Habakuk 1 - The Holy Bible In Alur (Lur) Revised Orthography

Habakuk Uywak kum Pokolembe Wok Ungo

¹ Ewolembe ma Habakuk ma jabila neno.

² E Yehova, abilwong’o rokani, man ibiwinjo ngo? alwong’o i beng’i pi rop, man ibibodho ngo?

³ Inyutho dubo ira nedi, man ineno wi camuco? kum nyoth ku rop gini i wang’a; man por ku piem nuti.

⁴ Ka kumeno cik ukwio, man pokolembe wok ki ngo; kum judubo gitieko weg bedopwe; ka kumeno pokolembe wok woko m’egondre.

Jukaldayo Bipoko Lembe wi Yuda

⁵ Wunen kind thek, man wung’i, iwu de wang’ lii m’usagu; kum abetimo tic i nindo mu, ma wubiyio ngo kadok juyero iwu.

⁶ Kum, nen, ating’o Jukaldayo, thek maeno ma gingoi ma vur vur de, ma givodho avodha kud i kalac mi ng’om, kara gimwony kabedo ma migi ngo.

⁷ Gin ung’oindiri man junyai lworo; pokolembe migi ku dwong’ migi ai i bang’gi gigi.

⁸ Riuni migi bende giringo pio ma sagu ng’u, man gi kwiny ma sagu urudi mir uthieno; man weg riuni migi giwotho ku kuhaya: eyo, weg riuni migi giai bor; giringo pamir acur m’uringo nicamu.

⁹ Gibino kagi ceke pi rop; kethowang’ migi en e ni i nyimgi; e gicoko ng’eca calu kwio.

¹⁰ Eyo, ecayu ju m’ubimo, man judongomawijo gibedo ni ng’iero ire; eng’iero ka ma tek kubang’e nzu; kum ecoko utur, man emake.

¹¹ Ebilund kadhu calu yamu, man ebikadhu ku wi piny, man lembe bibedo i wie, en e ng’atu ma tego pare en e mungu pare.

Habakuk Upiemo ku Yehova

¹² In igembri nja ngo, E Yehova Mungu para, Ng’atu Maleng’ para? wabitho ngo. E Yehova, ikethe ni lembapoka; man in, E Cana, ikethe ni ponji.

¹³ In m’ibedo ku wang’ ma leng’ njwa ketho kud inen dubo, m’icopo neno camuco de ngo, nedi ineno wi ju m’utimo abombi, man ibedo ling’ ka jadubo mwonyo ng’atu ma pwe ma sagu en;

¹⁴ m’eketho dhanu de bedo calu rec m’i nam, calu gin ma lak, ma jabim umbe i wigi?

¹⁵ Eting’ogi ceke ku gol, etwomogi ku voi pare, man ecokogi i voi pare: ka kumeno anyong’a nege man ebedo ku mutoro.

¹⁶ Ka kumeno elamu lam ni voi pare, man ewang’u udok ma ng’wice ng’ar ni voi pare; kum ni kumgi makapiny pare cwe, cemo pare de dupa.

¹⁷ Ka kumeno ebikonjo voi pare, man ebiweko nego thek thiri thiri ngo?