Eklizia 5 - The Holy Bible In Alur (Lur) Revised Orthography

Lemkasegu mi Weco Lembe Vur Vur

¹ Gwok tiendi kinde m’icidho i ot pa Mungu; kum eoro ceng’ni niwinjo e ber ma sagu mio lam mi jukusegu: kum ging’eyo ngo nia gitimo rac.

² Kud iwec vur vur ku dhogi, man adundeni kud uwec lembe vur vur i wang’ Mungu; kum Mungu ni i polo, man ini i ng’om: ka kumeno wek lembe peri bed nok.

³ Kum lek bino ku tic dupa, man dwand jakasegu bino ku lembe dupa.

⁴ Kan ing’olo lembang’ola ni Mungu, kud igal kutime; kum anyong’a nege ngo kum jukusegu: cul maeno m’ing’olo.

⁵ Ng’olo lembang’ola ngo e ber, sagu ma tek ing’olo man iculo ngo.

⁶ Kud iyi dhogi keth kumi dubi; kadok i wang’ jamalaika de kud iwac nia en e kier: pirang’o ng’ecwiny uneg Mungu kum dwendi, man enyoth tic m’i cingi?

⁷ Kum gin ma ie nanu ni i lek dupa, man i lembe dupa: ento lwor Mungu.

Gin ma ie Nanu i Bedo mi Kwo

⁸ Tek ineno send ma jusendo ko jacan, man jurop ma kabu pokolembe ku lembe ma pwe i ng’om moko, ii kud uwang’ lii kum lembene: kum ng’atu ma malu ma sagu ju ma malu eneno; man ju ma ni malu nuti ma sagu gin.

⁹ Mange ke kuloka mi ng’om en e ni dhanu ceke: ubimo ngi de jutimo ire ni kum podho.

¹⁰ Ng’atu m’umaru mola ma tar cwinye bikwio ngo ku mola ma tar; kadi ng’atu m’umaru piny ma dit, ku girameda: maeni bende en e gin ma ie nanu.

¹¹ Kinde ma piny umedre, ju m’ucamugi medre; man kuloka ang’o ni ng’atu m’ubedo ko, ndhu nenogi ku wang’e?

¹² Nindo pa ng’atu ma mule ku tic mit, kadok ecamu nyanok kadi dit; ento pong’ mi piny pa jalonyo yio ire nindo ngo.

¹³ Lembe ma rac dit nuti m’aneno the ceng’, en e lonyo ma won gwoko mi nyothe:

¹⁴ man lonyo maeni rwinyo ku tic ma rac; man tek enyolo wode, gin moko mbe i cinge.

¹⁵ Calu eal woko kud i min, e ebicidho kendo muneru calu ebino, man ebigamu gin moko ngo kum tic mi muli pare, m’eter i cinge.

¹⁶ Man maeni bende en e lem ma rac mi can, nia i lembe ceke calu ebino, ebicidho kumeca: man ebedo ni kuloka ang’o ma nia esendre ku tic pi yamu?

¹⁷ Nindo pare ceke bende ecamu i mudho, man cwinye ng’abre, man tho ku kwinyo de nuti kude.

¹⁸ Nen, gin m’aneno bedo ber ma kulokane de nuti en e nia dhanu cam man emadhi, man anyong’a nege kum gin ma ber i tic pare ceke, m’emule i ie the ceng’, i nindo ceke mi kwo pare ma Mungu mio ire: kum maeni en e makapiny pare.

¹⁹ Ku ba dhanu ceke bende ma Mungu mio ire lonyo ku piny, man emio ire tego m’ecam ko kume moko, m’egam ko makapiny pare de, m’anyong’a nege de kum tic mi muli pare, maeni en e giramia pa Mungu.

²⁰ Kum ebipoi dit hai ungo kum nindo mi kwo pare; kum Mungu loko ire lembe i anyong’a mir adundene.