Isaya 58 - The Holy Bible In Alur (Lur) Revised Orthography

Yo M’atiya pi Kwiro Cam

¹ Kok ma tek, kud ikwer, ting’ dwendi calu agwara, man iyer ni dhanu para pi gondri migi, man ni ot pa Yakobo pi dubo migi.

² Ento giyenya ku ba rupiny ku ba rupiny, man anyong’a negogi kum ng’eyo yo para: calu thek ma timo bedopwe, man m’uweko lembapoka pa Mungu migi ngo, gipenjo lembapoka ma pwe i bang’a; anyong’a negogi kum eoro ceng’ni Mungu.

³ Nedi wakwiro cam man ineno ngo? giwacu; nedi wasendo ng’eyong’ec mwa, man iparu pire ngo? Nen, i ceng’ mi kwirocam mu wunwang’u anyong’a mu ma dhe, man wusendo jutic mu ceke.

⁴ Nen, wukwiro cam mi yakni ku piem, man kara wugoi kud adhong mi dubo: wukwiro cam i ceng’ maeni ngo kara wuketh dwendwu winjre malu.

⁵ Afoyo wadi kwirocam maeno? en e ceng’ ma ni dhanu ya esend ie ng’eyong’ec pare? En e mi kulo wie calu usi, man mi pedho gonia ku vuru i there? ibilwong’o maeni kwirocam, man ceng’ ma jukwiro ni Yehova?

⁶ Kwirocam m’afoyo e eni ngo: ya jugony twic mi dubo, jugony twic mi mberembere, man jugony ju ma jusendogi, man nia jutur mberembere ceke kubang’e kubang’e?

⁷ En e nia jupok kwen peri ni ju ma kec unegogi ngo, man nia ikel jucan ma jubayu i ot peri? kinde m’ineno ng’atu ma muneru, ya iume; man nia kud ipond ni juot peri ma dhe?

⁸ E der peri bilund dhenjre calu rupiny, man cang peri biwodhre pio; bedopwe peri de bicidho i weng’i; dwong’ pa Yehova bibedo ni jamgwok i ng’ei.

⁹ Ibilund lwong’o, e Yehova biloko lembe; ibiywak, e ebiwacu kumae, Anuti. Tek ikabu mberembere cen kud i kindi, ku rieyo lwet, man yero rac;

¹⁰ man tek imio gin ma ng’eyong’ec peri yenyo ni ju ma kec unegogi, man iyeng’o ng’eyong’ec ma jusendo: e der peri bilund yabre i mudho, man paru pi jo ngo peri bibedo calu dieceng’;

¹¹ e Yehova bitelo wii thiri thiri, man ebikwio ng’eyong’ec peri i ka m’uthwo, man ebidwoko cogoni tek; e ibibedo calu podho ma jukwoyo pi i wie, man calu kulo mi pi, ma pige dwono ngo.

¹² Man ju ma gi nyikwei gibigomo kar uvuru ma con; ibiting’o thepiny ni dhanum’utuk dupa; man jubilwong’i kumae, Jayik ka m’utur, man, Jadwok yo mi bedo i ie.

Woro mi Ceng’ Sabatu

¹³ Tek iloko tiendi cen ku ba sabatu, ku ba timo gin ma nyayu mutoro i ii ceng’ ma leng’ para; man ilwong’ ceng’ sabatu anyong’a, man leng’ pa Yehova dwong’; man ibiyunge, m’itimo yo peri giri ngo, kadi m’inwang’u mutoro peri giri ngo, kadi m’iweco lembe peri giri ngo:

¹⁴ ibilund ketho anyong’a negi ni kum Yehova; man abiketho iwotho ku ka ma malu m’i ng’om; man abikeki kud aba pa Yakobo ma kwaru: kum dhu Yehova yero maeni.