Jukolosai 2 - The Holy Bible In Alur (Lur) Revised Orthography

¹ Kum ayenyo wung’ei maram aii ko aiia piwu, man pi ju ma Laodikia, man pi ju ma fodi gikuneno wang’a mi kum ungo;

² kara adundegi jukre, gi ju ma juribogi karacelo i mer, man ni lonyo ceke mi kwiocwiny ma pong’ mi ng’eyong’ec, kara ging’ei giramung’a pa Mungu, ma Kristu,

³ ma piny m’akana ceke mi rieko ku ng’eyong’ec de ubedo apana i ie.

⁴ Ayero maeni, kara ng’atu moko kud ubombwu ku lembacung’a mi wec.

⁵ Kum kadok ambe i beng’wu ku kum, endre wanuti wakudu i cwiny, ma mutoro benega kan abeneno bedo mu ma kakare, man ke cungo mi yioyic mu i Kristu.

⁶ Ka kumeno calu wudaru jolo Kristu Yesu ma Rwoth, e wuwoth i ie kumeno,

⁷ ma ulegwu nyang’ ma wugombru de i ie, ma wunyang’ i yioyic mu de, cil calu juponjowu, ma wusegru ko i foyofoc bende.

Pong’o Thur i Kristu

⁸ Wubed ku weng’wu kara ng’atu moko kud udwokwu ni jambayeki ku lembrieko pare man kud abombi mananu, tok lembkei mi dhanu, tok ponji ma kwong’a m’i ng’om, ma ku tok Kristu ngo:

⁹ kum Rucwic upong’ thur i ie ma ku kum,

¹⁰ man i ie wun de wupong’o thur, ma en e wi ker ku tego ceke:

¹¹ i ie de jutimo yaa i kumwu bende ku yaa ma jutimo ku cing’ ungo, i roc ma kum mi ring’kum roc ko, i yaa pa Kristu;

¹² ma judaru yikowu wukugi i baputisi, man juting’owu bende i ie wukugi ni kum yioyic i timotim pa Mungu, m’uting’e ku kind ju m’utho.

¹³ E wun, kinde ma nwang’u wuni i tho kum kier mu man kumwu ma jukutimo yaa i kume ngo, wun, awacu, edwokowu kwo karacelo kude, nwang’u eweko iwa kier mwa ceke;

¹⁴ nwang’u eruco lembagora mi cik m’utuco wiwa, m’eketho wang’e i kumwa: man ekabe cen kud i yo, m’egure ko kor yen m’athara ku musumali;

¹⁵ nwang’u enyotho ker ku tego de, eketho gibedo giranena ma ngbeng’, m’eloyogi ma gwei i ie.

Yenyo Gin ma ni Malu

¹⁶ Ka kumeno ng’atu moko kud upok lembe iwu kum giracama, kadi kum giramadha, kadi kum ceng’ agba kadi mi dwi ma por kadi ceng’ sabatu;

¹⁷ ma en e tipopiny mi gin ma bibino; endre kum en e pa Kristu.

¹⁸ Ng’atu moko kud umai giragama mi kwaya mu ku yeny ma ie yenyo mi molcwiny ku rwo ma ni malaika de, m’ebedo ndhu i gin m’eneno, m’etingre mananu kum pidoic mi kum,

¹⁹ m’emoko kr ngo kum Wie ma kum dho gamu gin m’ucope i bang’e, m’eribre de karacelo ni kum ujonje ku ler, ebenyai de ku nyai pa Mungu.

²⁰ Tek wutho ku Kristu ni ponji ma kwong’a m’i ng’om, nedi, wudong’ wumiru giwu ni lembapoka, calu ju ma gibedo i ng’om,

²¹ Kud wumaki, kadok abila de, kadok amula de

²² (gin ceke ma gibinyothri i tim), tok lembang’ola ku lemponji mi dhanu?

²³ Gin maeni bedo andha ni giranena mi rieko i rwo ma ijo maru, ku jwigri gijo, ku sendo kum: ento gin maeni kulokane mbe ma dhiro wi awanyakum.