu biyweyo piwang’ pet kud i wang’gi.