Ezekiel 2 - The Holy Bible In Alur (Lur) Revised Orthography

Lwong’o pa Ezekiel

¹ Man ewacu ira kumae, Wod dhanu, cung wi tiendi, man wabiweco kudi.

² E Tipo mondo i ia kinde m’eweco i bang’a, man eketha wi tienda; man awinjo ng’atu m’uweco i bang’a.

³ Man ewacu ira kumae, Wod dhanu, aori ba nyithindho mir Israel, ba thek ma juco, m’ujai ira: gin ku kwarugi gidubo ira cil i ceng’ maeni nini.

⁴ Man nyithindho gi juco man cwinygi tek: aori i bang’gi; e ibiwacu igi kumae, Rwoth Yehova wacu kumae,

⁵ E gin, kadok gibiwinjo, kadi kadok gibiwinjo ngo (kum gi ot mi jai), ento gibing’eyo nia jabila bedo i kindgi.

⁶ Man in, wod dhanu, lworo kud unegi i kumgi, kadi lworo kud unegi kum lembe migi, kadok ucok kud ukudho gini kudi, man ibedo i kind ith: lworo kud unegi kum lembe migi, kadi cwinyi de kud ung’abre kum nen migi, kadok gi ot mi jai.

⁷ Man ibiyero lembe para igi, kadok gibiwinjo, kadi kadok gibiwinjo ngo; kum gi juco m’usagu.

⁸ Ento in, wod dhanu, winj gin m’ayero iri; kud ibed jaco, calu ot maeno ma juco: ng’am dhogi, man icam gin m’amio iri.

⁹ E kinde m’aneno, nen, cing’ urieire i bang’a; man, nen, giradola mi kitabu ni i ie;

¹⁰ man epedhe i wang’a: man jugoro yor i ie ku yo woko; man jugoro ywak, ku goyonduru, ku can yor i ie.