Jupoklembe 12 - The Holy Bible In Alur (Lur) Revised Orthography

Yeftha man Efraim

¹ Man dhanu pa Efraim gicokri karacelo, man gikadhu yor ariwa ma malu; e giwacu ni Yeftha kumae, Nedi ikadhu lokaca nikiedo ku nyithindho mir Amon, ma k’ilwong’owa ngo wacidh kudi? wabiwang’u ot peri i wii ku mac.

² Man Yeftha wacu igi kumae, Waku dhanu para wakiedo ngili ngili ku nyithindho mir Amon; man kan alwong’owu, wubodha ngo kud i cing’gi.

³ Man kan aneno nia wubodha ngo, akuno kwo para, man akadhu lokaca kum nyithindho mir Amon, man Yehova kethogi i cinga: ka kumeno wuidho malu i bang’a tin nedi, nikiedo kuda?

⁴ Yeftha lund ucoko dhanu mi Gilead ceke karacelo, man gikiedo kud Efraim; e dhanu mi Gilead gigoyo Efraim, kum giwacu kumae, Wun wu ju m’upiei ni Efraim, wu Jugileadi, i kind Efraim, man i kind Manase.

⁵ Man Jugileadi gimaku kakadhu mi Yordan ni Juefraimi. Man ebedo kumeno, nia, ka jumoko m’upiei ni Efraim giwacu kumae, Wek akadh lokaca, dhanu mi Gilead giwacu ire kumae, In i Jaefraimi? Tek ewacu kumae, Ungo;

⁶ gilund giwacu ire kumae, Wac Ciboleth; man ewacu Siboleth; kum ecopo ketho lebe wace cu ngo: e gilund gimake, man ginege i kakadhu mi Yordan. Man i nindo maeca dhanu pa Efraim rubanga pier ang’wen wi ario upodho.

⁷ Man Yeftha poko lembe mir Israel rundi abusiel. Yeftha ma Jagileadi ulund utho, man juyike i adhura acel mi Gilead.

Ibzan, Elon man Abdon Gipoko Lembe wi Israel

⁸ Man yo ng’eye Ibzan mi Beth-lehem upoko lembe i Israel.

⁹ Man ebedo ku wot pier adek; man nyir pier adek m’eoro kamange, man egamu nyir ma kamange pier adek ni wote. E epoko lembe i Israel oro abiro.

¹⁰ Man Ibzan utho, man juyike i Beth-lehem.

¹¹ Man yo ng’eye Elon ma Jazebuluni upoko lembe i Israel; man epoko lembe i Israel rundi apar.

¹² Man Elon ma Jazebuluni tho, man juyike i Aijalon i ng’om Zebulun.

¹³ Man yo ng’eye Abdon ma wod Hilel ma Japirathoni poko lembe i Israel.

¹⁴ Man ebedo ku wote pier ang’wen man wot wote pier adek, man giwotho ku wi nyithi kana pier abiro: man epoko lembe i Israel oro abora.

¹⁵ Man Abdon ma wod Hilel ma Japirathoni tho, man juyike i Pirathon i ng’om Efraim, i ng’om gudi mi Juamaleki.