Isaya 66 - The Holy Bible In Alur (Lur) Revised Orthography

Pokolembe pa Yehova man Mierolembe M’ubino ni Sayuni

¹ Yehova wacu kumae, Polo en e komker para, man ng’om en e dundpiny mi tienda: ot ma nedi ma wubigomo ira? man ka ma nedi ma bibedo kayom para?

² Kum gin maeni ceke cinga timo en, e kumeni gin maeni ceke wok, Yehova wacu: ento abineno ba ng’atu maeni, en e ba ng’atu ma jacan man mi cwiny mi lokri, man ma kume miel kum lembe para.

³ Ng’atu m’unego koni dhiang’ en e calu ng’atu m’unego dhanu; ng’atu m’ulamu nyathi rombo, calu ng’atu m’umino ng’ut gwok; ng’atu m’uthiero girathiera, calu ng’atu m’uthiero rimb kul; ng’atu m’uwang’u udok ma ng’wice ng’ar, calu ng’atu m’umio mugisa ni mungu m’araga. Eyo, gifoyo yo migi gigi, man anyong’a nego ng’eyong’ec migi kum ginmajudagu migi:

⁴ an bende abifoyo abombi migi, man abikelo lworo migi i wigi; kum kinde m’alwong’o, ng’atu moko mbe m’uloko lembe; kinde m’aweco, giwinjo ngo: ento gitimo gin m’ubedo rac i wang’a, man gifoyo gin ma anyong’a nega i kume ngo.

⁵ Winj lembe pa Yehova, wun ma kumwu miel kum lembe pare: Utumegwu m’udaguwu, m’ubayuwu ni kum nyinga, giwacu kumae, Wek juyung Yehova, kara wanen mutoro mu; ento en e gin e ma jubinyayu lewic i wigi.

⁶ Dwal mi yakni kud i adhura, dwal kud i hekalu, dwand Yehova m’uculo kwor kum judegine.

⁷ Ma fok’esendre ngo, enyol; ma fodi remokum pare kuwok ungo, enyolo nyathin ma nico.

⁸ Ng’a m’uwinjo wagi ginduni? ng’a m’uneno wagi ginduni? Jubinyolo ng’om i ceng’ aceli? jubinyolo thek wang’ aceli? kum kinde ma Sayuni sendre, enyolo nyithindhe.

⁹ Abikelo ba nyol, man abiketho junyol ungo? Yehova wacu: an m’aketho junyol abiciko ici? Mungu peri wacu.

¹⁰ Anyong’a negwu karacelo ku Yerusalem, man anyong’a negwu pire, wun ceke ma wumare: anyong’a negwu ku mutoro karacelo kude, wun ceke ma wuywage;

¹¹ kara wudhoth man wuyeng’ ku thuno mi juk pare; kara wung’iedh, man anyong’a negwu kum dit mi dwong’ pare.

¹² Kum Yehova wacu kumae, Nen, abicoro kwiocwiny i bang’e calu kulo ma dit, man dwong’ mi thek calu kulo m’upong’: e wubidhodho kume; jubiting’owu wi dir, man jubithorowu wi cong.

¹³ Calu ng’atu ma min juko, e abijukowu kumeca; e wubibedo ajuka i Yerusalem.

¹⁴ E wubineno maeni, man anyong’a binego adundewu, cogowu de biloth calu lum ma numu: man cing’ Yehova bing’eire yo ba jutic pare; man kwinyo binege kum judegine.

¹⁵ Kum, nen, Yehova bibino ku mac, man magali pare bibedo calu atido; kara ecul ng’ecwiny pare ku kwinyo, man juk pare ku lebmac.

¹⁶ Kum Yehova bitimo lembapoka wi weg kum ceke, ku mac man ku palamularu pare; man ju ma junego pa Yehova bibedo dupa.

¹⁷ Ju m’udwokri gigi leng’ man m’ulonjri kara gicidh ba pothi, i ng’ei yen acel i diere, m’ebecamu ring’ kul, ku ginmajudagu, man uyo, gibijik karacelo, Yehova wacu.

¹⁸ Kum ang’eyo tic migi ku pidoic migi: nindo bino, m’abicoko ie thek ceke ku leb ceke; e gibibino, man gibineno dwong’ para.

¹⁹ E abiketho giranyiitha i kindgi, man abioro wadi ju m’uboth m’i kindgi ba thek, ba Tarcic, ku Pul, man Lud, ma kilo atum, ba Tubal, man Yavan, ba cula bor cen, ma fod uwinjo pira ngo, kadok dwong’ para de gineno ngo; man gibiyero pi dwong’ para kind thek.

²⁰ E gibikelo utumegwu ceke kud i thek ceke ni girathiera ni Yehova, wi riuni, man i magali, man i Icipoi, man wi kana, man wi ngamia, ba got para ma leng’ Yerusalem. Yehova wacu, calu nyithindho mir Israel ukelo girathiera migi i agulu ma leng’ i ot pa Yehova.

²¹ Man kindgi bende abigamu ubed julam man Julawi, Yehova wacu.

²² Kum calu polo ma nyen ku ng’om ma nyen, m’abicwio, bidong’ i wang’a, Yehova wacu, e kodhiwu man nyingwu bidong’ kumeca.

²³ Man ebitimbre, nia ugambre kum dwi ma por acel cil kum mange, man ugambre kum sabatu acel cil kum mange, weg kum ceke bibino rwo i wang’a, Yehova wacu.

²⁴ E gibiwok woko, man gibineno wi avu dhanu m’udubo ira: kum ukoko migi bitho ngo, kadok mac migi de binegre ngo; man gibibedo ni ginmajudagu ni weg kum ceke.