Juefeso 6 - The Holy Bible In Alur (Lur) Revised Orthography

¹ Nyithindho, wuwor junyodo mu i Rwoth: kum maeni en e cu.

² Yung wuru ku meru (maeni cik ma kwong’a ma ku lembang’ola),

³ kara ebed ber iri, man ibed hai de wi ng’om.

⁴ Man kendo, wu wego, kud wunyai ng’ecwiny i nyithindho mu: endre wutunggi i ponji man juk pa Rwoth.

⁵ Jumiru, wuwor judongo m’i wiwu ma ku kum, ku lworo man ku mielkum, kud adundewu m’ucungo acel, calu ni Kristu;

⁶ ku tic mi wang’ ungo, calu ma dhanu maru; ento calu jumiru pa Kristu, ma wubetimo kayeny pa Mungu ku i adundewu:

⁷ ma wubetimo ku morewinywu, calu ni Rwoth, ni dhanu ngo:

⁸ ma wung’eyo ko nia gin ma ber ma tek dhanu kubang’gi kubang’gi gitimo, e ebigamu gica kendo ba Rwoth, kadok en e ng’eca kadi paker.

⁹ Man ke, wu judongo, wutim igi wagi gin maeno, man kud wucim cim: ma wung’eyo ko ya ng’atu ma en e Jadit migi ku mu de ni i polo, man kud i bang’e dhanu tung’ tung’ ungo.

Jamtho pa Mungu Kpo

¹⁰ Aha a, wubed tek i Rwoth, man i tego mi tek pare.

¹¹ Wurony jamtho pa Mungu kpo, kara wucung ki ni rieko pa wonabali.

¹² Kum anyego mwa en e kum ring’kum ku rimo de ngo, endre kum ker, kum tego, kum jubim mi mudho mi ng’om maeni, kum udul tipo mi dubo i ka mi polo.

¹³ Kum kumeno ting’ jamtho pa Mungu kpo, kara wubin wucung kr i ceng’ maeni ma rac, man, ma wudaru timo ceke, wucungi.

¹⁴ Wucung kumeno, ma wudaru twio pierwu ku lemandha, man wudaru royo asi mi bedopwe,

¹⁵ ma wudaru royo girayika mi lembanyong’a ma juboth ko mi kwiocwiny i tiendwu;

¹⁶ karacelo ku maeni wuting’ thungu mi yioyic, ma wubicopo nego kudo lak athero mi mac ceke pa ng’atu ma rac.

¹⁷ Man wugam sabu mi both ma juboth ko, ku palamularu mi Tipo, ma en e lem pa Mungu:

¹⁸ ku rwo man kwayukwac ceke ma wuberwo ko ku ba nindo ceke i Tipo, ma wubekuro bang’e awe, ku kwayu kwac de pi jumaleng’ ceke,

¹⁹ man pira, kara wec umire ira i yabu dhoga, kara aketh jung’ei giramung’a mi lembanyong’a ma juboth ko ku tegocwiny,

²⁰ ma an a jadhulembe pire i nyoro; kara ayer ku tegocwiny i ie, calu ma maku ayer.

Moth M’edaru Ko

²¹ Ento kara wun bende wung’ei lembe para, maram abedo ko, Tukiko, m’umego ma jamer, man jatim mandha i Rwoth, ebiketho wung’ei gin ceke:

²² m’aore i beng’wu pi lembe maeni nini, kara wung’ei bedo mwa, man kara ejuk adundewu.

²³ Kwiocwiny ubed ba utumego, man mer ku yioyic, m’uai ba Mungu ma Wego ku Rwoth Yesu Kristu.

²⁴ Bero bed ba ju m’umaru Rwoth Yesu Kristu mwa ceke ku mer ma nyothre ngo.