Isaya 2 - The Holy Bible In Alur (Lur) Revised Orthography

Bim mi Kwiocwiny pa Yehova wi Thek Ceke

¹ Lembe ma Isaya ma wod Amoz uneno pi Yuda ku Yerusalem.

² Man ebitimbre i nindo ma cen, nia got mi ot pa Yehova bicungo wi usimbru gudi, man jubidode wi ungulu gudi; e thek ceke bicidho i bang’e.

³ Man kodhidhanu dupa bicidho man gibiwacu kumae, Wubin, man wek waidhu ba got pa Yehova, ba ot pa Mungu pa Yakobo; e ebiponjowa ku yo pare, man wabiwotho i yo pare: kum cik biwok kud i Sayuni, man lembe pa Yehova kud i Yerusalem.

⁴ Man ebipoko lembe i kind thek, e ebing’olo lembe pi kodhidhanu dupa; man gibithiedho palamularu migi ni kwejdhiang’, man tong’ migi ni uligu mi lwero piny; thek biting’o palamularu ngo kum thek, kadok lwiny de gibiponjo kendo ngo.

Pokolembe pa Yehova wi Jukuhaya

⁵ E ot pa Yakobo, wubin, man wek wawothu i der pa Yehova.

⁶ Kum ikuno dhanu peri ma ot pa Yakobo, kum gipong’ ku kura m’uai yo nyangu, man gin ajoga calu Julilisti, man gigoyo cing’ ku nyithindho mi juwirok.

⁷ Man ng’om migi pong’ ku mola ma tar man mola ma kwar, kadi kajik moko de mbe mi piny m’akana migi; ng’om migi bende pong’ ku riuni, kadi kajik moko de mbe mi magali migi.

⁸ Ng’om migi bende pong’ ku mungu m’araga; girwo ni tic m’i cing’gi gigi, gin ma cing’gi timo en.

⁹ E ng’atu ma ng’ic ugung’ piny, man ng’atu ma dwong’ ujwigre gire: ka kumeno kud iwek lem migi woko.

¹⁰ Mond i cana, man ipond i utur, kud i wang’ ndiri pa Yehova, man ni der mi dwong’ pare.

¹¹ Jubijwigo wang’ mi tingri mi dhanu, man jubinyono kuhaya mi dhanu, e jubidodo Yehova kende i ceng’ maeca.

¹² Kum ceng’ pa Yehova mir udul bibedo nuti wi jukuhaya ceke, man wi ju ma wigi pek ceke, man wi dhanu ceke m’utingri; e jubinyone piny;

¹³ Man wi musonge ceke mi Lebanon, ma gi boco gitingri malu de, man wi bongu ceke mi Bacan,

¹⁴ man wi gudi ma wiu ceke, man wi ungulu gudi ceke m’utingre malu,

¹⁵ man wi odkur ceke ma wiu kubang’e kubang’e, man wi gang’kidi ceke ma judwoko tek kubang’e kubang’e,

¹⁶ man wi combo mi Tarcic ceke, man wi gin ceke ma juketho cwiny i kume.

¹⁷ Man jubijwigo tingri mi dhanu piny, man jubijwigo kuhaya mi dhanu; e jubidodo Yehova kende i ceng’ maeca.

¹⁸ E mungu m’araga bikadhu woko pet.

¹⁹ Man dhanu bicidho i odcana, man i odng’om, kud i wang’ ndiri pa Yehova, man ni der mi dwong’ pare, kinde m’eai kara eyeng ng’om gbe gbe.

²⁰ I ceng’ maeca dhanu bibayu mungu m’araga migi mi mola ma tar, man mungu m’araga migi mi mola ma kwar, ma jutimo kara girwo i bang’gi, ni vuyu man ni ulic;

²¹ kara gicidh i odcana, man i kind cana m’ukak kud i wang’ ndiri pa Yehova, man ni der mi dwong’ pare, kinde m’eai kara eyeng ng’om gbe gbe.

²² Wuwek dhanu, ma yuyo pare ni i odiume; kum jukwane ni gin moko ni kum ang’o?