Juebrania 13 - The Holy Bible In Alur (Lur) Revised Orthography

Tic M’uyire ni Mungu

¹ Wek mer mi utumego bed nuti asu.

² Wiwu kud uwil kum nyutho mer ni welo: kum ni kum maeno jumoko gwoko malaika ma jukung’eyo ngo.

³ Wupoi pi ju ma gini i kol, calu wubedo atwia wukugi; ju ma jutimogi rac de, calu wun giwu bende wuni i kum.

⁴ Wek gam ma jugambri ko bed ku yung i kind jo ceke, kavuto de kud ubed m’ecido: kum weg tarwang’ man weg gier Mungu bipoko lembe migi.

⁵ Bed agonya kum mer ma jumaru ko jukupiny; dong’ cwinywu cung kum wagi gin ma wubedo ko: kum en gire ewacu kumae, Abiweki ki ngo, kadok akuna de abikuni ki ngo.

⁶ Kum kumeno wawacu ku tegocwiny kumae, Rwoth en e jakonyna; abilworo ngo: Dhanu bitima nedi?

⁷ Wupoi pi ju m’ubimo wiwu, dhanu ma giyero iwu lem pa Mungu; man ka wubepido pi kajik mi kura bedo migi ma gibedo ko kwo, wukwany ba yioyic migi.

⁸ Yesu Kristu bedo calacel nyaworo ku tinuni, man rondo ku rondo de.

⁹ Kud wuyeiru ku ponji ma tung’ tung’ ma naka jukuwinjo pire ngo: kum e ber ya adunde cung ku bero; ku giracama ngo, ma ju ma giwotho i ie ginwang’u kuloka ngo.

¹⁰ Wabedo ku pemblam, ma ju ma rwo i hema gicopo camu maeno ngo.

¹¹ Kum kum mi lim maeno ma rimo migi julam ma dit ukelo i kamaleng’ pi dubo, juwang’u woko ku kagonjo.

¹² Kum kumeno Yesu bende, kara edwok dhanu leng’ ni kum rimbe gire, esendre woko dhugang’.

¹³ Ka kumeno dong’ wawoku woko i bang’e i ng’ei kagonjo, ma wayeyu ko cac pare.

¹⁴ Kum wabedo keni ngo kud adhura ma bedo, ento wayenyo adhura ma bibino.

¹⁵ Ka kumeno dong’ wawodh lam mi pak ni Mungu thiri thiri, lembene kumae, Nying’ mi dendhok ma watuco ko nyinge.

¹⁶ Ento wiwu kud uwil kum timo ber ku ribri de: kum lam ma kumeni nyayu mutoro i Mungu.

¹⁷ Wuwor ju ma gibimo wiwu, wumond igi de: kum gikuro kum ng’eyong’ec mu calu ju ma biwodho wel; kara gitim maeni ku mutoro, ku can re ngo: kum maeni kuloka ngo iwu.

¹⁸ Wurwo piwa: kum wageno andha nia wabedo ku pidocwiny ma ber, ma wabeyenyo wabed ko ber i gin ceke.

¹⁹ Man akwayuwu ma sagu dit apila ya wutim maeni, kara judwoka i beng’wu pio ma sagu.

Mugisa man Moth M’edaru Ko

²⁰ Nie Mungu mi kwiocwiny, m’ekelo jakwac ma dit mi rombe kendo m’ecer ku kind ju m’utho ni kum rimo mi lembariba mi nja, en e Rwoth mwa ma Yesu,

²¹ edwokwu cu ma ndhu i gin ceke ma ber kubang’gi kubang’gi kara wutim yeny ma ie yenyo, m’ebetimo i iwu gin ma nyayu mutoro i wang’e, ni kum Yesu Kristu; dwong’ ma nja ku nja ubed ire. Amen.

²² Ento akwayuwu, umego, wutwi cwinywu kum lem ponji: kum adaru goro iwu ku lembe ma nyanok.

²³ Wung’ei nia umegwa ma Timoteo jugonyo; ma tek ebino fodi nyanok, wabinenowu wakude karacelo.

²⁴ Wumoth ju ma gibimo wiwu ceke, ku jumaleng’ ceke. Ju ma Italia gimothowu.

²⁵ Dong’bero bed iwu kpo. Amen.