Ezra 7 - The Holy Bible In Alur (Lur) Revised Orthography

Ezra ku Juwagi Gitundo i Yerusalem

¹ Nie yo ng’ei gin maeni, i nindo mi camuker pa Artacacta m’ubimo mir Ajemi, Ezra ma wod Seraya, ma wod Azaria, ma wod Hilkia,

² ma wod Calum, ma wod Zadok, ma wod Ahitub,

³ ma wod Amaria, ma wod Azaria, ma wod Merayoth,

⁴ ma wod Zerahia, ma wod Uzi, ma wod Buki,

⁵ ma wod Abicua, ma wod Finehas, ma wod Eleazar, ma wod Harun ma jalam ma dit,

⁶ Ezra maeni idho malu kud i Babeli. Man en e jagorcik ma yot i cik pa Musa, ma Yehova, Mungu mir Israel, umio; man ubimo mio ire penji pare ceke, calku cing’ Yehova Mungu pare ma ni i wie.

⁷ Man nyithindho mir Israel moko giidho malu Yerusalem, man kind julam, ku Julawi, ku juwer, ku jukur dhugola, ku Junethini, i rundi mir abirone pa Artacacta m’ubimo.

⁸ Man ewok Yerusalem i dwi mir abije, ma en e rundi mir abirone p’ubimo.

⁹ Kum i ceng’ ma kwong’ane mi dwi ma kwong’ane emaku idho malu kud i Babeli; man i ceng’ ma kwong’ane mi dwi mir abije ewok Yerusalem, calku cing’ ma ber pa Mungu pare ma ni i wie.

¹⁰ Kum Ezra ketho adundene mi yenyo cik pa Yehova, kara etime, eponj cik ku lembapoka de i Israel.

¹¹ Nie maeni en e wadi waraga m’ubimo Artacacta mio ni Ezra ma jalam, ma jagorcik, en e jagorcik mi lembe mi lembang’ola pa Yehova, man mi cik pare ni Israel:

¹² Artacacta, m’ubimo mir ubimo, ni Ezra ma jalam, ma jagorcik mi cik pa Mungu m’i polo, ndhu cu ku ma kumeno.

¹³ Atimo cik nia dhanu ceke mi nyithindho mir Israel, ku julam migi man Julawi, ma ni i ker para, ma giyenyo gigi giidh Yerusalem, wuci wukugi.

¹⁴ Kum ubimo ku juporlembe pare abiro giori, kara ipenj pi Yuda ku Yerusalem, calku cik pa Mungu peri ma ni i cingi,

¹⁵ man kara iter mola ma tar ku mola ma kwar, m’ubimo ku juporlembe pare gimio ku bero cwiny gi ni Mungu mir Israel, ma kabedo pare ni i Yerusalem,

¹⁶ man mola ma tar ku mola ma kwar ceke m’ibinwang’u i ng’om Babeli ceke, karacelo ku girathiera ma ku berocwiny mi dhanu, man mi julam, ma gibemio ku laccing’ pi ot pa Mungu migi ma ni i Yerusalem;

¹⁷ ka kumeno ibing’iewo ku sente maeni kud amora thwoni dhiang’, man nyogi rombe, ku nyithi rombe, karacelo ku lam mi mogo migi man lam m’amadha migi, man ibithierogi wi pemblam mi ot pa Mungu mu ma ni i Yerusalem.

¹⁸ Man gin ma tek bibedo ber iri man ni juwedu ya wutim ku dong’ mola ma tar ku mola ma kwar, wutim maeno calu Mungu mu yenyo.

¹⁹ Man agulu ma jumio iri pi timotim mi ot pa Mungu peri, idwok i wang’ Mungu mi Yerusalem.

²⁰ Man gin ma tek cande bibedo nuti kendo pi ot pa Mungu peri, ma bimaku piny ya iwodh, dong’ iwodhe kud i otkanpiny p’ubimo.

²¹ Man an, cil an a Artacacta m’ubimo, atimo cik ni jukur otkanpiny ceke ma loka Kulo, nia gin ceke ma tek Ezra ma jalam, ma jagorcik mi cik pa Mungu m’i polo, biyenyo i beng’wu lembene timbre k’amora,

²² cil mi talanto mi mola ma tar dak acel, man katoko mi nganu rubanga acel, man ajiku mi pigulok dak acel, man ajiku mi mo dak acel, man kadu bed umbe welne.

²³ Gin ma tek Mungu m’i polo ng’olo, dong’ jutime cu pi ot pa Mungu m’i polo; kum nedi kwinyo bed wi ker p’ubimo ku wote?

²⁴ Man wapoyowu bende, nia pi julam moko ku Julawi, ku juwer, man jukur dhugola, ku Junethini, kadi jutic mi ot maeni pa Mungu, cik uyio ngo ya juketh ajok, kadi jamng’om, kadi piny de, i wigi.

²⁵ Man in, Ezra, calku rieko pa Mungu peri ma ni i cingi, iketh jubim ku jupoklembe, ma gicopo poko lembe ni dhanu ceke ma loka Kulo, wadijo ceke m’ung’eyo cik pa Mungu peri; man iponj ng’atu m’ung’eyogi ngo.

²⁶ Man ng’atu ma tek bitimo cik pa Mungu peri ngo, ku cik p’ubimo, dong’ jutim lembapoka i wie kud amora ceke, kadok ebedo mi tho, kadi mi ng’eca, kadi mi yakupiny, kadi mi kol.

²⁷ Mugisa bed ni Yehova, Mungu pa wegwa, m’uketho lembe ma kumeni i adunde ubimo, kara eruk ot pa Yehova ma ni i Yerusalem;

²⁸ man m’unyutho mer mi bero ira i wang’ ubimo, ku juporlembe pare, man i wang’ judongomawijo ceke ma jukero p’ubimo. Man judwoka tek calku cing’ Yehova Mungu para ma ni wia, man acoko dhanu ma dongo kud i Israel kara waidh wakugi.