Juefeso 5 - The Holy Bible In Alur (Lur) Revised Orthography

¹ Ka kumeno wubed jukwany ba Mungu, va nyithindho ma jumer;

² man wuwoth i mer, cil calu Kristu bende maruwa, man emire gire piwa, ni giramia ku lam de ni Mungu ni ng’wic gin ma ng’wi ng’ar.

³ Ento tarwang’, ku sasa ceke, ku kethocwiny hai kum piny, dong’ kud elwongre i kindwu ki, calu m’umaku jumaleng’;

⁴ kadok lemblewic, kadi sosiwec, kadi lele, m’umaku piny ungo: ento ma sagu re mio foyofoc.

⁵ Kum maeni wung’eyo andhandha, nia won tarwang’, kadok jasasa de, kadok ng’atu ma ketho cwinye hai kum piny, ma en e jarwo ma ni ayi gin ma acwia, umbe ku camupacu i ker pa Kristu ku pa Mungu.

⁶ Kud wuyi ng’atu moko wondwu ku lembe ma ie nanu: kum kwinyo pa Mungu wok wi wot juco ni kum gin maeni.

⁷ Ka kumeno kud wuribru karacelo kugi;

⁸ kum naka wun wu mudho, ento kawono dong’ wun wu der ni kum Rwoth: wuwoth pami nyithindho mi der

⁹ (kum nying’ der eni i berocwiny ceke man bedopwe ku lemandha de),

¹⁰ ma wubeponjo ya girang’o ma nyayu mutoro i Rwoth;

¹¹ man kud wuribru ki ku tic mi mudho ma cego nyinge ngo, ento ma sagu re wuketh ging’ei pi dubo migi;

¹² kum en e lewic niweco pi gin m’utimbre ni kumgi ling’.

¹³ Ento gin ceke ma tek juketho jung’eyo pi dubo enyuthre ni kum der: kum gin ceke m’unyuthre en e der.

¹⁴ Kum kumeno ewacu kumae, Dong’ iceu, in m’ibenindo, man iai i kind ju m’utho, man Kristu birieny i wii.

¹⁵ Ka kumeno wubed ku weng’wu maram wuwotho ko, calu ju ma jurieko ngo ngo, endre calu jurieko;

¹⁶ ma wubeng’iewo nindo, kum ceng’ gi rac.

¹⁷ Kum kumeno kud wubed jukusegu, ento dong’ wung’ei karamb yeny ma Rwoth uyenyo.

¹⁸ Man kud wumer ku pigulok, ma ie ju rop, ento dong’ Tipo re m’uromwu;

¹⁹ ma wubewecru ku lembwer man wer ku wer mi tipo de, ma wubewero man wubeketho ko badwal ma mit ku i adundewu ni Rwoth;

²⁰ ma wubemio ko foyofoc thiri thiri pi gin ceke i nying Rwoth mwa Yesu Kristu ni Mungu ma Wego.

Co ku Mongi

²¹ Ma wubekethru ko giwu ya wubed wor ni juwedu i lworo pa Kristu.

²² Mon, wubed wor ni cogwu ma dhe, calu ni Rwoth.

²³ Kum cwar dhaku en e wie ni dhaku, calu Kristu en e wie ni kanisa, ma en gife en e jalar mi kum.

²⁴ Ento calu kanisa bedo wor ni Kristu, e mon bende dong’ gibed kumeno ni coggi i gin ceke.

²⁵ Cogmon, wumar mondwu, cil calu Kristu bende maru kanisa, man emire gire pire;

²⁶ kara edwoke leng’, m’edaru lonye ku lwok mi pi ku lembe,

²⁷ kara ethier ire gire kanisa ma en e dwong’, ma poyo de mbe kadi bel de mbe kadok wagi gin ma kumeno de; ento kara ebed leng’ ma mulima de mbe.

²⁸ Cil kumeno maku cogmon bende gimar mondgi ma dhe calu kumgi gigi. Ng’atu m’umaru cege ma dhe nwang’u emare gire;

²⁹ kum ng’atu moko mbe m’udagu kume gire; ento etunge man egwoke, cil calu Kristu bende gwoko kanisa;

³⁰ kum wan wa wathkum mi kume.

³¹ Kum kum lembe nini ng’atu ma nico biweko won ku min, man ebimoko kum cege; man gin ario gibidoko kum acel.

³² Giramung’a maeni e dit; ento ayero pi Kristu man pi kanisa.

³³ Endre wun bende kubeng’wu kubeng’wu ng’atuman umar cege gire cil calu en gire; man dhakune bed ku wang’e m’elwor ko cware.