Jupoklembe 15 - The Holy Bible In Alur (Lur) Revised Orthography

¹ Ento etimbre yo ng’ei nindo moko, i nindo mi mwoka nganu, nia Samson uliewo dhaku pare ku nyathi diel; man ewacu kumae, Abimondo ba dhaku para i kusika. Ento won dhaku pare yio ngo emondi.

² Man won uwacu kumae, Ia wacu andha nia nyo idage ndhu; kum kumeno amie ni wedu moko: nyamin ma nok ber ma sage ngo? akwei, game kakare.

³ Man Samson uwacu igi kumae, Wang’uni lembe bibedo i wia ngo pi Jufilisti, kan atimogi rac.

⁴ E Samson ucidho emaku utho dak adek, man egamu ridhro, eloko yib utho man kum yib wadi, man eketho ridhro i kind yibgi ario ario kubang’gi kubang’gi.

⁵ Man kan ecwinyo ridhro, eweko gicidho i nganu mi Jufilisti m’ucungo, man ewang’u nganu ma jutwio ni kumna ku ma wi tiende de, man podho ulam bende.

⁶ Jufilisti gilund gipenjo kumae, Ng’a m’utimo maeni? Man giwacu kumae, Samson, ma jalwod Jatimni, kum egamu dhaku pare, emie de ni wadi moko. E Jufilisti giidho malu, man giwang’u dhakune ku won mire de ku mac.

⁷ Man Samson uwacu igi kumae, Tek wutimo kumeni, abiculo kwor i kumwu andha, man yo ng’ei maeno abiweko.

⁸ Man egoyogi i dirgi man i bambgi ku nek ma dit: man eloro piny ebedo de i odcana mir Etam.

Samson Uvoyo Jufilisti i Lehi

⁹ Jufilisti gilund giidho malu, man giguro hema i Yuda, man gimoiri foo i Lehi.

¹⁰ E dhanu m’i Yuda giwacu kumae, Wuidho malu i kumwa nedi? Man giwacu kumae, Waidho malu kara watwi Samson, watime calu etimo i kumwa.

¹¹ Dhanu mi Yuda rubanga adek gilund giloro piny ba odcana mir Etam, man giwacu ni Samson kumae, Ing’eyo ngo nia Jufilisti gi jubim i wiwa? Meni ke ang’o m’itimo i kumwa? Man ewacu igi kumae, Calu gitimo i kuma, atimo i kumgi kumeca.

¹² Man giwacu ire kumae, Waloro piny kara watwii, kara wakethi i cing’ Jufilisti. Man Samson uwacu igi kumae, Wukwong’ ira, nia wubipodho i wia wun ungo.

¹³ Man giyero ire giwacu kumae, Ungo; ento wabitwii ki, man wabikethi i cing’gi: ento wabinegi ngo andha. Man gitwie ku uno ario ma nyen, man gikele malu ku ba cana.

¹⁴ Man kan ewok ba Lehi, Jufilisti giwoi ka girombo kugi: man Tipo pa Yehova bino i wie ku tego, man uno ma ni wi bote doko va atutu ma juwang’u ku mac, man twic upodho lwany kud i cinge.

¹⁵ Man enwang’u cogo ma nyen ma en e lwokni mi kana, man erieyo cinge, eting’e, man egoyo kudo dhanu rubanga acel.

¹⁶ Man Samson uwacu kumae, Ku cogo mi hvokni kana, ungu wi ungu, Ku cogo mi lwokni kana, agoyo dhanu rubanga acel.

¹⁷ Man etimbre, kinde m’edaru weco, nia ebayu cogo mi lwokni kana kud i cinge; man ka maeno julwong’o Ramath-lehi.

¹⁸ Man rieu pi nege hai, man elwong’o Yehova, ewacu de kumae, Imio both maeni ma dit ku cing’ jatic peri; man kawono abitho ku rieu pi, man abipodho i cing’ ju ma yaa mbe i kumgi.

¹⁹ Ento Mungu riedo i ora ma ni i Lehi, man pi wok kud i ie; man kan emadhu, cwinye dwogo, man edoko tek: kum kumeno nying’ kakeno julwong’o En-hakore, ma ni i Lehi, cil tin.

²⁰ Man epoko lembe i Israel i ceng’ mi Jufilisti rundi pier ario.