Juebrania 7 - The Holy Bible In Alur (Lur) Revised Orthography

Kurabedo Jalam pa Melkizedek

¹ Kum Melkizedek maeni, ubimo mi Salem, jalam pa Mungu ma Malu Ngbir, m’erombo kud Ibrahim nwang’u ebedwogo m’eai i nek mir ubimo man emio ire mugisa,

² ma Ibrahim upoko ire apaje mi gin ceke (ma en e ma kwong’a, ku lembaloka, Ubimo mi bedopwe, man ke Ubimo mi Salem, ma en e, Ubimo mi kwiocwiny;

³ m’umbe won, m’umbe min, m’umbe ku thekwaru, ma thek ma ceng’ thekre kudo mbe kude kadok kajik mi kwo de, ento judwoke calku Wod Mungu), m’ebedo jalam thiri thiri.

⁴ Nie dong’ iwu pid maram ng’atu maeni dit ko, ma Ibrahim, ma kwaru ma dit, umio ire apaje mi kum jambayeki ma cu.

⁵ Man gin nini ma gi kind wot Lawi ma gijolo tic pa jalam lembang’ola ni i bang’gi ma gigamu ko apaje mi dhanu calku cik, thelembene, mi jupagi, kadok joni giai i pier Ibrahim:

⁶ ento ng’atu ma thekwaru pare kwandre ngo m’eai ko i bang’gi egamu apaje bang’ Ibrahim, man emio mugisa ire m’e won lembang’ola.

⁷ Ento ma piembe mbe ng’atu ma nok unwang’u mugisa ba ng’atu m’usage.

⁸ Man kakeni dhanu ma tho jolo apaje; ento keca acel, ma junyutho pire ya ebedo kwo.

⁹ Man, calu eyere, ni kum Ibrahim cil Lawi de, m’ejolo apaje, ewodho apaje;

¹⁰ kum fodi eni i pier won, ka girombo giku Melkizedek.

¹¹ Nie tek dokocu ma ndhu nuti ni kum lamulam mi julam pa Lawi (kum dhanu gijolo cik ku the tije), nedi jalam mange wok kendo ma wagi pa Melkizedek, man ma jukwane ngo calu wagi pa Haruni?

¹² Kum lamulam mi julam lokre, e cik bende ukoulokre be.

¹³ Kum ng’atu ma gin maeni yere pire en e ng’atu m’i suru mange, ma ng’atu moko mbe i ie m’utimo tic mi pemblam.

¹⁴ Kum ebedo ngbeng’ nia Rwoth mwa ai kud i Yuda; ma Musa kuyero gin moko ngo pi julam mi surune.

¹⁵ Man gin ma wayero bedo ngbeng’ ma sagu dit apila tek jalam mange wok calu wagi pa Melkizedek,

¹⁶ ma judwoke jalam, i cik mi tego ma mi kum ungo, endre i tego mi kwo ma kajikne mbe:

¹⁷ kum junyutho pire kumae, In i jalam mi nja Calu wagi pa Melkizedek.

¹⁸ Kum juthiro lembang’ola ma kwong’a kum ng’ic pare man kum kuloka pare m’umbe

¹⁹ (kum cik dwoko gin moko cu ma ndhu ngo), man jukelo i wie genogen ma ber m’usagu, ma waeoro ceng’ni Mungu ni kume.

²⁰ Man kum kwong’o kwong’ umbe ngo

²¹ (kum gin andha judwokogi ni julam ma ku kwong’ ungo; ento en re ku kwong’ ni kum ng’atu m’eyero pire kumae, Rwoth ukwong’o man ebilokre gire ngo, In i jalam mi nja);

²² m’usagu bende Yesu doko mukwatu mi lembariba ma ber m’usagu.

²³ Man gin judwokogi julam ma dupa andha, kum ni kum tho gicopo bedo ngo:

²⁴ ento en, kum ebedo mi nja, ebedo ku lamulam pare mi julam ma lokre ngo.

²⁵ Kum kumeno bende ecopo bodho ju ma gicoro ceng’ni Mungu ndhu ma gwei ni kume, kum ebedo mi nja kara ekwai pigi.

²⁶ Kum jalam ma dit ma kumeni umaku wan, m’e leng’, m’umbe abombi, m’ecido ngo, m’ekoire ku judubo, ma judode malu ma sagu polo;

²⁷ can wodho lam ma ceng’ ku ceng’ unege ngo, calu julam ma dongo maeno, ma lar mio lam pi dubo pare gire, macen ke pi dubo mi dhanu: kum etimo maeni wang’ acel pii, kan ewodhre gire.

²⁸ Kum cik ketho dhanu gibed julam ma dongo ma gi ng’ic; ento lembe mi kwong’ m’uwok yo ng’ei cik, eketho Wod, ma judwoke cu ma ndhu mi nja.