Ester 3 - The Holy Bible In Alur (Lur) Revised Orthography

Rieko ma Rac ma Haman Uyenyo Nyotho Ko Juyahudi

¹ Yo ng’ei gin maeni ubimo ma Ahasuerus udodo Haman ma wod Hamedatha ma Jaagagi, e eyunge, man eketho kom pare malu ma sagu judongomawijo ceke ma gibedo gikugi.

² Man jutic p’ubimo ceke, ma gini i dhugang’ p’ubimo, girum, man girwo ni Haman; kum ubimo ng’olo kumeni pire. Ento Mordekai rum ungo, erwo ire de ngo.

³ Jutic p’ubimo, m’ubedo dhugang’ p’ubimo, gilund giwacu ni Mordekai kumae, Nedi ikadhu ku wi lembang’ola p’ubimo?

⁴ Nie etimbre, ka giyero ire ceng’ ku ceng’, man ewinjogi ngo, nia giyero ni Haman, nineno tek lembe pa Mordekai bicungo: kum eyero igi nia en e Jayahudi.

⁵ Ka Haman uneno nia Mordekai rum ungo, erwo ire de ngo, kwinyo lund unego Haman dit.

⁶ Ento eneno nia en e gin moko ngo ya eketh cinge kum Mordekai kende; kum giketho eng’eyo juthugi Mordekai: kum kumeno Haman uyenyo enyoth Juyahudi ceke ma gini i ker ceke pa Ahasuerus, en e juthugi Mordekai.

⁷ I dwi mir acende, ma en e dwi Nisan, i rundi mir apar wi arionde p’ubimo Ahasuerus, gigoyo Pur, the lembene kumae, gagi, i wang’ Haman ceng’ ku ceng’, man ku ba dwi ku ba dwi, cil i dwi apar wi arionde ma en e dwi Adar.

⁸ Man Haman uwacu ni ubimo ma Ahasuerus kumae, Dhanu moko nuti m’ukethri mba mba ma julalu de i kind kodhidhanu mi ng’etker ceke mi ker peri; e cik migi tung’ ku maeno mi dhanu ceke; kadok cik p’ubimo de giworo ngo: ka kumeno en e kuloka ngo ni ubimo ya eyigi.

⁹ Tek ebedo ber ni ubimo, wek jugor nia junyothgi: man abimio talanto rubanga apar mi mola ma tar i cing’ ju ma juketho kum tic p’ubimo, kara jukele i kakanpiny p’ubimo.

¹⁰ E ubimo wodho lagith kud i cinge, man emie ni Haman ma wod Hamedatha ma Jaagagi, ma jadegi mi Juyahudi.

¹¹ E ubimo wacu ni Haman kumae, Mola ma tarne umire iri, ku dhanune bende, kara itim i kumgi calu ebedo ber iri.

¹² Julund julwong’o jugorcik p’ubimo i dwi mir acende, i ceng’ apar wi adege mi dwije; e jugoro calku gin ceke ma Haman ung’olo ni ju ma gisagri p’ubimo, man ni jubim ma gibedo wi ng’etker kubang’gi kubang’gi, man ni judongomawijo mi dhanu ceke kubang’gi kubang’gi, man ni ng’etker kubang’gi kubang’gi calku gorne, man ni dhanu ceke kubang’gi kiibang’gi calku dhok migi; jugoro ku nying ubimo ma Ahasuerus, man juketho ayi i kume ku lagith p’ubimo.

¹³ Juoro waragane ku jukwenda i kind ng’etker ceke p’ubimo, ya junyoth, juneg, man jurwiny, Juyahudi ceke, awobi ku judongo, nyithindho ma thindho ku mon, i ceng’ acel, en e i ceng’ apar wi adege mi dwi apar wi arionde, ma en e dwi Adar, man nia jugam piny migi ni amaci.

¹⁴ Wadi waraga mi lembagorane, ya jumi cik i kind ng’etker ceke, juoro ni kodhidhanu ceke, kara gibed ayika mi ceng’ maeca.

¹⁵ Jukwenda gicidho woko ku ng’wec ku lembang’ola p’ubimo, man cikne jumio i Cucan ma odker. E ubimo giku Haman gibedo piny kara gimadhi; ento i adhura ma Cucan uwang’ lii.