Isaya 1 - The Holy Bible In Alur (Lur) Revised Orthography

Ker mi Gondri

¹ Ginmawokiwang’ pa Isaya ma wod Amoz, m’eneno pi Yuda ku Yerusalem, i nindo pa Uzia, ku Yotham, man Ahaz, ku Hezekia, ma gin ubimo mi Yuda.

² Wuwinji, E polo, man icik ithi, E ng’om; kum Yehova yero kumae: Agwoko man atungo nyithindho, e gijai ira.

³ Koni dhiang’ ung’eyo won, man kana ng’eyo dero pa won; ento Israel ung’eyo ngo, dhanu para pido lembe ngo.

⁴ A thek mi dubo, dhanu ma kier unurogi, kodhi mi jutim rac, nyithindho m’utimo gin mi nyoth mire! giweko Yehova, gicayu Ng’atu Maleng’ mir Israel, gikoc man gicoro cen.

⁵ Wuyenyo jugoiwu asu nedi, ketho wujai kendo kendo? wie dho lith, man adunde dho voc.

⁶ Ugambre i die tielo cil kum wie ubedo bo moko mbe i ie; ento lero, man wil, ku wang’goc ma nyen: jumwono wang’gi ngo, kadi jutwiogi de ngo, kadi juyomogi ku mo de ngo.

⁷ Ng’om mu bedo ni uvuru; adhura mu juwang’u ku mac; ng’om mu, juwirok ucame i vutwu, man ebedo ni uvuru, calu juwirok ung’ielo gin.

⁸ Man Nyasayuni juweko calu odkur i podho mir ulok, calu odkur i podho mir ukuju, calu adhura ma jutieko kud ali.

⁹ Tek Yehova mir udul kuweko iwa nyathi dong’ dhanu moko ngo, kuno di wabedo calu Sodoma, kuno di wabedo calu Gomora.

Lwong’o mi Lokri Mandha

¹⁰ Wuwinj lembe pa Yehova, wu jubim mi Sodoma; wucik ithwu kum cik pa Mungu mwa, wu dhanu mi Gomora.

¹¹ Udul lam mu en e ang’o ira? Yehova wacu: lam m’awang’a mi nyogi rombe, ku mio mi lim ma jukakugi ku cam uroma; man anyong’a nega ngo kum rim thwoni dhiang’, kadi mi nyithi rombe, kadi mi nyogi diegi.

¹² Kinde ma wubino nyuthru i wang’a, ng’a m’ulwong’o maeni i cingwu, ma nia wunyon lelagang’ para?

¹³ Kud wukel lam ma ie nanu kendo; udok ma ng’wice ng’ar en e ginmajudagu ira; dwi ma por ku sabatu, man lwong’o mi cokri, acopo kude ngo: en e kier, cil cokri mi rwo.

¹⁴ Dwi ma por mu man agba mu ma juketho ng’eyong’ec para dagu; gi gin mir ang’abacwiny ira; aol ku cirogi.

¹⁵ Man kinde ma wuthang’u cingwu, abipanu wang’a iwu; eyo, kinde ma wutimo rwo dupa, abiwinjo ngo: cingwu pong’ ku rimo.

¹⁶ Wujom, wudwokru leng’; wukab dubo mi giratima mu cen kud i nyim wang’a; wuwek timo rac;

¹⁷ wuponj ng’eyo timo ber; wuyeny pokolembe, wukony ju ma jusendo, wupok lembe mi kic, wucung kum dhaku ma cware tho.

¹⁸ Wubin kawono, man wek waporu lembe karacelo, Yehova wacu: kadok dubo mu bedo kwar ngbo, gibibedo tar calu pei; kadok gi kwar calu rimo, gibibedo calu yuk rombe.

¹⁹ Tek wuwinjo man wuworo, wubicamu gin ma ber m’i ng’om:

²⁰ ento tek wukwero man wujai, palamularu bicamuwu kum dhu Yehova yero maeni.

Pokolembe man War mi Sayuni

²¹ Adhura mandha doko ni won asara mire ma! en ma naka epong’ ku pokolembe mire! naka bedopwe gonjo i ie, ento kawono junek.

²² Mola ma tar peri doko usau, pigulok peri ke ajeba ku pi.

²³ Judongomawijo peri gijai, man gi juwadi jukwo; kubang’gi kubang’gi ng’atuman umaru jamng’om, man elubo tok sukulia: e gipoko lembe mi kic ungo, kadok lembe pa dhaku ma cware tho de wok i bang’gi ngo.

²⁴ Ka kumeno Rwoth, Yehova mir udul, Ng’atu Matek mir Israel uwacu kumae, A, abijukra kum jusend para, man abiculo kwor kum judegina pira;

²⁵ man abiloko cinga i kumi, man abikabu munyali peri pet, e abikabu usau peri ceke cen;

²⁶ man abidwoko jupoklembe peri calu ma kwong’a, man juporlembe peri calu ma kwong’a: yo ku ng’eye jubilwong’i Adhura mi bedopwe, adhura mandha.

²⁷ Jubiwaru Sayuni ku pokolembe, man jupare m’udwogo ku bedopwe.

²⁸ Ento nyoth mi weg gondri ku judubo bibedo karacelo, man ju m’uweko Yehova bithum.

²⁹ Kum lewic binegogi kum bongu ma wuketho cwinywu i kume, man cwinywu bing’abre kum podho ma wufoyo.

³⁰ Kum wubibedo calu bongu ma ithe ner, man calu podho ma pi mbe kude.

³¹ Man jutego bibedo calu thondh gonia, tic pare de calu bieimac; e gin ario de gibiwang’ karacelo, e ng’atu moko mbe ma binego maje.