Hoseya 1 - The Holy Bible In Alur (Lur) Revised Orthography

Dhaku pa Hoseya M’ubedo Mandha Ngo Ire, ku Nyithindhe

¹ Lembe pa Yehova m’ubino bang’ Hoseya ma wod Beri, i nindo pa Uzia, ku Yotham, kud Ahaz, man Hezekia, gi ju m’ubimo mi Yuda, man i nindo pa Yeroboam ma wod Yoac, m’ubimo mir Israel.

² Kinde ma Yehova lar uyero ni kum Hoseya, Yehova wacu ni Hoseya kumae, Cidhi, gam iri dhaku ma won asara ku nyithindho mir asara; kum ng’om utimo asara dit, ma giweko ko Yehova.

³ Kum kumeno ecidho man egamu Gomer ma nya Diblaim; e egamu ie, man enyolo ire nyathin ma nico.

⁴ Man Yehova wacu ire kumae, Lwong’ nyinge Yezrel; kum fodi nyanok, man abiculo rimb Yezrel kum ot pa Yehu, man abijigo ker mir Israel.

⁵ Man ebitimbre i ceng’ maeca nia abituro atum mir Israel i poga mi Yezrel.

⁶ E egamu ie kendo, man enyolo nyathin ma nyaku. E Yehova wacu ire kumae, Lwong’ nyinge Lo-ruhama; kum kisa binega kendo ngo kum ot mir Israel, ma nia awek dubo migi woko ku yo moko.

⁷ Ento kisa binega kum ot pa Yuda, man abibodhogi ni kum Yehova Mungu migi man abibodhogi ngo ni kum atum, kadi ni kum palamularu, kadi ni kum lwiny, ni kum riuni, kadi ni kum weg riuni.

⁸ Nie kinde m’ekwiro Lo-ruhama ku cak, egamu ie, man enyolo nyathin ma nico.

⁹ E Yehova wacu kumae, Lwong’ nyinge Lo-ami; i kum wun wu dhanu para ngo, man abibedo Mungu mu ngo.

¹⁰ Ento wel mi nyithindho mir Israel bibedo calu kwio mi nam, ma pore ngo ma kwandre de ngo; man ebitimbre nia, i ka ma juwacu ie igi kumae, Wu dhanu para ngo, jubiwacu igi kumae, Wun wu wot Mungu ma kwo.

¹¹ Man nyithindho mi Yuda ku nyithindho mir Israel jubicokogi karacelo, e gibiketho igi wie acel, man gibiai kud i ng’om; kum ceng’ pa Yezrel bibedo dit.