Jupoklembe 5 - The Holy Bible In Alur (Lur) Revised Orthography

Wer pa Debora giku Barak

¹ Debora giku Barak ma wod Abinoam gilund giwero wer i ceng’ maeca, giwacu kumae,

² Kum jutelwic gitelo wie i Israel, Kum dhanu githieri gigi ku berocwinygi, Wumi mugisa ni Yehova.

³ Wuwinji, E wun ubimo; wucik ithwu, E wu judongomawijo; An, cil an, abiwero ni Yehova; Abiwero pak ni Yehova, Mungu mir Israel.

⁴ Yehova, kan icidho woko kud i Seir, Kan iwotho woko kud i podho mir Edom, Ng’om uyengre, polo bende podho, Eyo afuru thiwo pi.

⁵ Gudi yengre i wang’ Yehova, Cil Sinai maeno i wang’ Yehova, Mungu mir Israel.

⁶ I nindo pa Camgar ma wod Anath, I nindo pa Yael, gengi bedo mbe dhanu, Man juwoth giwotho kud i ng’et yo.

⁷ Jubim githum i Israel, githum, Cil ma an a Debora awodhra, Awodhra ma an a mego i Israel.

⁸ Gifoyo mungu ma nyen; I nindo maeca lwiny ubedo dhugang’: Ban kadi tong’ unen I kind rubanga pier ang’wen i Israeli?

⁹ Adundena ni yo ba jubim mir Israel, M’uthieri gigi ku berocwiny i kind dhanu: Wumi mugisa ni Yehova.

¹⁰ Yer pire, wu ju m’uwotho ku wi kana ma tar, Wun ma wubedo wi bongu ma ng’ieune tek, Man wun ma wuwotho dhu yo.

¹¹ Bor ku badwand ju m’ukilo athero, i ka ma jutwomo ie pi, Gibiyero pi tic mi bedopwe pa Yehova keca, Cil tic mi bedopwe mi bim pare i Israel. Dhanu pa Yehova lund uloro piny dhugang’.

¹² Ceu, ceu, Debora; Ceu, ceu, wer wer: Ai malu, Barak, man ipei ayeki peri woko, in i wod Abinoam.

¹³ E dong’ judongo gilund giloro piny ku dhanu de; Yehova loro piny pira kum ju ma tek.

¹⁴ Ku i Efraim giloro piny gi ju ma ulaggi ni i Amalek; I toki, Benyamin, i kind dhanu peri; Kud i Makir jubim giloro piny, Man kud i Zebulun ju ma gimaku uluth mi jugorcik giloro piny.

¹⁵ Man judongomawijo pa Isakar gini karacelo ku Debora; Calu Isakar ubedo, e Barak ubedo kumeca; Gikonjri i poga i tiende. I ng’et kulo pa Ruben Lembakece dit yo i adunde.

¹⁶ Nedi ibedo kind dwol mi rombe, Kara iwinj ba bilo ma jukudho pir uduli? Ba kulo pa Ruben Yeny ma yo i adunde bedo dit.

¹⁷ Gilead ubedo loka Yordan: Man Dan, edong’ i combo nedi? Acer ubedo ling’ dhu wath, Man ebedo dhu kulo pare.

¹⁸ Zebulun en e dhanu m’ukuno kwo migi ni tho, Man Naftali, wi ka ma malu mi thim.

¹⁹ Ju m’ubimo gibino man gikiedo; Ju m’ubimo mi Kanan gilund gikiedo, I Tanak ba pi mi Megido: Gigamu kuloka moko mi sente ngo.

²⁰ Kud i polo cero kiedo, Kud i woth migi gikiedo kum Sisera.

²¹ Kulo Kicon ukabugi cen, Kulo ma con maeno, kulo Kicon. E ng’eyong’ec para, woth i weng’i ku tego.

²² Lwet riuni lund unyono Ni kum gwico, gwico mi ju ma tek migi.

²³ Wulam Meroz, malaika pa Yehova wacu, Wulam dhanune kurac, Kum gibino ngo gikony Yehova, Gikony Yehova kum ju ma tek.

²⁴ Mugisa bikwanyu Yael ma sagu mon, Dhaku pa Heber ma Jakeni; Mugisa bikwanye ma sagu mon i hema.

²⁵ Epenjo pi, man emio ire cak; Ekelo mo ire i tabu mi yung.

²⁶ Eketho cinge kum gute mi hema, Man cinge ma yor acwic kum nyondro pa jabodho; Man egoyo Sisera ku nyondro, man eguro plu i wie; Eyo, ecobo man eguro kud i ternyime.

²⁷ Egung’ the tiende, epodho, evuto; Egung’ the tiende, epodho: Ka m’egung’ i ie, epodho keca m’etho.

²⁸ Eneno woko kud i wang’ot, man eywak, Min Sisera ywak ku wang’ot, Magali pare galu hai kubino nedi? Ukobre mi magali pare galu nedi?

²⁹ Mon pare ma riek giloko ire lembe, Eyo, eloko lembe ire gire kumae,

³⁰ Ginwang’u ngo, gipoko ayeki ngo? Nyaku, nyir ario ku ba dhanu ku ba dhanu; Ni Sisera ayeki mi kendi ma ju kite, Ayeki mi kendi ma ju kite m’aruka, Mi kendi ma ju kite m’aruka kun ku kun, i ng’ut ju ma juyaku?

³¹ Dong’ judegi peri ceke ginyothri kumeca, E Yehova: Ento dong’ ju m’umare gibed calu ceng’ kan ewok i tego pare. Man ng’om ukwio rundi pier ang’wen.