Isaya 34 - The Holy Bible In Alur (Lur) Revised Orthography

Kwinyo pa Mungu wi Thek man wi Edom

¹ Wubin ceng’ni, wu thek, kara wuwinji; man wuwinji, wu kodhidhanu: wek ng’om uwinji, kupong’ne; ng’om, ku gin ceke m’uai i bang’e.

² Kum ng’ecwiny unego Yehova kum thek ceke, man kwinyo kum udul migi ceke: enyothogi kot, emiogi mi nek.

³ Dhanu migi ma junego bende jubibayu woko, e ng’wic avujgi bidhenjre malu: man gudi bileny ku rimbgi.

⁴ Man udul ceke m’i polo biloi, e polo bidole calu mukeka; man udul migi ceke birwinyo woko, calu ith yendulok ner, man calu ith yendubolo ner.

⁵ Kum palamularu para madhu m’uyeng’e i polo: nen, ebiloro piny wi Edom, man wi dhanu mi kwong’ para, i pokolembe.

⁶ Palamularu pa Yehova pong’ ku rimo, judwoke m’eleny ku mio, ku rimo mi nyithi rombe ku diegi, ku mio mi rong’ni mi nyogi rombe; kum Yehova bedo ku lam i Bozra, ku nek ma dit i ng’om Edom.

⁷ Man koni dhiang’ mi thim biloro piny kugi, man thwoni dhiang’ m’aradu ku thwoni dhiang’: e ng’om migi bimer ku rimo, man jubilenyo utur migi ku mio.

⁸ Kum ceng’ mi culokwor pa Yehova nuti, man rundi mi cul kum lembe mi Sayuni.

⁹ E kulo mir Edom bilokre ni udok, man uturne ni muganga, e ng’ombe bidoko ni udok ma wang’.

¹⁰ Jubinege ngo ku diewor kadi ku dieceng’; yirone biwinjre malu mi nja; ugambre kum dhanum’utuk cil kum dhanum’utuk ebibedo ni uvuru; ng’atu moko mbe ma bikadhu kud i ie rondo ku rondo.

¹¹ Ento mambatha ku ceu bimwonye; man udo kud upa bibedo i ie: man ebiciko thol mir ang’abacwiny i wie, man jamgom mi gin ma ie nanu.

¹² Gibilwong’o weg yungne ba ker, ento moko mbe ma bibedo keca; e judongomawijone ceke bibedo calu gin moko ngo.

¹³ Ukudho bidongo i udikeme, ayilayila kud ucok ke i ot ma tekne; man ebibedo kabedo mir utho, lelagang’ mi udo.

¹⁴ E yedi m’i langa birombo kud urudi, man diel m’i thim biywak ba wadi; eyo, yedi mi diewor bibedo kuca, man ebinwang’u ire kayom.

¹⁵ Uting’kwodo bitimo ode keca, man ebinyol, ebialu de, e ebicoko the tipone; eyo, man acei, bicokri keca, kubang’gi kubang’gi ma vonge ku ma wode.

¹⁶ Wuyeny ku i kitabu pa Yehova, e wusom: acel de mbe i kind maeni ma bibedo mbe, ma vonge moko mbe ma bibedo ku ma wode ngo; kum dhoga, eng’olo, man Tipo pare, ecokogi.

¹⁷ Man ebolo gagi pigi, e cinge poko maeni i bang’gi ku thol: gibimwonye mi nja; ugambre kum dhanum’utuk cil kum dhanum’utuk gibibedo i ie.