Hagai 1 - The Holy Bible In Alur (Lur) Revised Orthography

Judhulo Dhanu y a Gigom Hekalu

¹ I rundi mir arionde pa Dario m’ubimo, dwi mir abusiende, i ceng’ ma kwong’a mi dwije, lembe pa Yehova bino ba Zerubabel ma wod Cealtiel, ma jabim mi Yuda, man ba Yocuwa ma wod Yehozadak, ma jalam ma dit, ku dhu Hagai ma jabila, m’uwacu kumae,

² Yehova mir udul uyero kumeni, ewacu kumae, Dhanu maeni wacu kumae, Nindo mi bino fodi, nindo mi gomo ot pa Yehova.

³ Lembe pa Yehova lund ubino ku dhu Hagai ma jabila, m’uwacu kumae,

⁴ En e nindo iwu y a wubed i udi mu ma jutadu ku bau, kinde ma ot maeni bedo ni uvuru?

⁵ Ka kumeno kawono Yehova mir udul uwacu kumae: Iwu pid pi yo mu.

⁶ Wucoyo dit, man wukelo nyathigi; wucamu, ento wuyeng’ ungo; wumadhu, ento giramadha romowu ngo; wuronjru, ento ng’atu moko mbe ma kume mor; man ng’atu m’utimo kara enwang’ sukulia enwang’u sukulia kara ekethe i usau m’utuc.

⁷ Yehova mir udul uwacu kumae: Iwu pid pi yo mu.

⁸ Wuidh malu wi got, man wukel yen, wugom ot de; e mutoro binega i kume, man jubiyunga, Yehova wacu.

⁹ Wuneno kara wunwang’ dit, man, nen, edoko nyathigi: man ka wukele pacu, ayuyo i wie. Nedi? Yehova mir udul uwacu. Kum ot para m’ubedo ni uvuru, kinde ma wuringo kubeng’wu kubeng’wu ng’atuman ba ot pare gire.

¹⁰ Kum kumeno piwu polo becero thoi, ng’om de becero nyinge.

¹¹ Man alwong’o ndru wi ng’om, man wi gudi, man wi cam, man wi pigulok ma nyen, man wi mo, man wi maeno ma ng’om utwio, man wi dhanu, man wi lim, man wi tic ceke mi cing’.

¹² Zerubabel ma wod Cealtiel, man Yocuwa ma wod Yehozadak, ma jalam ma dit, karacelo ku dong’ dhanu, gilund giworo dwand Yehova Mungu migi, ku lembe pa Hagai ma jabila, calu Yehova Mungu migi ore; man lworo maku dhanu i wang’ Yehova.

¹³ Hagai ma jakwenda pa Yehova lund uyero i lembe pa Yehova ni dhanu, ewacu kumae, Wanuti wakudu, Yehova wacu.

¹⁴ Man Yehova ting’o cwiny Zerubabel ma wod Cealtiel, ma jabim mi Yuda, ku cwiny Yocuwa ma wod Yehozadak, ma jalam ma dit, ku cwiny dhanu ceke m’udong’; man gibino gitimo tic wi ot pa Yehova mir udul, ma Mungu migi,

¹⁵ i ceng’ pier ario wi ang’wende mi dwi, i dwi mir abusiende, i rundi mir arionde pa Dario m’ubimo.