Isaya 46 - The Holy Bible In Alur (Lur) Revised Orthography

¹ Bel urum piny, Nebo gung’; mungu m’araga migi ni wi lim mi ter, man wi lim: gin ma wuyeyo mberembere doko ni ter, ter ni lim m’uol.

² Gigung’, girum piny karacelo; gicopo wodho terne ngo, ento gin gigi gicidho i ng’eca.

³ Wuwinja, E ot pa Yakobo, ku dong ot mir Israel ceke, m’ayeyogi ugambre kum nyol migi, m’ayeyo ugambre kud i ic;

⁴ man cil kum tio an a en, man abiyeyowu cil kum lwar: atimo, man abiyeyo; eyo, abiyeyo, man abibodho.

⁵ Wubipora ku ng’a, man wubiketha rom ku ng’a, wubipora ku ng’a, kara wabed calcali?

⁶ Wadi ju ma lalu mola ma kwar kud i usau, man ma poro mola ma tar i mukero, gigamu jabodho mi mola ma kwar ku sukulia, e etimo ni mungu; gipodho piny, eyo, girwo.

⁷ Giting’e wi gok, giyeye, man gikethe kakare, e ecungo; eai ungo kud i kakare: eyo, ng’atu moko copo ywak i bang’e, ento ecopo loko lembe ngo, kadi bodhe kud i can pare.

⁸ Wupoi kum maeni, man wunyuthru giwu ya wu dhanu; wupoi pire kendo, E wu weg gondri.

⁹ Wupoi kum gin ma kwong’a ma con: kum an a Mungu, man ng’atu mange mbe; an a Mungu, man ng’atu mange mbe ma calu an;

¹⁰ m’ubeyero kajik ugambre i thekri, man ugambre i nindo ma con gin ma fod’utimbre ngo; m’awacu kumae, Lembapora para bicungo, man abitimo gin m’amaru ceke;

¹¹ m’alwong’o ko winyo ma kwiny ku yo nyangu, ng’atu mi lembapora para kud i ng’om ma bor; eyo, ayero, abiketho etimbre bende; akeco, abitime bende.

¹² Wuwinja, wu ju ma cwinywu tek, ma wu bor ku bedopwe:

¹³ akelo bedopwe para ceng’ni, ebibedo bor ungo, man both para bigalu ngo; man abiketho both i Sayuni ni Israel ma dwong’ para.