Jupoklembe 9 - The Holy Bible In Alur (Lur) Revised Orthography

Bimobim pa Abimelek

¹ Man Abimelek ma wod Yerubal ucidho i Cekem ba utumin min, man giweco kugi, man ku juot ceke pa won min, ewacu kumae,

² Akwayuwu, wuyer i ith dhanu ceke m’i Cekem kumae, ma kani ma ber iwu, tek wot Yerubal ceke, ma gi dhanu pier abiro, gibim wiwu, kadi y a ng’atu acel ubim wiwu eni? wupoi bende nia an a cogo mu ku ring’kumwu.

³ Man utumin min giyero lembe maeni ceke pire i ith dhanu ceke m’i Cekem: man adundegi yenyo gilub Abimelek; kum giwacu kumae, En e umegwa.

⁴ Man gimio ire sente mi mola ma tar pier abiro m’uai i ot pa Bal-berith, man ku maeni Abimelek unwang’u ko ire dhanu ma kitgi mbe ma fok fok, m’ulube.

⁵ Man ecidho ba ot pa won i Ofra, man enego utumin ma wot Yerubal, ma gi dhanu pier abiro, wi kidi acel: ento Yotham ma wod Yerubal ma cogo dong’; kum epondo.

⁶ Man dhanu ceke m’i Cekem gicokri gigi karacelo, ku ot ceke pa Milo, man gicidho giketho Abimelek ni ubimo, ba bongu ma ceng’ni otkur ma ni i Cekem.

⁷ Man ka giyero maeni ni Yotham, ecidho ecungo wi got Gerizim, man eting’o dwande malu, elwong’o de, ewacu igi kumae, Wuwinja, wu dhanu m’i Cekem, kara Mungu winjwu.

⁸ I nindo moko yedhi wok nikonjo mo wi ng’atu moko bed ni ubimo i wigi: man giwacu ni yendulam, Bim wiwa.

⁹ Ento yendulam uwacu igi kumae, Maku awek mio para, ma Mungu ku dhanu de giyunga i kume, man acidh kara awira kun ku kun wi yedhi?

¹⁰ Man yedhi giwacu ni yendubolo kumae, Bin, ibim wiwa.

¹¹ Ento yendubolo wacu igi kumae, Maku awek mido para, man nyinga ma ber, man acidh awira kun ku kun wi yedhi?

¹² Man yedhi wacu ni ulok kumae, Bin, ibim wiwa.

¹³ Man ulok uwacu igi kumae, Maku awek pigulok para ma nyasa, ma nyayu mutoro i Mungu ku dhanu, man acidh awira kun ku kun wi yedhi?

¹⁴ E yedhi ceke gilund giwacu ni ukudho kumae, Bin, ibim wiwa.

¹⁵ Man ukudho wacu ni yedhi kumae, Tek wukonjo mo i wia andha abim wiwu, e wubin wupond i tipona; man tek kumeno ngo, dong’ mac uai ku i ukudho, man ewang’ musonge m’i Lebanon.

¹⁶ Ka kumeno kawono, tek wutimo andha atira de, ma wuketho ko Abimelek ni ubimo, man tek wutimo ber ba Yerubal ku ot pare, man wutimo i bang’e calu m’uromo ku cinge,

¹⁷ (kum vwa kiedo piwu, man ekuno kwo pare, ebodhowu de kud i cing’ Midian:

¹⁸ man wujai kum ot pa vwa tinuni, man wunego wote, dhanu pier abiro, wi kidi acel, man wuketho Abimelek ma wod bong’ pare, ni ubimo wi dhanu m’i Cekem, kum en e umegwu);

¹⁹ tek wutimo andha man atira ba Yerubal man ba ot pare tinuni, e dong’ anyong’a negwu kum Abimelek, en de anyong’a nege i kumwu:

²⁰ ento tek kumeno ngo, dong’ mac uai ku i Abimelek, man ewang’ dhanu m’i Cekem ku ot pa Milo; man mac uai ku ba dhanu m’i Cekem, man ku ba ot pa Milo, man ewang’ Abimelek.

²¹ E Yotham uringone woko, man epiei, man ecidho Ber, man ebedo keca, ni lworo pa Abimelek m’umin mire.

²² Man Abimelek ubedo ni jaditmawijo wi Israel rundi adek.

²³ E Mungu oro tipo ma rac i kind Abimelek ku dhanu m’i Cekem; man dhanu m’i Cekem gitimo kud abombi bang’ Abimelek:

²⁴ kara rop m’utimbre kum wot Yerubal pier abiro bin, man kara rimbgi kethre wi Abimelek m’umeggi, m’unegogi, man wi dhanu m’i Cekem, m’udwoko cinge tek kara eneg utumin mire.

²⁵ Man dhanu m’i Cekem gikanu adhi ire wi gudi, man giyaku piny mi dhanu ceke m’ukadhu kud i yo maeno ma ceng’ni kugi: man juyero maeno ni Abimelek.

²⁶ Man Gai ma wod Ebed ubino ku utumin mire, man ekadhu i Cekem; man dhanu m’i Cekem giketho gen migi i kume.

²⁷ E gicidho woko i podho, man gicoko nyingulok migi, man gibio nyingulokne, e giketho ceng’ ma dit, man gimondo i ot pa mungu migi, e gicamu gimadhu de, man gilamu Abimelek.

²⁸ Man Gai ma wod Ebed uwacu kumae, Abimelek en e ng’a, man Cekem en e ng’a, ma nia watim ire e? en e wod Yerubal ungo? man Zebul en e jego pare ngo? wun wu dhanu pa Hamor ma wod Cekem wutim ire: ento wan watimo ire mir ang’o?

²⁹ Man dok dhanu maeni gibedo the cinga! kuno di akabu Abimelek woko. Man ewacu ni Abimelek kumae, Med njuru asikari peri, man iwok woko.

³⁰ Man ka Zebul ma jabim mir adhura winjo lembe pa Gai ma wod Ebed, ng’ecwiny pare opo.

³¹ Man eoro jukwenda bang’ Abimelek ling’, ewacu kumae, Nen, Gai ma wod Ebed ku utumin mire gibino Cekem; man, nen, gicung’o lembe i adhura kara ejai iri.

³² Nie ka kumeno, ai ku diewor, in ku dhanu m’i kumi, man ikan adhi i thim:

³³ man ebitimbre, nia kugweno, ka ceng’ upiei, ibiai pir, man ibikonjri wi adhura; man, nen, ka en ku dhanu ma gini karacelo kude giwok nikiedo kudi, e icopo timo i kumgi calu kare nen iri.

³⁴ Man Abimelek uai, ku dhanu ceke ma gini karacelo kude, ku diewor, man gikanu adhi ni Cekem kud ungu dhanu ang’wen.

³⁵ Man Gai ma wod Ebed uwok woko, man ecungo i kawok mi dhugang’ mir adhurane: man Abimelek uai malu, ku dhanu ma gini karacelo kude, ku ka ma gikanu ie adhi.

³⁶ Man ka Gai uneno dhanu, ewacu ni Zebul kumae, Nen dhanu beloro ku wi gudi. Man Zebul uwacu ire kumae, Ineno tipo gudi calu nia gi dhanu.

³⁷ Man Gai uyero kendo ewacu kumae, Nen, dhanu loro ku kind ng’om, man ungu dhanu acel ubino kud i yo mi bongu mi Meonenim.

³⁸ Zebul ulund uwacu ire kumae, Kawono dhogi ni kani, m’iweco ko kumae, Abimelek en e ng’a, ma maku watim ire? maeni gi dhanu m’icayugi ngo? akwei, kawono cidh woko man ikied kugi.

³⁹ Man Gai uwok woko wang’ dhanu m’i Cekem, man ekiedo kud Abimelek.

⁴⁰ Man Abimelek urieme, e eringo i wang’e, man dhanu dupa podho ma jutong’o lero i kumgi, cil kum kamondo mi dhugang’.

⁴¹ Man Abimelek ubedo i Aruma: man Zebul uriemo Gai ku utumin mire, kara ku gibed i Cekem.

⁴² Man etimbre urwone, nia dhanu cidho i thim; man giyero ni Abimelek.

⁴³ Man egamu dhanune, man epokogi ni ungu dhanu adek, e ekanu adhi i thim; man eneno, man, nen, dhanu wok woko kud i adhura; man eai i kumgi, e egoyogi.

⁴⁴ Man Abimelek, kud ungu dhanu ma gini karacelo kude, gikonjri i wang’gi, man gicungo i kamondo mi dhugang’ mir adhurane: man ungu dhanu ario gikonjri wi dhanu ceke ma gini i thim, e gigoyogi.

⁴⁵ Man Abimelek ukiedo kum adhurane ceng’ maeca duu; e emaku adhurane, man enego dhanu ma ni i ie: man emoro adhurane, ecoyo ie kadu de.

⁴⁶ Man ka dhanu ceke mi otkur m’i Cekem giwinjo pire, gimondo i ot ma tek mi ot pa Elberith.

⁴⁷ Man juyero maeni ni Abimelek nia dhanu ceke mi otkur m’i Cekem ucokri karacelo.

⁴⁸ Man Abimelek uidho malu wi got Zalmon, en ku dhanu ceke ma gini karacelo kude, man Abimelek uting’o lei i cinge, man etong’o jangyen ku kum yedhi man eting’e malu, ekethe de wi goke: man ewacu ni dhanu ma gini karacelo kude kumae, Gin ma wuneno atimo, wutim pio, man wutim calu atimo.

⁴⁹ E dhanu ceke kubang’gi kubang’gi ng’atuman utong’o jangyen pare kumeca, e gilubo Abimelek, man gikethogi kum ka ma tek, man gidhuro mac kum ot ma tek i wigi; kum kumeno dhanu ceke mi otkur m’i Cekem githo bende, ma yenyo romo dhanu ma co rubanga acel ku mon de.

⁵⁰ Abimelek ulund ucidho Thebez, man egonjo kum Thebez, e emake.

⁵¹ Ento otkur ma tek ni i adhurane, e dhanu ma co ceke ku mon de giringo kuca, ku dhanu ceke mir adhurane, man giciko bang’gi gigi, e giidho malu wi otkurne.

⁵² Man Abimelek uwok kum otkurne, man ekiedo i kume, man ecoro ceng’ni dhugola mi otkurne kara ewang’e ku mac.

⁵³ Man dhaku moko bolo kidi rego ma malu i wi Abimelek, man eng’enyo upoko wie.

⁵⁴ Elund elwong’o jalawobi ma jayei jamtho pare pio, man ewacu ire kumae, Wodh palamularu peri, man inega, kara dhanu kud uwac pira kumae, Dhaku nege. Man jalawobi pare dhuye plu, e etho.

⁵⁵ E ka dhanu mir Israel gineno nia Abimelek utho, giai kubang’gi kubang’gi ng’atuman ucidho i kakare man i kakare.

⁵⁶ E Mungu culo dubo pa Abimelek kumeno, m’etimo ba won, m’enego ko utumin pier abiro;

⁵⁷ E dubo ceke mi dhanu m’i Cekem Mungu culo i wigi: man kwong’ pa Yotham ma wod Yerubal upodho i wigi.