I Lemkei 18 - The Holy Bible In Alur (Lur) Revised Orthography

Ker pa Daudi Umedre

¹ Man yo ng’ei maeni etimbre, nia Daudi goyo Jufilisti, man enyonogi, e emaku Gath ku pacune kud i cing’ Jufilistine.

² Man egoyo Moab; e Jumoabi gidoko jutic pa Daudi man gikelo ajok.

³ Man Daudi goyo Hadarezer m’ubimo mi Zoba cil kum Hamath, kan ecidho nimwonyo ker pare ceng’ni kulo Frati.

⁴ E Daudi mayu magali rubanga acel i bang’e, man weg riuni rubanga abiro, man ju ma ku tiendgi rubanga pier ario; e Daudi tong’o ler riuni mi magali ceke, ento ecero kindgi ma romo magali dak acel.

⁵ E kinde ma Jucami mi Dameski gibino konyo Hadarezer m’ubimo mi Zoba, Daudi goyo kind Jucamine dhanu rubanga pier ario wi ario.

⁶ Daudi lund uketho otmatek mir ali i Cami mi Dameski; e Jucami gidoko jutic pa Daudi, man gikelo ajok. Man Yehova mio aloci ni Daudi ka ma tek ecidho ie ceke.

⁷ Man Daudi ting’o ban mi mola ma kwar ma gini i kum jutic pa Hadarezer, e ekelogi Yerusalem.

⁸ Man kud i Tibhath man kud i Kun, adhura pa Hadarezer, Daudi yaku mola ma dit apila, ma Suleman utimo kudo nam mi mola, ku mbegi, man agulu mi mola.

⁹ Man ka Tou m’ubimo mi Hamath uwinjo nia Daudi goyo udul ceke mi Hadarezer m’ubimo mi Zoba,

¹⁰ eoro Hadoram ma wode bang’ ubimo ma Daudi, kara emothe, man emi mugisa ire, kum ekiedo kum Hadarezer man egoye (kum Hadarezer ubedo kud ali ku Tou); man ebedo kud agulu ma kwonde tung’ tung’ ceke mi mola ma kwar ku mola ma tar man mi mola.

¹¹ Maeni bende ubimo ma Daudi thiero ni Yehova, karacelo ku mola ma tar man mola ma kwar m’eyaku ba thek ceke; kud i Edom, man kud i Moab, man ku ba nyithindho mir Amon, man ku ba Jufilisti, man ku bang’ Amalek.

¹² Mange ke Abicai ma wod Zeruia goyo kind Juedomi i Poga mi Kadu rubanga apar wi abora.

¹³ Man eketho otmatek mir ali i Edom; man Juedomi ceke gidoko jutic pa Daudi. E Yehova mio aloci ni Daudi i ka ceke ma tek ecidho i ie.

Judongo pa Daudi

¹⁴ Man Daudi camu ker wi Israel ceke; man etimo lembapoka ku bedopwe ni dhanu pare ceke.

¹⁵ Man Yoab ma wod Zeruia bedo wi udul; man Yehocafat ma wod Ahilud en e jagorlemkei;

¹⁶ man Zadok ma wod Ahitub, man Abimelek ma wod Abiathar, gi julam; man Cavca en e jagorcik;

¹⁷ man Benaya ma wod Yehoiada en e wi Jukerethi man Jupelethi; man wot Daudi gi judongo i vut ubimo.