Jupoklembe 11 - The Holy Bible In Alur (Lur) Revised Orthography

Yeftha Gonyo Israel kud i Cing’ Juamoni

¹ Nwang’u Yeftha ma Jagileadi en e ng’atu ma tek ma jakero, man en e wod dhaku ma won asara: man Gilead unyolo Yeftha.

² Man dhaku pa Gilead unyolo ire wote; man ka wot dhaku pare gidongo giriemo Yeftha woko, man giwacu ire kumae, Ibicamu pacu ngo i ot pa wegwa; kum in i wod dhaku mange.

³ E Yeftha ulund uringo utumin mire, man ebedo i ng’om mi Tob; man dhanu ma kitgi mbe gicokri ba Yeftha man giwok woko gikugi.

⁴ Man etimbre yo ng’eye, nia nyithindho mir Amon gitimo ali kud Israel.

⁵ Man ebedo kumeno, nia ka nyithindho mir Amon gitimo ali kud Israel, e judongo mi Gilead gicidho nigamu Yeftha kud i ng’om mi Tob;

⁶ man giwacu ni Yeftha kumae, Bin ibed jawiwa, kara wakied ku nyithindho mir Amon.

⁷ E Yeftha uwacu ni judongo mi Gilead kumae, Wudaga ngo, man wuriema ngo kud i ot pa vwa? man wubino i bang’a kawono nedi kinde ma wuni i cani?

⁸ Man judongo mi Gilead giwacu ni Yeftha kumae, Ka kumeno walokra kendo i beng’i kawono, kara wacidh wakudu, man wakiedu ku nyithindho mir Amon; man ibibedo jawiwa mi dhanu ceke mi Gilead.

⁹ Man Yeftha wacu ni judongo mi Gilead kumae, Tek wutera thuwa kendo kara wakied ku nyithindho mir Amon, man Yehova kethogi i wang’a, abibedo jawiwu?

¹⁰ E judongo mi Gilead giwacu ni Yeftha kumae, Yehova bibedo jamulembe i kindwa; andha wabitimo calku lembe peri.

¹¹ Yeftha lund ucidho karacelo ku judongo mi Gilead, man dhanu gikethe ni jawic ku rwoth i wigi: e Yeftha yero lembe pare ceke i wang’ Yehova i Mizpa.

¹² E Yeftha oro jukwenda bang’ ubimo mi nyithindho mir Amon, ewacu kumae, Lembang’o ma ni kindwa wakudi, m’uketho ibino i bang’a nikiedo ku ng’om para?

¹³ Man ubimo mi nyithindho mir Amon giloko lembe ni jukwenda pa Yeftha kumae, Kum Israel umayu ng’om para, kan eai kud i Misiri, ugambre Arnon cil kum Yabok, man kum Yordan: ka kumeno kawono dwok ng’om maeno kendo ma ali mbe.

¹⁴ E Yeftha uoro jukwenda kendo bang’ ubimo mi nyithindho mir Amon;

¹⁵ Man ewacu ire kumae, Yeftha wacu kumae: Israel umayu ng’om mi Moab ungo, kadi ng’om mi nyithindho mir Amon de ngo;

¹⁶ ento ka giidho kud i Misiri, man Israel ukadhu kud i yamba cil kum Nam Makwar, man gibino Kadec;

¹⁷ Israel ulund uoro jukwenda bang’ ubimo mir Edom, ewacu kumae, Akwei, wek akadh kud i ng’om peri; ento ubimo mir Edom uwinjo ngo. Man eoro jukwenda bang’ ubimo mi Moab de kumeca; ento eyio ngo: man Israel ubedo i Kadec.

¹⁸ Gilund gicidho kud i yamba, man gidhoko ng’om mir Edom, ku ng’om mi Moab, man gibino yor i ng’et ng’om mi Moab yo nyangu, man gigonjo yo loka Arnon; ento gimondo ngo i kieu mi Moab, kum Arnon en e kieu mi Moab.

¹⁹ Man Israel uoro jukwenda ba Sihon m’ubimo mi Juamori, m’ubimo mi Hecbon; e Israel uwacu ire kumae, Wakwei, wek wakadh kud i ng’om peri cil i kakara.

²⁰ Ento Sihon ugeno Israel ungo nia ekadh kud i kieu pare; ento Sihon ucoko dhanu pare ceke karacelo, man eguro hema egonjo i Yahaz, man ekiedo kud Israel.

²¹ Man Yehova, Mungu mir Israel, uketho Sihon, ku dhanu pare ceke i cing’ Israel, e gigoyogi: kum kumeno Israel umwonyo ng’om ceke mi Juamori, gi ju m’ubedo i ng’om maeno.

²² Man gimwonyo kieu ceke mi Juamori, ugambre i Arnon cil kum Yabok, man ugambre i yamba cil kum Yordan.

²³ Kum kumeno kawono Yehova, Mungu mir Israel, ekabu Juamori woko ku ba piny migi i wang’ dhanu pare Israel, man maku in icam pinje?

²⁴ Ibicamu maeno ngo ma Kemoc ma mungu peri mio iri icami? Kum kumeno ng’atu ma Yehova Mungu mwa kabu piny pare woko kud i bang’e i wang’wa, maeno wabicamu.

²⁵ Man kawono in i ber ma sagu Balak ma wod Zipor, m’ubimo mi Moab ku gin moko? epiembre kud Israel, kadi ekiedo kugi?

²⁶ Kinde ma Israel ubedo i Hecbon ku pacune de, man i Aroer ku pacune de, man i adhura ceke ma i ng’et Amon, rundi dak adek; wugamugi ngo nedi kendo i rundi maeca 7

²⁷ Ka kumeno adubo iri ngo, ento itimo rac m’ikelo ko lwiny i kuma: Yehova, ma Japoklembe, ubed japoklembe tin i kind nyithindho mir Israel ku nyithindho mir Amon.

²⁸ Ento ubimo mi nyithindho mir Amon uwinjo lembe pa Yeftha ngo m’eoro i bang’e.

²⁹ Tipo pa Yehova lund ubino wi Yeftha man ekadhu kud i Gilead ku Manase, man ekadhu kud i Mizpa mi Gilead ekadhu ba nyithindho mir Amon.

³⁰ Man Yeftha ung’olo lembang’ola ni Yehova, man ewacu kumae, Tek ibiketho nyithindho mir Amon i cinga andha,

³¹ ebilund bedo, nia gin ma tek uwok woko kud i dhugola mi ot para nirombo kuda, kan adwogo ku kwiocwiny ku ba nyithindho mir Amon, ebibedo pa Yehova, man abithiere malu ni lam m’awang’a.

³² Kum kumeno Yeftha kadhu lokaca ba nyithindho mir Amon nikiedo kugi; e Yehova kethogi i cinge.

³³ Man egoyogi ugambre Aroer cil m’iwok kum Minith, en e adhura pier ario, man kum Abelkeramim, ku nek ma dit apila. Kum kumeno juvoyo nyithindho mir Amon i wang’ nyithindho mir Israel.

Nyar Yeftha

³⁴ Man Yeftha dwogo Mizpa ba ot pare; man, nen, nyare wok woko nirombo kude kud umbukulumbu man ku miel: man en e nyathin pare kulong’; ebedo ku wode moko ngo kadi nyare ndhu e kende.

³⁵ Man etimbre, kan enene, nia eyeco kendi pare, man ewacu kumae, Akayo, nyara! ijwiga hai, man in acel m’i kind ju m’ung’abu cwinya; kum ayabu dhoga ni Yehova, man acopo dok cen ungo.

³⁶ Man ewacu ire kumae, Vwa, idaru yabu dhogi ni Yehova; tim ira calu gin m’uai kud i dhogi, kum Yehova culo kwor kum judegi peri piri en e kum nyithindho mir Amon.

³⁷ Man ewacu ni won kumae, Wek gin maeni timbre ira: wek abed akenda dwi ario, kara aai alor piny wi gudi, man aywag bedo para ma sumba, waku juwada.

³⁸ Man ewacu kumae, Cidhi. Man eore mi dwi ario: e ecidho, en ku juwagi, man eywagu bedo pare ma sumba wi gudi.

³⁹ Man etimbre ka dwi ario thum, nia edwogo ba won m’etimo i bang’e calku lembang’ola pare m’eng’olo: man nwang’u fodi eng’eyo co ngo. Man en e kura Israel,

⁴⁰ nia nyig Israel ucidho ku ba rundi kara gipoi kum nya Yeftha ma Jagileadi ceng’ ang’wen i rundi acel.