Jupoklembe 6 - The Holy Bible In Alur (Lur) Revised Orthography

Lwong’o pa Gideon

¹ Man nyithindho mir Israel utimo gin ma rac i wang’ Yehova: man Yehova kethogi i cing’ Midian rundi abiro.

² Man cing’ Midian usagu kum Israel; man kum Midian nyithindho mir Israel gitimo vur igi gigi ma ni i gudi, man odng’om, ku ka ma tek.

³ Man ebedo kumeno, kinde ma Israel ucoyo cam, nia Jumidiani giidho malu, ku Juamaleki, ma nyithindho ma yo nyangu; giidho malu i kumgi;

⁴ man gigonjo i kumgi, man ginyotho nyai m’i ng’om, cil m’itundo ko Gaza, man giweko giracama moko ngo i Israel, kadok rombe, kadi koni dhiang’, kadi kana.

⁵ Kum giidho malu ku lim migi man hema migi; gimondo calu bonyo ni udulgi; gin ku ngamia migi gibedo umbe wel: e gimondo i ng’om kara ginyothe.

⁶ E Israel jujwige dit kum Midian; man nyithindho mir Israel gilwong’o Yehova.

⁷ Man etimbre, ka nyithindho mir Israel gilwong’o Yehova kum Midian,

⁸ nia Yehova oro jabila ba nyithindho mir Israel: man ewacu igi kumae, Yehova Mungu mir Israel uwacu kumae, Akelowu malu ku i Misiri, man awodhowu woko kud i ot mi ng’eca;

⁹ man agonyowu kud i cing’ Jumisiri, man kud i cing’ dhanu ceke m’usendowu, man ariemogi woko i weng’wu, man amio ng’om migi iwu;

¹⁰ e awacu iwu kumae, An a Yehova Mungu mu; wubilworo mungu mi Juamori ngo, ma wubedo i ng’om migi. Ento wuwinjo dwanda ngo.

¹¹ Man malaika pa Yehova bino, man ebedo the bongu ma ni i Ofra, ma en e piny pa Yoac pa Jaabiezri: man wode ma Gideon ubeyoko nganu i pany mi pigulok, kara ekane ni Jumidiani.

¹² Man malaika pa Yehova wok i bang’e, man ewacu ire kumae, Yehova ni kudi, in i ng’atu ma tek ma jarukara.

¹³ Man Gideon uwacu ire kumae, Ei, rwoth para, tek Yehova ni kudwa, nedi gin maeni ceke wok i kumwa? man tic pare ceke ma wang’u ijo ma kwaruwa yero iwa pire ni kani, ma giwacu kumae, Yehova kelowa malu kud i Misiri ngo? ento kawono Yehova bayuwa woko, man ekethowa i cing’ Midian.

¹⁴ E Yehova neno i bang’e, man ewacu kumae, Cidh i tego peri maeni, man ibodh Israel kud i cing’ Midian: aori ngo?

¹⁵ Man ewacu ire kumae, Ei, Rwoth, abibodho Israel kud ang’o? nen, wat para gi jucan m’usagu i Manase, an de a nok m’usagu i ot pa vwa.

¹⁶ Man Yehova wacu ire kumae, Wabibedo wakudi andha, man ibigoyo Jumidiani calu ng’atu acel.

¹⁷ Man ewacu ire kumae, Tek kawono anwang’u bero i weng’i, e dong’ inyuth ira giranyutha nia en e in m’uweco kuda.

¹⁸ Akwei, kud iai ku keni, cil m’abino i beng’i, man akel girathiera para, akethe i weng’i de. Man ewacu kumae, Abikuro cil m’ibino ko kendo.

¹⁹ Man Gideon umondo, man eyiko nyathi diel, ku kwen ma thobi mbe i ie ku i udheru mi mogo: eketho ringe i katoko, man eketho cweje i tabu, man ekele woko i bapg’e the bongu, e ethiere.

²⁰ Man malaika pa Mungu wacu ire kumae, Ting’ ring’o ku kwen ma thobi mbe i ie, man ikethgi wi cana maeni, man ikonj cweje de. E etimo kumeca.

²¹ Malaika pa Rwoth ulund urieyo ther uluth ma ni i cinge, emulo ko ring’o ku kwen ma thobi mbe i ie; e mac uai kud i cana, man ewang’u ring’o ku kwen ma thobi mbe i ie; e malaika pa Yehova ai woko kud i wang’e.

²² E Gideon uneno nia en e malaika pa Yehova: man Gideon uwacu kumae, Can i wia, E Rwoth Yehova! kum wanendra ku malaika ku wang’wa.

²³ E Yehova wacu ire kumae, Kwiocwiny ubed i beng’i; lworo kud unegi: ibitho ngo.

²⁴ Gideon ulund uguro pemblam keca ni Yehova, man elwong’e Yehova-calom (kwiocwiny): cil i ceng’ maeni enuti i Ofra mi Juabiezri.

²⁵ Man etimbre i diewor nica, nia Yehova wacu ire kumae, Gam thwon dhiang’ pa wuru, en e thwon dhiang’ mir arionde ma rundi pare abiro, man iredh pemblam pa Bal ma wuru bedo ko, man itong’ mungu m’araga ma ni ceng’ni kude piny;

²⁶ man igur pemblam ni Yehova Mungu peri i wi ka ma tek maeni, kubang’e kubang’e, man igam thwon dhiang’ mir arionde, man ithier lam m’awang’a ku yen mi mungu m’araga m’ibing’olo.

²⁷ E Gideon ulund ugamu dhanu apar mi jutic pare, man etimo calu Yehova yero ire: man etimbre, kum elworo juot pa won ku dhanu mir adhurane, ketho nia ecopo time ngo ku dieceng’, ketho etime ku diewor.

²⁸ Man ka dhanu mir adharane ni malu pir kuhweno, nen, pemblam pa Bal urwombre piny, man jung’olo mungu m’araga ma ni ceng’ni kude, man thwon dhiang’ mir arionde juthiero wi pemblamne ma juguro.

²⁹ E giwecri gigi kumae, Ng’a m’utimo gin maeni? E ka giyenyo man gipenjo, giwacu kumae, Gideon ma wod Yoac utimo gin maeni.

³⁰ Dhanu mir adhurane gilund giwacu kumae ni Yoac, Wodh wodi woko, kara etho, kum emugo pemblam pa Bal, man kum eng’olo mungu m’araga ma ni ceng’ni kude.

³¹ Man Yoac uwacu ni dhanu ceke m’ujai ire kumae, Wuyenyo wuriru kum Bali? kadi wubibodhe? ng’atu m’uyenyo erire i kume, wek junege kugweno nini: tek en e mungu, wek erire i kume gire, kum ng’atu moko mugo pemblam pare.

³² Ka kumeno i ceng’ maeca elwong’e Yerubal, ewacu kumae, Wek Bal urire i kume, kum emugo pemblam pare.

³³ Jumidiani ceke ku Juamaleki man nyithindho ma yo nyangu gilund gicokri gigi karacelo; man gikadhu lokani, e gigonjo i poga mi Yezrel.

³⁴ Ento Tipo pa Yehova ubino wi Gideon; man ekudho agwara; man Abiezer gicokri karacelo i toke.

³⁵ Man eoro kwenda i kind Manase ngung’; e gin bende gicokri karacelo i toke: man eoro jukwenda bang’ Acer, man ba Zebulun, man ba Naftali; e giidho malu nirombo kugi.

³⁶ Man Gideon uwacu ni Mungu kumae, Tek ibibodho Israel ku cinga, calu iyero,

³⁷ nen, abiketho lau rombo wi lelacam; tek thoi bedo wi laune kende, man ng’om ceke thwo kau, abilund ng’eyo nia ibibodho Israel ku cinga, calu iwacu.

³⁸ E ebedo kumeno; kum eai malu pir kugweno urwone, man ebio laune, man emino thoi kud i laune, upong’o tabu ku pi.

³⁹ E Gideon uwacu ni Mungu kumae, Ng’ecwiny peri kud uop i kuma, man abiyero wang’ acel maeni kende: apenji, wek amul wang’ acel maeni kende ku lau; kawono dong’ wi lau kende e m’uthwo, man wi ng’om ceke wek thoi ubed nuti.

⁴⁰ E Mungu timo kumeca i diewor maeca: kum wi lau kende e m’uthwo kau, man thoi bedo nuti wi ng’om ceke.