Ezra 8 - The Holy Bible In Alur (Lur) Revised Orthography

¹ Nie maeni gi wi udi pa weggi, man maeni thekwaru mi ju ma waidho wakugi kud i Babeli, i nindo mi camuker pa Artacacta m’ubimo:

² Mi wot Finehas, Gercom. Mi wot Ithamar, Daniel. Mi wot Daudi, Hatuc.

³ Mi wot Cekania, mi wot Paroc, Zekaria; man co dak acel ku pier abic kude ma jukwanu ku thekwaru.

⁴ Mi wot Pahath-moab, Eliehoenai ma wod Zerahia; man co dak ario kude.

⁵ Mi wot Cekania, wod Yahaziel; man co dak adek kude.

⁶ Man mi wot Adin, Ebed ma wod Yonathan; man co pier abic kude.

⁷ Man mi wot Elam, Yecaya ma wod Athalia; man co pier abiro kude.

⁸ Man mi wot Cefatia, Zebadia ma wod Mikael; man co pier abora kude.

⁹ Mi wot Yoab, Obadia ma wod Yehiel; man co dak ario kud apar wi abora kude.

¹⁰ Man mi wot Celomith ma wod Yosifia; man co dak acel ku pier abusiel kude.

¹¹ Man mi wot Bebai, Zekaria ma wod Bebai; man co pier ario wi abora kude.

¹² Man mi wot Azgad, Yohanan, ma wod Hakatan; man co dak acel kud apar kude.

¹³ Man mi wot Adonikam, m’udong’ cen; man maeni en e nying’gi: Elifelet, man Yeuel, man Cemaya; man co pier abusiel kugi.

¹⁴ Man mi wot Bigvai, Uthai man Zabud; man co pier abiro kugi.

¹⁵ Man acokogi karacelo dhu kulo m’ukonjre i Ahava; e wagonjo keca ceng’ adek: man aliewo dhanu, ku julam, e anwang’u jumoko mbe mi wot Lawi.

¹⁶ Alund aoro julwong’ Eliezer, kud Ariel, ku Cemaya, man Elnathan, man Yarib, man Elnathan, man Nathan, man Zekaria, man Meculam, ma gi judongo; man Yoiarib bende, kud Elnathan, ma gi juponji.

¹⁷ Man aorogi ba Ido m’e jadit i ka ma julwong’o Kasifia; man awacu igi pi gin ma gibiyero ni Ido, ku utumin ma Junethini, i ka ma julwong’o Kasifia, nia gikel jutim iwa pi ot pa Mungu mwa.

¹⁸ Man calku cing’ ma ber pa Mungu mwa ma ni i wiwa gikelo iwa ng’atu ma riek, mi wot Mali, ma wod Lawi, ma wod Israel; man Cerebia, ku wote man utumin, apar wi abora;

¹⁹ man Hacabia, man kude Yecaya mi wot Merari, ku utumin man wotgi, pier ario;

²⁰ man mi Junethini ma Daudi ku judongomawijo gimio pi tic mi Julawi, Junethini dak ario ku pier ario: joni ceke juhvong’ogi ku nying’gi.

²¹ Alund ang’olo wekocam keca, dhu kulo Ahava, kara wajwigra giwa i wang’ Mungu mwa, kara wayeny i bang’e yo m’atira iwa, man pi nyithindho mwa ma thindho, man pi piny mwa ceke.

²² Kum lewic unega nipenjo ubimo pir udul asikari ku weg riuni ma gikonywa ni jukwor i gengi, kum wadaru yero ni ubimo, wawacu kumae, Cing’ Mungu mwa ni wi dhanu ceke m’uyenye, mi bero; ento tego pare ku kwinyo pare ni kum dhanu ceke m’uweke.

²³ Ka kumeno waweko cam wakwayu Mungu mwa de pi maeni: e ewinjo wa.

²⁴ Alund akoyo dhanu apar wi ario ku kind julam ma dongo, en e Cerebia, man Hacabia, ku utumeggi apar gikugi,

²⁵ man aporo igi ku jampor mola ma tar, ku mola ma kwar, kud agulu, en e giramia ma pi ot pa Mungu mwa, m’ubimo, ku juporlembe pare, ku judongomawijo pare, man Israel ceke ma nuti keca, gimio:

²⁶ aporo ku jampor i cing’gi mola ma tar talanto dak abusiel ku pier abic, man agulu mi mola ma tar, talanto dak acel; mi mola ma kwar de talanto dak acel;

²⁷ man tabu mi mola ma kwar pier ario, ma romo sente rubanga acel; man, agulu ario mi mola ma rieny ma leng’, ma pire tek calu mola ma kwar.

²⁸ Man awacu igi kumae, Wun wu leng’ ni Yehova, agulu de gi leng’; man mola ma tar ku mola ma kwar gi giramia ma ku berocwiny ni Yehova, Mungu pa wegwu.

²⁹ Wukur, man wugwokgi cil ma wubiporogi i jampor i wang’ judongo mi julam ku Julawi, man judongomawijo mi udi pa wego mir Israel, i Yerusalem, i kusika mi ot pa Yehova.

³⁰ Ka kumeno julam ku Julawi gijolo wel jampor mi mola ma tar ku mola ma kwar, kud agulu, kara gikelgi Yerusalem i ot pa Mungu mwa.

³¹ Walund waweko kulo Ahava i ceng’ apar wi arionde mi dwi ma kwong’ane, kara wacidh Yerusalem: e cing’ Mungu mwa ni wiwa, man ebodhowa ni cing’ jukwor ku jakanadhi dhu yo.

³² E wabino Yerusalem, man wabedo keca ceng’ adek.

³³ Man i ceng’ mir ang’wende juporo mola ma tar ku mola ma kwar kud agulu i jampor i ot pa Mungu mwa i cing’ Meremoth ma wod Uria ma jalam (man Eleazar ma wod Finehas ubedo karacelo kugi: giku Yozabadgi ma wod Yecuwa man Noadia ma wod Binui, ma Julawi),

³⁴ pinyne ceke ku wel ku jampor de: man wel jampor ceke jugoro nindo maeca.

³⁵ Nyithindho mi ng’eca, ma giai i ng’eca, gimio lam m’awang’a ni Mungu mir Israel, thwoni dhiang’ apar wi ario pir Israel ceke, nyogi rombe pier abung’wen wi abusiel, nyithi rombe de pier abiro wi abiro, man nyogi diegi apar wi ario ni lam mi dubo: maeni ceke en e lam m’awang’a ni Yehova.

³⁶ Man gidwoko lembang’ola p’ubimo ba jego p’ubimo, man ba jubim ma loka Kulo: e gimio kony ni dhanu ku ot pa Mungu.