Jupoklembe 14 - The Holy Bible In Alur (Lur) Revised Orthography

Samson giku Dhaku mi Timna

¹ A Man Samson uloro piny i Timna, a man eneno dhaku moko mi Timna i kind nyig Jufilisti.

² Man eidho malu, eyero de ni won ku min, man ewacu kumae, Aneno nyaku moko i Timna i kind nyig Jufilisti: ka kumeno kawono wugame ira ni dhaku.

³ E won mire ku min mire gilund giwacu ire kumae, Nyaku moko mbe i kind nyig utumeru, kadi i kind dhanu para ceke, ma nia icidho gamu dhaku mi Jufilisti ma yaa mbe kugi? Ento Samson uwacu ni won kumae, Game ira; kum enyayu mutoro i ia dit.

⁴ Ento won ku min ging’eyo ngo nia maeni ai ba Yehova; kum eyenyo kalembe wi Jufilisti. Nwang’u i nindo maeca Jufilisti gibimo wi Israel.

⁵ Samson ulund uloro piny, man won ku min, i Timna, man giwok kum podho mir ulok mi Timna: man, nen, nyathin umvor urundo i wie.

⁶ Man Tipo Yehova bino i wie ku tego man eyece calu ecopo yeco nyathi diel; man ebedo ku gin moko ngo i cinge: man eyero ngo ni won kadi min pi gin m’etimo.

⁷ Man eloro piny, man giweco giku nyakune; e enyayu mutoro dit i Samson.

⁸ Man yo ng’ei nindo moko edwogo nigame; man erobo kara enen ukporo umvor: man, nen, njuru kic ni i ukporo umvor, man kic m’acama.

⁹ Man egame i cinge, e ecidho, ewotho ku camu; man etundo ba won ku min, emio igi de, man gicamu: ento eyero igi ngo nia egamu kicne kud i ukporo umvor.

¹⁰ E won uloro piny ba nyakune; man Samson utimo agba keca; kum awobi gitimo kumeca.

¹¹ Man etimbre, ka ginene, nia gikelo juwagi pier adek m’ubed karacelo kude.

¹² Man Samson uwacu igi kumae, Kawono wek abol koi iwu: tek wucopo tuco there ira i ceng’ abiro mir agba, man wunwang’e, e abilund mio iwu kendi ma nwang’ pier adek man kendi m’alawa pier adek;

¹³ ento tek wucopo tuce ira ngo, wubilund mio ira kendi ma nwang’ pier adek ku kendi m’alawa pier adek. Man giwacu ire kumae, Bol koi peri, kara wawinji.

¹⁴ Man ewacu igi kumae, Cemo ai kud i jacamcemo, Man mido ai kud i jatego. Man i ceng’ adek gicopo ewo koine ngo.

¹⁵ Man etimbre i ceng’ mir abirone, nia giwacu ni dhaku pa Samson kumae, Bidh cweri, kara ceu iwa koine, wamaru weng’i ku ot pa wuru ku mac: wulwong’owa kara wudwokwa ni jucani? kumeno ngo?

¹⁶ Man dhaku pa Samson uywak i wang’e, man ewacu kumae, Idaga kende, man imara ngo: ibolo koi ni nyithindho mi juthuwa, man iyere ira ngo. Man ewacu ire kumae, Nen, ayere ngo ni vwa kadi ma, e ayer iri?

¹⁷ Man eywak i wang’e ceng’ abiro, i nindo mir agba migi ceke: man etimbre i ceng’ mir abirone, nia eyero ire, kum edieng’o cwinye dit; man eyero koine ni nyithindho mi juthugi.

¹⁸ Man dhanu mir adhura giwacu ire i ceng’ mir abirone ma fodi ceng’ k’upodho ngo kumae, Ang’o ma mit ma sagu kic; man ang’o ma tek ma sagu umvori? man ewacu igi kumae, Dok wukufuro ku rwaya para ngo, Kuno di wunwang’u koi para ngo.

¹⁹ E Tipo pa Yehova bino i wie ku tego, man eloro piny Ackelon, man enego dhanu pier adek m’i kindgi, egamu ayeki migi de, man emio kendi m’alawa ni ju m’uewo koine. Man ng’ecwiny pare opo, man eidho malu ba ot pa won.

²⁰ Ento dhaku pa Samson jumio ni wadi, ng’atu m’etimo ire calu jarimone.