Jupoklembe 3 - The Holy Bible In Alur (Lur) Revised Orthography

Thek ma Yehova Weko Nimulo ko i Israel

¹ Nie maeni thek ma Yehova weko, kara emul i Israel kugi, en e dhanu mir Israel m’ung’eyo lwiny ceke mi Kanan ungo;

² ndhu kara dhanum’utuk mi nyithindho mir Israel ging’ei, uponjgi kud ali, wagi ju ma naka ng’eyo gin moko ngo pi lwiny:

³ thekne gi eni, rwodhi abic mi Jufilisti, ku Jukanani ceke, ku Jusidoni, ku Juhivi m’ubedo i got Lebanon, ugambre kum got Balhermon cil kum kamondo mi Hamath.

⁴ Man gidong’, kara jumul i Israel kugi, kara jung’ei tek gibiwinjo lembang’ola pa Yehova, m’eng’olo ni kwarugi ni kum Musa.

⁵ E nyithindho mir Israel gibedo i kind Jukanani, ku Juhiti, man Juamori, man Juperizi, man Juhivi, ku Jujebusi:

⁶ man gigamu nyiggi ni mon igi, man gimio nyiggi gigi ni wotgi, man gitimo ni mungu migi.

Othniel Ularu Israel kud i Cing’ Kucan-ricathaim

⁷ Man nyithindho mir Israel gitimo gin ma rac i wang’ Yehova, man wigi wil kum Yehova Mungu migi, man gitimo ni Balim ku mungu m’araga.

⁸ Ka kumeno ng’ecwiny pa Yehova opo kum Israel, man eng’iewogi i cing’ Kucan-ricathaim m’ubimo mi Mesopotamia: man nyithindho mir Israel utimo ni Kucan-ricathaim rundi abora.

⁹ E ka nyithindho mir Israel ulwong’o Yehova, Yehova ting’o jalar ni nyithindho mir Israel, m’ubodhogi, en e Othniel ma wod Kenaz, m’umin Kaleb ma nok.

¹⁰ E Tipo pa Yehova bino i wie, man epoko lembe mir Israel; man ecidho woko ni lwiny, man Yehova ketho Kucan-ricathaim m’ubimo mi Mesopotamia i cinge: man cinge voyo Kucan-ricathaim.

¹¹ Man ng’om ukwio oro pier ang’wen. E Othniel ma wod Kenaz utho.

Ehud Ularu Israel kud i Cing’ Moab

¹² E nyithindho mir Israel utimo gin ma rac kendo i wang’ Yehova: man Yehova mio tego ni Eglon m’ubimo mi Moab kum Israel, kum gitimo gin ma rac i wang’ Yehova.

¹³ Man ecoko nyithindho pa Amon ku pa Amalek i bang’e; e ecidho egoyo Israel, e gimwony o adhura mi yen thith.

¹⁴ Man nyithindho mir Israel utimo ni Eglon m’ubimo mi Moab oro apar wi abora.

¹⁵ Ento ka nyithindho mir Israel ulwong’o Yehova, Yehova ting’o igi jalar, en e Ehud ma wod Gera, Jabenyamini, ma jafacam. E nyithindho mir Israel uoro ajok i cinge bang’ Eglon m’ubimo mi Moab.

¹⁶ Nwang’u Ehud uthiedho palamularu ire gire ma lake kun ku kun, kaborne bot acel; man eroye the kendi pare i dire ma yor acwic.

¹⁷ Man ethiero ajok ni Eglon m’ubimo mi Moab: nwang’u Eglonne en e ng’atu m’ucwe dit.

¹⁸ Man kinde m’edaru thiero ajok, elalu dhanu m’ukelo ajokne.

¹⁹ Ento en gire elokre ku ba katong’okidi ma ceng’ni Gilgal, man ewacu kumae, Abedo ku nyalembe moko ma nyalwe iri, E ubimo. Man ewacu kumae, Wuling’. E dhanu ceke m’ucungo i vute giai woko kud i kume.

²⁰ Man Ehud ubino i bang’e; man ebedo gire kende i kusika ma malu ma ng’ic. Man Ehud uwacu kumae, Abedo ku rwonglembe m’uai ba Mungu iri. E eai malu ku wi kom pare.

²¹ Man Ehud urieyo cinge ma yor acam, man ewo dho palamularu kud i dire ma yor acwic, man edhuyo ko kume:

²² man yende de mondo yo ng’ei palane; man mione ciko ba palane, kum ewodho palamularu ngo kud i kume; man ewok woko ku yor i ng’eye.

²³ Ehud ulund uwok woko i pondot, man eciko dhugola mi kusika ma malu i wie, man etwiogi ku kifungula.

²⁴ Nie kan eai, jutic pare gibino; man gineno, man, nen, dhugola mi kusika ma malu bedo atwia ku kifungula; man giwacu kumae, Andha ebeumo tiende i kusika ma malu.

²⁵ E gikuro cil ma lewic umakugi; man, nen, eyabu dhugola mi kusika ma malu ngo; ka kumeno giting’o kifungula, man giyabugi; man, nen, rwoth migi podho i ng’om m’etho.

²⁶ Man Ehud uringo kinde ma gigalu, man ekadhu yor i wang’ katong’okidi, e eringo ba Seira.

²⁷ Man etimbre, kinde m’ewok, nia ekudho agwara i ng’om gudi pa Efraim; man nyithindho mir Israel giloro piny gikugi kud i ng’om gudi, man etelo wigi.

²⁸ Man ewacu igi kumae, Wulub toka; kum Yehova ketho judegi mu ma Jumoabi i cingwu. Man giloro piny i toke, man gimaku kakadhu mi Yordan yo ba Moab, man eyio ngo nia ng’atu moko kadhi.

²⁹ Man gigoyo kind Jumoabi i nindo maeca dhanu ma yenyo romo rubanga apar, ku ba dhanu ceke ma tek, man ku ba dhanu ceke ma gi jurukara; e ng’atu moko mbe m’uboth.

³⁰ Kum kumeno juvoyo Moab i ceng’ maeca the cing’ Israel. Man ng’om ukwio rundi pier abora.

Camgar Ularu Israel kud i Cing’ Jufilisti

³¹ Man yo ku ng’eye Camgar ma wod Anath, m’ugoyo kind Jufilisti dhanu dak abusiel ku dindo ma juleko ko koni dhiang’: man en bende ebodho Israel.