Ezekiel 3 - The Holy Bible In Alur (Lur) Revised Orthography

¹ Man ewacu ira kumae, Wod dhanu, cam gin m’inwang’u; cam giradola maeni, man icidh ij’er ni ot mir Israel.

² Kum kumeno ayabu dhoga, e eketho acamu giradolane.

³ Man ewacu ira kumae, Wod dhanu, keth ii cam, man ipong’ cindi ii ku giradola maeni m’amio iri. Alund acamu; man ebedo i dhoga calu kic ni midone.

⁴ E ewacu ira kumae, Wod dhanu, cidhi, ci ba ot mir Israel, man iyer igi ku lembe para.

⁵ Kum juori ba dhanu mi wec ma tung’ ungo man mi dhok ma tek de ngo, ento ba ot mir Israel;

⁶ ba kodhidhanu dupa mi wec ma tung’ man mi dhok ma tek de ngo, ma lembe migi winjre iri ngo. Andha, tek aori i bang’gi, kuno di giwinji.

⁷ Ento ot mir Israel biwinji ngo; kum gibiwinjo an ungo: kum ot mir Israel ceke ternyimgi tek man adundegi nwang’.

⁸ Nen, atimo weng’i tek kum wang’gi, man ternyimi tek kum ternyimgi.

⁹ Adwoko ternyimi calu kidi ma tar ma tek ma sagu kidi ma tek hai: lworo kud unegi i kumgi, kadi cwinyi de kud ung’abre kum nen migi, kadok gi ot mi jai.

¹⁰ Mange ke ewacu ira kumae, Wod dhanu, jol lembe para ceke m’abiyero iri i adundeni, man iwinj ku ithi.

¹¹ Man icidhi, cidh ba ju mi ng’eca, ba nyithindho mi juthu, man iyer igi, man iwac igi kumae, Rwoth Yehova wacu kumae; kadok gibiwinjo, kadi kadok gibiwinjo ngo.

¹² Tipo lund uting’a malu, man awinjo yor i ng’eya badwal mi giraringa ma dit, m’uwacu kumae, Mugisa bed wi dwong’ pa Yehova m’uai i kakare.

¹³ Man awinjo badwal mi bomb gin ma kwo kinde ma gigudri, man badwal mir ukobre i ng’etgi, en e badwal mi giraringa ma dit.

¹⁴ Kum kumeno Tipo ting’a malu, man etera cen; man acidho i lembe ma kec, i lietho mi tipona; man cing’ Yehova e tek i kuma.

¹⁵ Alund abino ba ju mi ng’eca i Tel-abib, m’ubedo dhu kulo Kebar, man ba ka ma gibedo i ie; man abedo i kindgi kuca ceng’ abiro ma cwinya ng’abre sok.

Jakur mi Israel

¹⁶ Man etimbre i kajik mi ceng’ abiro, nia lembe pa Yehova bino i bang’a, m’uwacu kumae,

¹⁷ Wod dhanu, adwoki ni jakur mi ot mir Israel: ka kumeno winj lembe m’i dhoga, man ipoigi ira.

¹⁸ Kinde m’awacu ni jadubo kumae, Ibitho andha; man ipoye ngo, kadi iyero ngo kara ipoi jadubo kum yo pare mi dubo, kara ibodh kwo pare; jadubo nino bitho i kier pare; ento abilwong’o rimo pare i cingi.

¹⁹ Ento tek ipoyo jadubo, man elokre kud i dubo pare ngo, kadi ku ba yo pare mi dubo, ebitho i kier pare; ento ibodho ng’eyong’ec peri.

²⁰ Kendo, kinde ma ng’atu ma pwe lokre ku ba bedopwe pare, man etimo kier, man aketho gin ma jukier i kume i wang’e, ebitho: kum ipoye ngo, ebitho i dubo pare, man tic ma pwe m’etimo jubipoi pire ngo; ento abilwong’o rimo pare i cingi.

²¹ Ento tek ipoyo ng’atu ma pwe, kara ng’atu ma pwe kud udubi man edubo ngo, ebibedo kwo andha, kum ewinjo poine; man ibodho ng’eyong’ec peri.

Judwoko Jabila Ajuba

²² E cing’ Yehova ni i wia kuca; man ewacu ira kumae, Ai, iwok woko i pambu, man wabiweco kudi kuca.

²³ Alund aai, man awok woko i pambu: man, nen, dwong’ pa Yehova cungo kuca, calu dwong’ m’aneno dhu kulo Kebar; man apodho arieba wang’a.

²⁴ Tipo lund umondo i ia, man eketha wi tienda; man eweco kuda, eyero ira de kumae, Cidhi, cik beng’i yor i ot peri.

²⁵ Ento in, wod dhanu, nen, gibiketho uno i kumi, man gibitwii kudo, man ibiwok woko i kindgi ngo:

²⁶ man abiketho lebi moko kum dendhogi, kara ibed ajuba, e ibibedo igi ni jajuk ungo; kum gin gi ot mi jai.

²⁷ Ento kinde ma waweco wakudi abiyabu dhogi, man ibiwacu igi kumae, Rwoth Yehova wacu kumae, Ng’atu m’uwinjo, wek ewinji; man ng’atu m’uwinjo ngo, kud ewinji; kum gin gi ot mi jai.