Jufilipi 1 - The Holy Bible In Alur (Lur) Revised Orthography

Moth

¹ Paolo ku Timoteo, jumiru pa Kristu Yesu, ni jumaleng’ ceke i Kristu Yesu ma gini i Filipi, ku julieu man jukony:

² Bero iwu ku kwiocwiny m’uai ba Mungu ma Wegwa man Rwoth Yesu Kristu.

Kwayukwac pa Paolo pi Jukristu i Filipi

³ Afoyo Mungu para ku ba poi ceke m’apoi ko piwu,

⁴ thiri thiri ku ba kwac para ceke m’akwayu piwu kpo akwayu ku mutoro,

⁵ kum ribri mwa ma wakudu i rweyo lembanyong’a ma juboth ko ugambre i ceng’ ma kwong’a cil ku kawono de;

⁶ m’ageno ko gin maeni nini, nia ng’atu m’utheko tic ma ber i iwu ebidare cu cil i ceng’ pa Yesu Kristu:

⁷ cil calu ebedo cu ira ya ia pid piwu kewu ceke kumeno, kum wuni i adundena, kum, i kol para man i cungo kum lembanyong’a ma juboth ko ku ketho ebed ko tek de, wun ceke waribra wakudu i gamu bero.

⁸ Kum Mungu en e jamulembe para, maram ava wu ceke betima dit i kisa ma ng’ic pa Kristu Yesu.

⁹ Man aberwo, nia mer mu udkusagu asaga i ng’eyong’ec ku riu ceke;

¹⁰ kara wung’i gin ma ber ku gin ma rac de; kara wubed ma awondi mbe kudu ma kier de mbe kudu cil i ceng’ pa Kristu;

¹¹ ma nying’ bedopwe, ma ni kum Yesu Kristu, e m’uyeng’wu, ni dwong’ pa Mungu ku pak ma jupake ko.

Ira Bedo Kwo En e Kristu

¹² Nie ayenyo wung’ei, umego, nia giki m’uwok i kuma e etimbre nia lembanyong’a ma juboth ko urweire m’usagu ni kume;

¹³ uketho kol para ma ni kum Kristu unyuthre cil i kind jukur ceke p’ubimo, man ni ju m’udong’ ceke bende;

¹⁴ man nia umego kucel ma dit ma gini i Rwoth, ma ginwang’u tego ni kum kol para, gisagu ku tegocwinygi ku yero lembe pa Mungu ma lworo mbe i kumgi.

¹⁵ Andha jumoko giyero pi Kristu cil ku kumira ku por bende; jumoko ke ku berocwinygi bende:

¹⁶ ju maeni betime ni kum mer, ma ging’eyo ko nia juketha kara acung kum lembanyong’a ma juboth ko:

¹⁷ ento ju maeno giyero pi Kristu mir athube, ku cwinygi m’umbe abombi ngo, ma igi pido ya ginyai can i kuma i kol para.

¹⁸ Ka ke ang’o? mae kende nia i yo ceke, kadok kud abombi kadi ku lemandha, juyero pi Kristu; e i lembe nini anyong’a nega, eyo, man anyong’a binega.

¹⁹ Kum ang’eyo nia maeni bilokre ni both para, ni kum kwac ma wukwayu man ke ku kony pa Tipo Yesu Kristu,

²⁰ calku kur para ma ku cwinya ceke ku genogen para, kara lewic kud unega ni kum gin moko, ento nia ku tegocwiny ceke, calu ma thiri thiri, e kawono bende Kristu bidoko dwong’ ni kuma, kadok ku kwo, kadi ku tho.

²¹ Kum ira bedo kwo en e Kristu, tho ke en e kuloka.

²² Ento tek bedo kwo i kum, tek maeni en e nying’ tic para, ka kumeno makani m’afoyo ang’eyo ngo.

²³ Ento lembe bewira i kindgi gin ario, ma ava ai benega kara wabed waku Kristu; kum eni e ber ma sagu dit:

²⁴ ento bedo i kum piwu cande negowu ma sagu.

²⁵ E ku genogen maeni, ang’eyo nia abidong’, eyo, man wabibedo karacelo wakudu ceke, kara wucikusagu asaga wubed ku mutoro de i yioyic;

²⁶ kara kulula mu usagre i Kristu Yesu ni kuma kum bedo para m’i kindwu kendo.

²⁷ Mae kende wuwek bedo mu urom lembanyong’a ma juboth ko pa Kristu: kara, kadok abino man anenowu kadi ambe de, awinj piwu, ya wucungo ki ku cwinywu acel, ku pidoic de acel ma wubeii ko aiia kum yioyic mi lembanyong’a ma juboth ko;

²⁸ ma ndiri ng’oi i iwu ngo kum weg amone kum gin moko: maeni giranyutha ma ngbeng’ igi mi nyoth ma junyothri ko, ento mi both mu, m’uai ba Mungu;

²⁹ kum emire iwu ni kum Kristu, ya wuyie ayia kende ngo, endre ya wusendru pire bende:

³⁰ ma wubeii aiia calu ma wuneno i ia, man kawono bende wuwinjo nia eni i ia.