Jupoklembe 2 - The Holy Bible In Alur (Lur) Revised Orthography

Malaika pa Yehova i Bokim

¹ Man malaika pa Yehova idho malu kud i Gilgal ebino Bokim. Man ewacu kumae, Aketho wuidho malu kud i Misiri, man akelowu i ng’om m’akwong’o ni kwaruwu; man awacu kumae, Abituro lembariba para ma kudu ki ngo:

² man wubitimo lembariba moko ngo ku dhanu m’ubedo i ng’om maeni; wubirungo pemblam migi piny. Ento wuwinjo dwanda ngo: wutimo maeni nedi?

³ Kum kumeno an bende awacu kumae, Abiriemogi woko ngo kud i weng’wu; ento gibibedo ni ukudho i ng’etwu, man mungu migi bibedo ni uwic iwu.

⁴ Man etimbre, kinde ma malaika pa Yehova yero lembe maeni ni nyithindho mir Israel ceke, nia dhanune ting’o dwandgi malu, man giywak.

⁵ E gilwong’o nying’ ka maeno Bokim: e gilamu lam keca ni Yehova.

Tho pa Yocuwa

⁶ Nie kinde ma Yocuwa ketho dhanune gicidho, nyithindho mir Israel gicidho kubang’gi kubang’gi ng’atuman bang’ aba pare kara gimwonye.

⁷ Man dhanune gitimo ni Yehova i nindo ceke pa Yocuwa, man i nindo ceke mi judongo m’ubedo i ng’ei Yocuwa, ma gineno tic ma dwong’ ceke pa Yehova m’etimo pir Israel.

⁸ Man Yocuwa ma wod Nun, ma jatic pa Yehova, utho, ma rundi pare dak acel kud apar.

⁹ Man giyike i kieu mir aba pare i Timnathherez, i ng’om gudi pa Efraim, i yor ariwa ma malu ni got mi Gac.

¹⁰ Man dhanum’utuk maeca bende gicokri ba kwarugi: e dhanum’utuk mange ai i ng’eigi, m’ung’eyo Yehova ngo, kadi tic m’etimo pir Israel de ngo.

Kier mi Juisraeli man Tic mi Jupoklembe

¹¹ E nyithindho mir Israel utimo gin ma rac i wang’ Yehova, man gitimo ni Balim;

¹² man giweko Yehova, ma Mungu pa kwarugi, m’ukelogi woko kud i ng’om Misiri, man gilubo mungu mange, kind mungu mi kodhidhanu m’utiekogi gbur, e girum gigi igi: man ginyayu ng’eecwiny i Yehova.

¹³ Man giweko Yehova, e gitimo ni Bal ku Actaroth.

¹⁴ E ng’ecwiny pa Yehova opo kum Israel, man ekethogi i cing’ junyoth m’unyothogi; man eng’iewogi i cing’ judegi migi m’utiekogi gbur, ketho nia gicopo cungo kendo ngo i wang’ judegi migi.

¹⁵ Ka ceke ma tek gicidho woko, cing’ Yehova jai igi mi nyayu ruvwa, calu Yehova yero, man calu Yehova kwong’o igi: man cwinygi ng’abre dit.

¹⁶ Man Yehova ting’o jupoklembe, m’ularugi kud i cing’ ju m’uyakugi.

¹⁷ Man kadok kumeno de giwinjo ngo ba jupoklembe migi; kum gitimo calu weg asara tok mungu mange, man girum gigi i wang’gi: gikier pio kud i yo ma kwarugi wotho i ie, ma giworo ko lembang’ola pa Yehova; ento gin gitimo kumeca ngo.

¹⁸ Man ka Yehova ting’o igi jupoklembe, e kinde maeca Yehova bedo karacelo ku japoklembene, man ebodhogi kud i cing’ judegi migi i nindo pa japoklembene ceke: kum kisa nego Yehova kum cur migi ma gicur ko kum ju m’usendogi m’ung’abu cwinygi de.

¹⁹ Ento etimbre, ka japoklembene tho, nia gilokri, man gitimo rac ma sagu kwarugi, ku lubo mungu mange kara gitim igi, man girum igi de; man giweko timo migi ma gitimo ngo, kadi yo migi mi camuco de giweko ngo.

²⁰ E ng’ecwiny pa Yehova opo kum Israel; man ewacu kumae, Kum thek maeni turo lembariba para m’ang’olo ni kwarugi, man giwinjo dwanda ngo;

²¹ an bende ugambre kawono abiriemo woko ngo kud i wang’gi thek moko ma Yocuwa weko kan etho;

²² kara amul i Israel ku thek maeno, tek gibimoko i yo pa Yehova kara giwoth i ie, calu kwarugi moko i kume, kadi ngo.

²³ Kum kumeno Yehova weko thek maeno, m’eriemogi woko pio ngo; kadok i cing’ Yocuwa de ekethogi ngo.