Jupoklembe 18 - The Holy Bible In Alur (Lur) Revised Orthography

Mika giku Judani

¹ I ceng’ maeca ubimo mbe i Israel: man i ceng’ maeca suru mi Judani giyenyo aba igi ma gibed i ie; kum cu i ceng’ maeca aba podho igi ngo ku kind suru mir Israel.

² Man nyithindho pa Dan gioro dhanu abic mi wat migi kud i welgi dho, dhanu ma ratego, m’uai i Zora, man m’uai Ectaol, kara gilib ng’om, man ginen i ie; e giwacu igi kumae, Wucidh, wunen i ng’om. Man gibino i ng’om gudi pa Efraim, kum ot pa Mika, e gigonjo keca.

³ Ka gini ceng’ni ot pa Mika, ging’eyo dwand jalawobi ma Jalawi; man girobo kuca, e giwacu ire kumae, Ng’a m’ukeli kuni? e itimo ang’o kakeni? man ibedo kud ang’o kakeni?

⁴ Man ewacu igi kumae, Mika timo ira kumae, man kumae, man emio sukulia ira, an de adoko jalam pare.

⁵ Man giwacu ire kumae, Wapenji, penj lembapora ba Mungu iwa, kara wang’ei tek yo mwa ma wawotho i ie bibedo miero.

⁶ E jalam uwacu igi kumae, Wucidh ma cwinywu kwio: yo mu ma wucidho i ie ni i wang’ Yehova.

⁷ Dhanu abic gilund gicidho, man gibino Laie, e gineno dhanu ma gini i ie, maram gibedo ko museme, calu Jusidoni gibedo, yo man museme; kum jumoko mbe i ng’om, ma weg ng’ol, ma copo nyayu lewic i wigi i gin moko, man gibedo bor ku Jusidoni, man gibedo ku lembe mi jukupiny ungo ku ng’atu moko.

⁸ Man gidwogo ba uturneggi i Zora man Ectaol:! e uturneggi penjogi kumae, Wuwacu ang’o?

⁹ Man giwacu kumae, Waeyu malu, waidhu wakiedu kugi; kum waneno ng’ombe, man, nen, e ber dit: man wubedo ling’i? nyap cidho mondo mwonyo ng’ombe kud utimwu.

¹⁰ Ka wucidho, wubiwok ba dhanu m’ubedo museme, man ng’ombe dit; kum Mungu daru mie i cingwu, en e ka ma can gin moko ma ni i ng’om umbe i ie.

¹¹ Man dhanu dak abusiel ma gi weg jamtho gitugo woth ku keca ma gi wat mi Judani, ma giai kud i Zora man kud i Ectaol.

¹² E giidho malu, man gigonjo i Kiriath-jearim, i Yuda: kum kumeno gilwong’o ka maeno Mahane-dan cil tin; nen, en e i ng’ei Kiriath-jearim.

¹³ Man gikadhu ku keca cil i ng’om gudi pa Efraim, man giwok ba ot pa Mika.

¹⁴ Dhanu abic ma gicidho libo ng’om mi Laie, gilund giloko lembe man giwacu ni uturneggi kumae, Wung’eyo nia ugoke nuti i udi maeni, ku mungu m’acwia, man ayi m’acwia m’ang’ika, kud ayi m’acwia m’atwaga? ka kumeno kawono wupid pi gin ma maku wutim.

¹⁵ Man girobo keca, man gibino ba ot pa jalawobi ma Jalawi, en e ba ot pa Mika, man gipenje maram ebedo ko.

¹⁶ Man dhanu dak abusiel ma gi weg jamtho, ma gi mi nyithindho pa Dan, gicungo i kamondo mi dhugang’,

¹⁷ Man dhanu abic ma gicidho kara gilib ng’ombe giidho malu, man gimondo, man gigamu ayi gin m’acwia m’ang’ika, kud ugoke, man mungu m’acwia, kud ayi gin m’acwia m’atwaga: man jalam ucungo ba kamondo mi dhugang’ ku dhanu dak abusiel ma gi weg jamtho.

¹⁸ Man ka ju maeni gimondo i ot pa Mika, man gikelo ayi gin m’acwia m’ang’ika, kud ugoke, ku mungu m’acwia, kud ayi m’acwia m’atwaga, jalam uwacu igi kumae, Wutimo ang’o?

¹⁹ Man giwacu ire kumae, Bed ling’, keth cingi wi dhogi, man wacidhu wakudu, man ibed iwa ni wego man jalam: en e ber iri m’usagu ya ibed jalam mi ot pa ng’atu acel, kadi ibed jalam mi suru man wat i Israeli?

²⁰ E anyong’a nego adunde jalam, man egamu ugoke, ku mungu m’acwia, kud ayi gin m’acwia m’ang’ika, man ecidho i kind dhanu.

²¹ Kum kumeno gilokri gicidho, man giketho nyithindho ku lim ku jamni i wang’gi.

²² Ka kindgi liero twee ku ot pa Mika, dhanu ma gini i udi ma ceng’ni ot pa Mika gicokri karacelo, man gilubo tok nyithindho pa Dan, girubogi.

²³ Man gilwong’o ba nyithindho pa Dan. Man giloko wang’gi, e giwacu ni Mika kumae, Ang’o timi, ketho ibino kud udul dhanu ma kumeno?

²⁴ Man ewacu kumae, Wumayu mungu para m’atimo, man jalam, e wucidho, man abedo kud ang’o kendo? e ka wuwacu ira nedi kumae, Arig’o timi?

²⁵ E nyithindho pa Dan giwacu ire kumae, Dwendi kud uwinjre i kindwa, ju ma jung’ecwiny gimaru podho i wii, man kwo peri maru rwinyo, ku kwo mi juot peri.

²⁶ E nyithindho pa Dan gicidho i yo migi: e ka Mika neno nia tego migi sagu, elokre edwogo de ba ot pare.

²⁷ E gigamu maeno ma Mika timo, man jalam m’ebedo ko, e gibino Laie, ba dhanu m’ubedo yo man museme, man gigoyogi ku lak palamularu; giwang’u adhura de ku mac.

²⁸ Man jabodho mbe, kum en e bor ku Sidon, man lembe mi jukupiny umbe i kindgi ku ng’atu moko; man en e i poga m’ubedo ceng’ni ku Beth-rehob. E gigomo adhurane, man gibedo i ie.

²⁹ E gilwong’o nying’ adhurane Dan, tok nying’ weggi ma Dan, ma Israel unyolo: ento nwang’u nying adhurane ma kwong’a en e Laie.

³⁰ Man nyithindho pa Dan giketho ayi m’acwia m’ang’ika cungo igi gigi; man Yonathan, ma wod Gercon, ma wod Musa, en ku wote gi julam mi suru mi Judani cil i ceng’ mir ayeki mi ng’ombe.

³¹ Kum kumeno giketho ayi gin m’acwia m’ang’ika ma Mika timo ucungi, i nindo ceke ma ot pa Mungu ni i Cilo.