Juebrania 11 - The Holy Bible In Alur (Lur) Revised Orthography

Yioyic

¹ Nie yioyic en e gin ma ketho tego kum gin ma jugeno pire, en e tegocwiny mi gin ma fokunen ungo.

² Kum junyutho lembe ni judongo i maeni.

³ Ni kum yioyic wang’eyo nia ng’om ucwire ni kum lem pa Mungu, kum kumeno gin ma nen utimbre ngo kud i gin m’unyuthre.

⁴ Ni kum yioyic Habil u wodho lam ma ber hai ni Mungu m’usagu pa Kain, man ni kum maeno junyutho pire nia en e ng’atu ma bedo pare cungo pwe, Mungu nyutho nyuth pi giramia pare man ni kum maeno kadok etho fodi ebeyero.

⁵ Ni kum yioyic juting’o Enok kara kud enen tho; e junwang’e ngo, kum Mungu ting’e; kum junyutho pire ya ma fodi kating’ pare kutundo ngo pire nyayu mutoro i Mungu:

⁶ man ma yioyic umbe nyayu mutoro i ie copre ngo; kum ng’atu m’ubino ba Mungu maku ekoeyi be nia enuti, man e jamic mi ju ma giyenye.

⁷ Ni kum yioyic Noa, ma Mungu poye pi gin ma fodi jukuneno ngo, ma lworo ma ayi Mungu ni i kume nege, eyiko avur kara ebodh ot pare; ni kum maeni egonjo ng’om, man edoko jacampacu mi bedopwe ma en e calku yioyic.

⁸ Ni kum yioyic, ka julwong’o Ibrahim, eyio ecidh i ka m’ebijolo ni aba; man ecidho, m’eng’eyo ka m’ecidho i ie ngo.

⁹ Ni kum yioyic edoko umondo i ng’om mi lembang’ola, calu i ng’om ma pare gire ngo, m’ebedo ko i hema, gikud Isak man Yakobo, ma gi jucampacu, mi lembang’ola ma calacel karacelo gikude:

¹⁰ kum ekio adhura maeni m’ubedo ku kathere, ma jagomne ku jatimne en e Mungu.

¹¹ Ni kum yioyic cil Sara bende enwang’u tego m’enyolo ko nyodo ma nwang’u tego mi rundi pare kadhu, kum ekwanu ng’atu m’ung’olo lembe ya en e mandha:

¹² kum kumeno bende udul ma welne calu cero m’i polo, man calu kwio ma dhu nam, ma kwandre ngo, uai ba ng’atu acel man en de e calu avu.

¹³ Maeni ceke githo i yioyic, ma fodi gikujolo lembang’ola ngo, endre anena ginenogi amotha de gimothogi ku bor, ma gidaru tuco nia gin umondo man juwoth i ng’om.

¹⁴ Kum ju ma giyero wagi gin maeni ginyutho nia gibeyenyo kang’ora migi gigi.

¹⁵ Man andha tek gipido pi ng’om maeno ma giai i ie, kuno di kadok ma gidok ko wok igi.

¹⁶ Ento kawono ava ng’om ma ber m’usagu negogi, ma en e m’i polo: kum kumeno lewic unego Mungu ngo i kumgi, ma nia julwong’e Mungu migi; kum eyiko adhura igi.

¹⁷ Ni kum yioyic, Ibrahim uwodho Isak, nwang’u jumule; eyo ng’atu m’ujolo lembang’ola kud anyong’a ewodho wode kulong’;

¹⁸ ndhu ng’atu ma jung’olo ire kumae, Kodhini bilwongre ni kum Isak:

¹⁹ ekwanu ya Mungu copo ting’e, cil kud i tho ngi; kud i ie de ejole kendo calu i ayine.

²⁰ Ni kum yioyic Isak umio mugisa ni Yakobo man esau, cu pi gin ma bibino.

²¹ Ni kum yioyic Yakobo, kinde m’ebetho, emio mugisa ni wot Yusuf kubang’gi; man erwo, m’etiele atiela wi uluth pare.

²² Ni kum yioyic Yusuf, kinde ma kajik pare dhingo ceng’ni, eyero pi ai ma nyithindho pa Israel biai ko; man eng’olo lembe pi cogone.

²³ Ni kum yioyic, kinde ma junyolo Musa, junyodo pare gikane dwi adek, kum gineno nia en e nyathin ma ber; man lworo negogi ngo kum lembang’ola p’ubimo.

²⁴ Ni kum yioyic, ka Musa dongo, ekwero ku julwong’e wod Nyafarao;

²⁵ m’efoyo ya eribre karacelo ku dhanu pa Mungu i masendi, sagu ma tek ebedo k’anyong’a mi dubo nindo moko;

²⁶ m’ekwanu cac ma jucayu ko Kristu ni lonyo ma dwong’ ma sagu piny m’akana mi Misiri: kum eneno ba giramia mi sukulia.

²⁷ Ni kum yioyic eai i Misiri, ma lworo nege ngo kum kwinyo p’ubimo: kum eciro cir, calu m’ebeneno ng’atu ma nen ungo.

²⁸ Ni kum yioyic ekwiro kadhukuwijo, ku kiro rimo, kara janyoth mi kayu kud umul kumgi.

²⁹ Ni kum yioyic gikadhu kud i nam Makwar calu kud i ng’om m’uthwo: ma Jumisiri giponjo timo ci e gimwony.

³⁰ Ni kum yioyic gang’ mi Yeriko urwombre, yo ng’ei lwor ma gilwore ko ceng’ abiro.

³¹ Ni kum yioyic Rahab ma won asara tho ngo karacelo ku ju ma gicamu co, kum ejolo julib ku kwiocwiny.

³² E kan ayer ang’o kendo? kum nindo biromo ira ngo tek ayero pi Gideon, man Barak, man Samson, man Yeftha; man pi Daudi man Samwil ku pi jubila:

³³ ma ni kum yioyic ginyono ker mir ubimo, gitimo bedopwe, ginwang’u lembang’ola, gimio dhu umvor,

³⁴ gikwio wi tego mi mac, giboth ku lak palamularu, giai i ng’ic gidoko tek, gidoko jukero i ali, giriemo njuru asikari ma juwirok.

³⁵ Mon gijolo avu dhanu migi ni kum cer: man jumange jusendogi ku remokum, ma giyio both migi ngo; kara ginwang’ cer ma ber m’usagu:

³⁶ man jumange jumulogi ku cac ku goc ma lith de, eyo, mange ke mi uno ku kol;

³⁷ jucanyugi ku kidi, juthumo igi pu kud uligu, jubidhogi, junegogi ku palamularu: giwotho ku kendi mi lau rombe, ku mi lau diegi, gibedo jucan piny ma apila, gineno can, man jutimogi rac

³⁸ (gi ber ma ng’om maeni romo kugi ngo), man gibewotho rr i ng’om ngele, kud i kind gudi de, i odcana de, man i odng’om de.

³⁹ Man joni ceke, ma junyutho lembe pigi ni kum yioyic migi, gijolo lembang’olane ngo,

⁴⁰ kum Mungu ketho iwa gin ma ber m’usagu, kara ku gidok cu ma ndhu nge ku wan.