Isaya 28 - The Holy Bible In Alur (Lur) Revised Orthography

Cim ni Efraim

¹ Can ni jamkermiwic mi kuhaya mi ju m’umer ku kong’o mir Efraim, man ni thiuboko m’uner mi bero pare mi dwong’, man ni wi wie mi poga ma mio mi ju ma pigulok uvoyogi mire ma!

² Nen, Rwoth ubedo ku ng’atu ma tek ma jarukara de; calu wavuvu mi pei, atido ma nyotho, calu wavuvu mi pi ma dit m’ucore, ebiredho piny i ng’om ku cing’.

³ Jamkermiwic mi kuhaya mi ju m’umer ku kong’o mir Efraim jubinyono the tielo:

⁴ e thiuboko m’uner mi bero pare mi dwong’, ma ni i wie mi poga ma mio, bibedo calu nying ubolo m’ular ucek ma fodi nindo mi lietho kuwok ungo; ma kinde ma ng’atu m’uneno wie neno, kinde ma fodi eni cinge ecame.

⁵ I ceng’ maeca Yehova mir udul bidoko ni jamkermiwic mi dwong’, man giratwiamiwic mi bero, ni dong’ dhanu pare m’udong’;

⁶ man tipo mi poko lembe ni ng’atu m’ujany i pokolembe, man tego ni ju m’uloko ali cen ku i dhugang’.

Cim ku Lembang’ola ni Yerusalem

⁷ E cil maeni giwiri ku pigulok, man gicidho bik bik ku giramadha ma lake tek; jalam ku jabila giwiri ku giramadha ma lake tek, e pigulok umwonyogi, man gicidho bik bik ku giramadha ma lake tek; gikier i ginmawokiwang’, gikier i pokolembe.

⁸ Kum mesa ceke pong’ ku ng’ok man cilo, ketho kamoko mbe m’ubedo leng’.

⁹ Ebiponjo ng’a ku ng’ eyong’eci? man ebiketho ng’a ng’ei lemkwenda? ju ma jukwiro ku cak, ma juwodhogi de ku ba thuno?

¹⁰ Kum en e lemponji wi lemponji, lemponji wi lemponji; wang’lembe wi wang’lembe, wang’lembe wi wang’lembe; keni nyanok, keca nyanok.

¹¹ Ungo, ento ebiweco ni dhanu maeni ku dhanu mi dendhok mi juwirok man ku leb mange;

¹² m’ewacu igi kumae, Maeni yom, wumi yom ni ng’atu m’uol; man maeni en e dwokocwiny; ento giyenyo ngo giwinji.

¹³ Ka kumeno lembe pa Yehova bibedo igi lemponji wi lemponji, lemponji wi lemponji; wang’lembe wi wang’lembe, wang’lembe wi wang’lembe; keni nyanok, keca nyanok; kara gicidhi, man gipodh ataru, man gitur, jumakgi de, man juyakgi.

¹⁴ Kum kumeno wuwinj lembe pa Yehova, wu jucac, m’ubimo dhanu maeni ma ni i Yerusalem:

¹⁵ Kum wuwacu kumae, Watimo lembariba ku tho, man waripo lembe ku liel; kinde ma goc m’ucore bikadhu kud i ie, ebiwok i kumwa ngo; kum waketho ndra ni kapondo mwa, man wapondo the lemndra:

¹⁶ ka kumeno Rwoth Yehova wacu kumae, Nen, aketho kidi i Sayuni ni thepiny, kidi ma juponjo, kidi ma wi gui ma pire tek mi thepiny ma tek: ng’atu m’uyio bibedo vur vur ungo.

¹⁷ Man abiketho pokolembe ni thol, man bedopwe ni jamtir; man pei biyweyo kapondo mi ndra cen, e pi bimwonyo kapondo.

¹⁸ E lembariba mu ma ku tho jubithiro, man lembariba mu ma ku liel bicungo ngo; kinde ma goc m’ucore bikadhu, e jubilund nyonowu piny kude.

¹⁹ Ku ba nindo ceke m’ekadhu i ie, ebigamuwu; kum ku ba rupiny ku ba rupiny ebikadhu, ku dieceng’ man ku diewor: man ebibedo gin moko ngo ndhu ndiri mi winjo rwonglembe

²⁰ Kum kavuto e cek ma sagu ma dhanu copo rieire gire i wie, man girauma diny ma sagu m’ecopo umbre kudo.

²¹ Kum Yehova biai malu calu wi got Perazim, kwinyo binege calu i poga mi Gibeon; kara etim tic pare, tic pare ma tung’, man kara eketh tic pare timbre kakare, tic pare ma tung’.

²² Ka kumeno kawono kud wubed jucac, jumaru dwoko twic mu tek; kum awinjo lembang’ola mi nyoth m’uai ba Rwoth, Yehova mir udul, wi ng’om ngung’.

²³ Wucik ithwu, man wuwinj dwanda; wucik ithwu, man wuwinj wec para.

²⁴ Ng’atu m’ufuro fur mi kodhi efuro fur thiri thiri? eyabu man eloko ng’om pare thiri thiri?

²⁵ Kinde m’eyiko wang’e, ecoyo atingli, man eketho landi, man eketho nganu i wang’ng’om, man nganu ma tung’ i kaka ma juketho, ku nganu ma boco de i kieune?

²⁶ Kum Mungu pare ponje atira, man etwinye.

²⁷ Kum jufodo atingli ku jamfodo ma bith ungo, kadok ukobre mi magali de juloko wi landi ngo; ento atingli jufodo kud uluth, man landi ke ku dul.

²⁸ Cam mi kwen jurego; kum ebibefode nja ngo: man kadok ukobre mi magali pare ku riuni pare gikethe, erege ngo.

²⁹ Maeni bende ai ku ba Yehova mir udul, m’ewang’u ijo i lembapora, man m’e ber hai i rieko.