Ester 1 - The Holy Bible In Alur (Lur) Revised Orthography

Vacti ma Ci Ubimo Ujai ni Ubimo Ahasuerus

¹ Nwang’u etimbre i ceng’ pa Ahasuerus (Ahasuerus maeni m’ucamu ker ugambre i India cil kum Kuc, wi ng’etker dak acel ku pier ario wi abiro),

² nia i ceng’ maeca, kan ubimo Ahasuerus ujany wi komker mi ker pare, ma ni i otker i Cucan,

³ i oro mir adege mi camuker pare, etimo agba ni judongomawijo pare ceke ku jutic pare de; tego mir Ajemi ku Medi, dhanu ma weg dwong’ ku judongomawijo mi ng’etker, gini i wang’e;

⁴ kinde m’enyutho piny mi ker pare mi lonyo, man yung mi dwong’ pare m’usagre nindo mi ceng’ dupa, cil ceng’ dak acel ku pier abora.

⁵ Man ka ceng’ maeni thum i kakare, ubimo timo agba ni dhanu ceke ma ni i Cucan ma otker, ju ma dongo ku ju ma thindho, ceng’ abiro, i lelagang’ mi podho mi otker p’ubimo.

⁶ Bongu m’ang’aba ma tar nuti, ku mir ayi lum, man mir ayi polo, ma jutwio ku thol ma nwang’ ma ber man ku mir uluga kum gwang’ mi mola ma tar, man kum mbegi mi kidi ma ber: kabedone en e mi mola ma kwar man mi mola ma tar, wi kidi ma ber ma kite kwar, man tar, ku ma fura fura, man col.

⁷ Man gimio igi giramadha i kikombe mi mola ma kwar (kikombene tung’ tung’ ku wadi), man pigulok mi ker usagre, calku laccing’ p’ubimo.

⁸ Madhu de bedo calku cik; ng’atu moko mbe ma copo cung’o acung’a: kum ubimo ng’olo kumeni ni jego ceke mi ot pare, nia dhanu kubang’gi kubang’gi ng’atuman utim calu ie yenyo.

⁹ Vacti ma ci ubimo bende uketho agba ni mon i otker ma p’ubimo ma Ahasuerus.

¹⁰ I ceng’ mir abirone, ka pigulok umero adunde ubimo, eng’olo ni Mehuman, ku Biztha, man Harbona, ku Bigtha, man Abagtha, man Zethar, man Karkas gi jutic abiro ma gitimo i vut Ahasuerus m’ubimo,

¹¹ nia gikel Vacti ma ci ubimo i wang’ ubimo ku jamkermiwic mi ker, kara unyuth leng’wang’e ni kodhidhanu ku judongomawijo; kum wang’e leng’ hai mir anena.

¹² Ento Vacti ma ci ubimo kwero bino kum lembang’ola p’ubimo m’eoro ku dhu jutic pare: ka kumeno kwinyo nego ubimo apila, e ng’ecwiny pare bogre calu mac yor i ie.

¹³ Ubimo lund uwacu ni jurieko, ma ging’eyo nindo (kum kura p’ubimo bedo kumeno yo ba dhanu ceke m’ung’eyo cik ku lembapoka;

¹⁴ man m’ulube en e Karcena, man Cethar, man Admatha, man Tarcic, man Meres, man Marsena, man Memukan, gi judongomawijo abiro mir Ajemi ku Media, ma gineno wang’ ubimo, ma gibedo ma kwong’a i ker de),

¹⁵ ewacu kumae, Wabitimo ang’o kum Vacti ma ci ubimo calku cik, kum etimo lembang’ola p’ubimo ma Ahasuerus ungo m’eoro ku dhu jutic pare?

¹⁶ Man Memukan udwoko lembe wang’ ubimo ku judongomawijo de kumae, Vacti ma ci ubimo timo rac bang’ ubimo kende ngo, ento ni judongomawijo ceke bende, man ni kodhidhanu ceke ma gini i ng’etker ceke p’ubimo ma Ahasuerus.

¹⁷ Kum tic maeni pa ci ubimo biyik i kind mon ceke, kara ujwig coggi i wang’gi, ka jubiyero pire kumae, Ubimo ma Ahasuerus ung’olo nia jukel Vacti ma ci ubimo i wang’e, ento ebino ngo.

¹⁸ Ceng’ maeni de mond judongomawijo mir Ajemi ku Medi ma giwinjo pi tic pa ci ubimo gibiyero kumeni ni judongomawijo ceke p’ubimo. Kum kumeno cac ma dit ku kwinyo de biwok.

¹⁹ Tek ebedo ber ni ubimo, wek lembang’ola mi ker ucidh woko m’uai i bang’e, man wek jugore i kind cik mi Juajemi man Jumedi, kara ku juloke, y a Vacti kud ubin kendo i wang’ ubimo ma Ahasuerus; man wek ubimo mi makapare mi ker ni ng’atu mange ma ber ma sage.

²⁰ Man ka cik p’ubimo m’ebiketho biyik i ker pare ceke (Icum en e dit), mon ceke gibimio yung ni coggi, ma dongo ku ma thindho de.

²¹ E lembene bedo ber ni ubimo ku judongomawijo; e ubimo timo calku lembe pa Memukan:

²² kum eoro waraga i kind ng’etker ceke p’ubimo, i ng’etker kubang’gi kubang’gi calku gorne, man ni dhanu kubang’gi kubang’gi calku dhok migi, nia ku ba dhanu ceke ng’atuman ubim wi ot pare gire, man eyer calku dhok mi dhanu pare.