Jukolosai 4 - The Holy Bible In Alur (Lur) Revised Orthography

¹ Judongo, wumi ni jumiru mu gin m’umaku piny m’uromo kugi de; ma wung’eyo ko y a wun bende wutie ku Jadit i polo.

² Wubed kr kum rwo, ma wuki ko i ie ku foyofoc;

³ karacelo ku maeni wurwo iwa bende, kara Mungu yab iwa dhugola ni lembe, kara wayer giramung’a pa Kristu, ma an bende ani i kol pire;

⁴ kara anyuthe, calu emaku ya ayer.

⁵ Woth ku rieko yo ba ju ma woko, ma wubeng’iewo ko nindo.

⁶ Wek wec mu bed ku bero thiri thiri, ma kadu rome, kara wung’ei maram wulok ko lembe ni dhanu kubang’gi kubang’gi.

Moth M’edaru Ko

⁷ Lembe para ceke Tukiko biketho wung’eyo, ma en e umego ma jamer m’e jatim mandha man e jatic wakude i Rwoth:

⁸ m’aoro i beng’wu pi lembe maeni nini, kara wung’ei bedo mwa ma wabedo ko, man kara ejuk adundewu bende;

⁹ karacelo kud Onesimo, ma umego mandha ma jamer bende, ma en e ng’atu acel m’i kindwu. Gibiketho wung’ei gin ceke m’utimbre kuni.

¹⁰ Aristarko ma jakol wada umothowu, man Marko, ma wod nyamin Barnaba (ma wujolo lembang’ola pire; tek ewok i beng’wu, wujole),

¹¹ man Yesu ma julwong’o Yustu, ma gi weg yaa: joni kendgi e ma wa jutic mi ker pa Mungu wakugi, dhanu ma gibedo ira ni juk.

¹² Epafra, ma en e ng’atu acel m’i kindwu, m’e jamiru pa Yesu Kristu, emothowu, m’ebeii aiia thiri thiri piwu i rwo pare, kara wucung ndhu cu wung’ei andha de yeny ma Mungu yenyo ceke.

¹³ Kum anyutho pire, ya emule dit ku tic piwu, man pi ju ma i Laodikia, man pi ju ma ni i Hieropoli.

¹⁴ Luka, ma jakeikum ma jamer, giku Dema bende gimothowu.

¹⁵ Wumoth utumego ma gini i Laodikia, ku Numfa bende, man kanisa ma ni i ot migi.

¹⁶ Man tek judaru somo waraga maeni i kindwu, wuketh jusome i kanisa mi Julaodikia bende; man wun bende wusom waraga m’uai i Laodikia.

¹⁷ Wuwac ni Arkipo kumae, Dong’ iketh weng’i kum tic m’ijolo i Rwoth, kara itime kakare.

¹⁸ Moth para an a Paolo gira ku cinga. Wupoi pi kol para. Dong’ bero bed kudu.