Ezra 1 - The Holy Bible In Alur (Lur) Revised Orthography

Lembang’ola pa Kuro

¹ Nie i rundi ma kwong’ane pa Kuro m’ubimo mir Ajemi, kara lembe pa Yehova ma ku dhu Yeremia copo timbre kakare, Yehova ting’o cwiny Kuro m’ubimo mir Ajemi, ketho eoro kwenda i ker pare ceke mba mba, man ekethe i lembagora bende, ewacu kumae,

² Kuro m’ubimo mir Ajemi wacu kumae, Yehova, Mungu m’i polo, mio ira ker ceke m’i ng’om; man eng’olo ira ya agom ire ot i Yerusalem, ma ni i Yuda.

³ Ng’atu ma tek ni i kindwu mi dhanu pare ceke, Mungu pare bed kude, man wek eidh malu Yerusalem, ma ni i Yuda, man egom ot pa Yehova, Mungu mir Israel (en e Mungu), ma ni i Yerusalem.

⁴ Man ng’atu ma tek udong’, i ka moko ma tek ebedo i ie ni umondo, wek dhanu ma ni i ka m’ebedo i ie gikonye ku mola ma tar, man ku mola ma kwar, man ku piny, ku lim de, umed lam mi berocwiny pi ot pa Mungu ma ni i Yerusalem.

Ju mi Ng’eca Dwogo Yerusalem

⁵ Wi udi pa wego mi Yuda ku Benyamin, man julam, ku Julawi, cil dhanu ceke ma Mungu ting’o ewinygi ya giidh malu gigom ot pa Yehova ma ni i Yerusalem.

⁶ Man dhanu ceke ma ni i ng’etgi gidwoko cing’gi tek kud agulu mi mola ma tar, ku mola ma kwar, ku piny, man ku lim, man ku gin ma pire tek, umedo gin ceke ma jumio ku laccing’.

⁷ Kuro m’ubimo bende wodho agulu mi ot pa Yehova woko, ma Nebukadnezar uyaku kud i Yerusalem, man eketho i ot pa mungu pare;

⁸ cil maeno Kuro m’ubimo mir Ajemi wodho woko ku cing’ Mithredath ma jakur piny m’akana, man ekwanugi ni Cecbazar, ma jaditmawijo pa Yuda,

⁹ man maeni en e welgi: atangla pier adek mi mola ma kwar, atangla mi mola ma tar rubanga acel, pala pier ario wi abung’wen,

¹⁰ tabu mi mola ma kwar pier adek, tabu mi mola ma tar ma tung’ dak ang’wen kud apar, agulu mange de rubanga acel.

¹¹ Agulu ceke mi mola ma kwar man mi mola ma tar gi rubanga abic ku dak ang’wen. Maeni ceke Cecbazar ukelo malu, kinde ma jukelo ju mi ng’eca kud i Babeli i Yerusalem.