Jupoklembe 4 - The Holy Bible In Alur (Lur) Revised Orthography

Debora giku Barak Givoyo Sisera

¹ Man nyithindho mir Israel utimo gin ma rac kendo i wang’ Yehova, nwang’u Ehud utho.

² Man Yehova ng’iewogi i cing’ Yabin m’ubimo mi Kanan, m’ucamu ker i Hazor; ma jatel wi udul pare en e Sisera, m’ubedo i Haroceth mi Thekdhanumange.

³ E nyithindho mir Israel ulwong’o Yehova: kum ebedo ku magali mi nyunyu dak abung’wen; man esendo nyithindho mir Israel dit mi rundi pier ario.

⁴ Nwang’u Debora, ma jabila ma dhaku, ma dhaku pa Lapidoth, epoko lembe mir Israel i nindo maeca.

⁵ Man ebedo the yen thith pa Debora i kind Rama ku Beth-el i ng’om gudi pa Efraim: man nyithindho mir Israel uidho i bang’e kara epok lembe.

⁶ Man eoro elwong’o Barak ma wod Abinoam kud i Kedec-naftali, man ewacu ire kumae, Yehova, Mungu mir Israel ung’olo ngo, ewacu kumae, Cidh icor ceng’ni got Tabor, man igam dhanu rubanga apar i kind nyithindho pa Naftali man mi nyithindho pa Zebulun wuci wukugi?

⁷ Man abitelo Sisera, ma jego mir udul asikari pa Yabin, i beng’i, dhukulo Kicon, karacelo ku magali pare man udul dhanu pare: man abikethe i cingi.

⁸ Man Barak uwacu ire kumae, Tek wabicidho wakudi, e abicidho; ento tek iyio ngo wacidh wakudi, abicidho ngo.

⁹ Man ewacu kumae, Wabicidho wakudi andha: ere woth m’iwotho bibedo ni yung iri ngo; kum Yehova bing’iewo Sisera i cing’ dhaku. Man Debora ai malu, man ecidho karacelo giku Barak i Kedec.

¹⁰ Man Barak ulwong’o Zebulun ku Naftali karacelo i Kedec; man dhanu rubanga apar uidho kude: Debora de idho karacelo kude.

¹¹ Nie Heber ma Jakeni ekoire gire ku Jukeni, cil ku nyithindho pa Hobab ma jalkwaru Musa, man eguro hema pare bor calu ka mi yen ma i Zananim, ma ceng’ni Kedec.

¹² E giyero ni Sisera nia Barak ma wod Abinoam uidho got Tabor.

¹³ Man Sisera coko magali pare ceke karacelo, cil magali mi nyunyu dak abung’wen, ku dhanu ceke ma gini karacelo kude, ugambre Haroceth mi Thekdhanumange, cil kum kulo Kicon.

¹⁴ Man Debora wacu ni Barak kumae, Ai malu; kum maeni en e ceng’ ma Yehova mio ie Sisera i cingi: Yehova cidho woko i weng’i ngo? Kum kumeno Barak uloro ku wi got Tabor, ku dhanu rubanga apar m’ulubo ng’eye.

¹⁵ Man Yehova sendo Sisera, ku magali pare ceke, man udul pare ceke, ku palamularu i wang’ Barak; man Sisera loro kud i magali pare, man eringo ku tiende.

¹⁶ Ento Barak ulubo tok magaline, man tok udulne, cil kum Haroceth mi Thekdhanumange: man udul ceke pa Sisera podho ku lak palamularu; ng’atu moko mbe m’udong’.

¹⁷ Ento Sisera ringo ku tiende ba hema pa Yael ma dhaku pa Heber ma Jakeni: kum kwiocwiny ni i kind Yabin m’ubimo mi Hazor ku ot pa Heber ma Jakeni.

¹⁸ Man Yael ucidho woko nirombo ku Sisera, man ewacu ire kumae, Mondi, rwoth para, mond i bang’a; lworo kud unegi. Man emondo i bang’e i hema, e eume ku bongu.

¹⁹ Man ewacu ire kumae, Akwei, mi ira pi moko nyanok amadhi; kum rieu benega. Man eyabu cupa mi cak, emio emadhi, man eume.

²⁰ Man ewacu ire kumae, Cung i dhugola mi hema, man ebibedo, ka ng’atu moko bino epenjo i beng’i, ewacu de kumae, Ng’atu moko ni keni? nia ibiwacu kumae, Ungo.

²¹ Yael ma dhaku pa Heber ulund ugamu gute mi hema, man egamu nyondro i cinge, e ecidho yo yo i bang’e, man eguro gute i ternyime, e ekadhu cik i ng’om; kum eni i nindo ma pek; kum kumeno cwinye mwony man etho.

²² Man, nen, ka Barak ubelubo Sisera, Yael uwok woko nirombo kude, man ewacu ire kumae, Bin, man abinyutho iri ng’atu m’ibeyenyo. Man ebino i bang’e; man, nen, Sisera vuto m’etho, man gute mi hema ni i ternyime.

²³ Kum kumeno Mungu voyo Yabin m’ubimo mi Kanan i wang’ nyithindho mir Israel i ceng’ maeca.

²⁴ Man cing’ nyithindho mir Israel ubedo tek m’usagu kum Yabin m’ubimo mi Kanan, cil ma ginyotho ko Yabin m’ubimo mi Kanan.