Ezra 4 - The Holy Bible In Alur (Lur) Revised Orthography

Judegi Cero Tije

¹ Nie ka judegi mi Yuda ku Benyamin giwinjo nia nyithindho mi ng’eca gibegomo hekalu ni Yehova, Mungu mir Israel;

² gilund gicoro ceng’ni Zerubabel, man ba wi udi pa wego, man giwacu igi kumae, Dong’ wagomu wakudu; kum wabeyenyo Mungu mu, calu wutimo; man wamio lam ire ugambre i ceng’ pa Ezarhadon m’ubimo mir Ascur, m’ukelowa keni.

³ Ento Zerubabel, man Yecuwa, ku dong’ wi udi pa wego mir Israel, giwacu igi kumae, Lem mu mbe i bang’wa kum gomo ot ni Mungu mwa; ento wan karacelo giwa wabigomo ni Yehova, Mungu mir Israel, calu ubimo Kuro m’ubimo mir Ajemi ng’olo iwa.

⁴ Dhanu m’i ng’ombe gilund gidwoko cing’ dhanu mi Yuda ng’ic, man gisendogi i gomne,

⁵ man gilonyo juporlembe i kumgi, kara girany lembe ma igi keco, i nindo ceke pa Kuro m’ubimo mir Ajemi, cil i nindo mi camuker pa Dario m’ubimo mir Ajemi.

⁶ I camuker pa Ahasuerus, i thekri mi camuker pare, gigoro lembagobe kum dhanu m’ubedo i Yuda ku Yerusalem.

⁷ Man i nindo pa Artacacta en e Biclam, man Mithredath, man Tabel, ku dong’ juwagi, gigoro ni Artacacta m’ubimo mir Ajemi; man gor mi waragane jugoro ku nyiguta mi dhu Cami.

⁸ Rehum ma jadit mi dilo ku Cimcai ma jagorcik gigoro waraga kum Yerusalem ni Artacacta m’ubimo kumae:

⁹ Rehum ma jadit mi dilo ulund ugoro, man Cimcai ma jagorcik, ku dong’ juwagi, gi Judinai, man Juafarsathki, man Jutarpeli, man Jufarsi, man Juarkevi, man Jubabeli, man Jucucanki, man Judehai, man Juelami,

¹⁰ ku dong’ thek ma Osnapar ma dit ku ma dwong’ ukelo lokani, uketho de i adhura mi Samaria, man i dong’ ng’om ma loka Kulo, ku ma kumeno.

¹¹ Maeni wadi waraga ma gioro bang’ Artacacta m’ubimo kumae: Jutic peri dhanu ma loka Kulo, ku ma kumeno.

¹² Dong’ ubimo ng’ei, nia Juyahudi ma giidho malu kud i beng’i gibino i bang’wa i Yerusalem; gibegomo adhura ma rac man mi camuco, man gidaru gang’kidi, man giyiko there.

¹³ Kawono dong’ eng’eire ni ubimo, nia, tek adhura maeni gombre, man gang’kidine thum, gibimio ajok ungo, kadi jamng’om, kadi piny de, man ma cen lembe bibedo rac ni ubimo.

¹⁴ Nie kum wacamu kadu mi otker p’ubimo, man emaku piny ungo ya wanen kabuyung p’ubimo, kum kumeno waoro waketho ubimo ng’ei;

¹⁵ kara juyeny i kitabu mi lemkei pa kwaru: ka kumeno ibinwang’u i kitabu mi lemkei, e ibing’eyo nia adhura maeni en e adhura mi camuco, en e mi nyayu lembe ma rac kum ubimo ku ng’etker, man nia gikwong’o rop i nindo ma con maeca; kum lembe maeni judwoko adhurane ni uvuru.

¹⁶ Waketho ubimo ng’ei, nia tek jugomo adhura maeni, man gang’kidi de thum, kum lembe maeni ibibedo ku makapiny ma loka Kulo ngo.

¹⁷ Ubimo lund udwoko lembe ni Rehum ma jadit mi dilo, man ni Cimcai ma jagorcik, man ni dong’ juwadi m’ubedo i Samaria, man i dong’ ng’om ma loka Kulo kumae: Kwiocwiny, ku ma kumeno.

¹⁸ Waraga ma wuoro i bang’wa judaru somo ng’beng’ i wang’a.

¹⁹ Man ang’olo, e juyenyo, man junwang’u nia adhura maeni nindo ma con jujai kum ju m’ubimo, man nia camuco ku rop utimbre i ie.

²⁰ Naka ubimo ma tek de nuti wi Yerusalem, ma gibimo wi ng’om ceke loka Kulo; man ajok, ku jamng’om, ku piny, jumio igi.

²¹ Kawono wutim cik kara uketh dhanu maeni giweki, man kara adhura maeni kud ugombre, maram an de ang’olo ko lembe.

²² Man wubed ku weng’wu ya kud wubed ng’ic ni lembe maeni: nedi lem ma rac umedre kara jucai ubimo?

²³ Ka julund jusomo wadi waraga p’ubimo Artacacta i wang’ Rehum man Cimcai ma jagorcik, ku juwagi, gicidho ku ng’wec i Yerusalem ba Juyahudi, man giketho giweko ku rop man tego,

²⁴ Tic mi ot pa Mungu ma ni i Yerusalem ulund urany; ejik cil i rundi mir arionde mi camuker pa Dario m’ubimo mir Ajemi.