Ester 8 - The Holy Bible In Alur (Lur) Revised Orthography

Ubimo Yio ni Juyahudi ya Gigut ni Judegigi

¹ I ceng’ maeca ubimo ma Ahasuerus umio ot pa Haman ma jadegi mi Juyahudi ni Ester ma ci ubimo. E Mordekai bino i wang’ ubimo; kum Ester udaru yero maram ebedo ko ire.

² E ubimo wodho lagith pare, m’egamu ba Haman, man emie ni Mordekai. Man Ester uketho Mordekai wi ot pa Haman.

³ E Ester uyero kendo i wang’ ubimo, man epodho the tiende, man ekwaye ku piwang’ ya ekab lem ma rac pa Haman ma Jaagagi, ku lembapora pare m’eporo kum Juyahudi.

⁴ E ubimo lund uting’o uluth mi ker mi mola ma kwar malu ni Ester. Ka kumeno Ester uai malu, man ecungo i wang’ ubimo.

⁵ Man ewacu kumae, Tek emaku i ubimo, man tek anwang’u bero i wang’e, man ginduni bedopwe i wang’ ubimo, man abedo ber i wang’e, wek jugor waraga m’uthir waraga ma Haman ma wod Hamedatha ma Jaagagi poro, m’egoro kara unyoth Juyahudi ma gini i ng’etker p’ubimo ceke:

⁶ kum acopo kayu cwinya m’anen ko can ma biwok kum juthuwa nenedi? kadi acopo kayu cwinya m’anen ko nyoth mi jufwa nenedi?

⁷ Ubimo ma Ahasuerus ulund uwacu ni Ester ma ci ubimo man ni Mordekai ma Jayahudi kumae, Nen, amio ot pa Haman ni Ester, en de juliere wi yen m’agura, kum eketho cinge kum Juyahudi.

⁸ Wugor bende ni Juyahudi, calu ebedo ber iwu, ku nying ubimo, man wuketh ayi i kume ku lagith p’ubimo; kum lembagora ma jugoro ku nying ubimo, ma jumwono ayi mi lagith p’ubimo i kume, ng’atu moko mbe ma copo loke.

⁹ Julund julwong’o jugorcik p’ubimo i nindo maeca, i dwi mir adege, ma en e dwi Sivan i ceng’ pier ario wi adege mi dwije; man jugore calku gin ceke ma Mordekai ng’olo ni Juyahudi, man ni jego, man jubim ku judongomawijo mi ng’etker ma ginuti ugambre kum India cil Kuc, ng’etkeme dak acel ku pier ario wi abiro, ba ng’etker kubang’gi kubang’gi calku gorone, man ku ba dhanu kubang’gi nzu calku dhok migi, man ni Juyahudi calku goro migi, man calku dhok migi.

¹⁰ Man egoro ku nying ubimo ma Ahasuerus, emwono ayi i kume de ku lagith p’ubimo, man eoro waragane ku jukwenda wi riuni, ma giwotho wi riuni ma ringo pio ma jutimo kudo tic p’ubimo, ma thwon riuni p’ubimo nyolo:

¹¹ i waragane ubimo yio ya Juyahudi ma gini i adhura ceke kubang’gi kubang’gi gicokri gigi karacelo, man gicung pi kwo migi, kara ginyoth, gineg, man girwiny, tego ceke mi dhanu man mi ng’etker ma bitimo ali i kumgi, kum nyithindho migi ma thindho ku mon migi, man gigam ayeki migi ni amaci,

¹² i ceng’ acel i ng’etker; ceke p’ubimo ma Ahasuerus, ma en e ceng’ apar wi adege mi dwi apar wi arionde, ma en e dwi Adar.

¹³ Wadi waraga mi lembagorane, nia juyer cikne i ng’etker ceke kubang’gi kubang’gi, uyere ni kodhidhanu ceke, man nia Juyahudi gibed ayika kum ceng’ maeca kara gicul kwor kum judegi migi.

¹⁴ Ka kumeno jukwenda ma giwotho ku wi riuni ma ringo pio ma jutimo kudo i tic p’ubimo gicidho, kum judhulogi gici pio ku lembang’ola p’ubimo; man cikne mire i Cucan ma odker.

¹⁵ E Mordekai ai ku vut ubimo m’ekendo kendi mi ker m’ulweku man ma tar, man ku jamkermiwic ma dit mi mola ma kwar, man ku kanzu mi bongu ma nwang’ ma ber man uluga: e adhura mi Cucan ugoyo muzira man anyong’a nege.

¹⁶ E Juyahudi bedo ku der ku mutoro, man anyong’a ku yung.

¹⁷ Man i ng’etker kubang’e kubang’e, i adhura de kubang’e kubang’e, ka ceke ma tek lembang’ola p’ubimo ku cik pare de wok i ie, Juyahudi gibedo ku mutoro kud anyong’a, kud agba man ceng’ ma ber. Man dhanu dupa ma kind kodhidhanu mi ng’om gidoko Juyahudi; kum lworo mi Juyahudi podho i wigi.