Eklizia 4 - The Holy Bible In Alur (Lur) Revised Orthography

¹ Alund adwogo man aneno masendi ceke ma jutimo the ceng’: man, nen, piwang’ mi wadi ju ma jusendogi, man jajuk moko mbe igi; man tego nuti yo ba jusend migi; ento jajuk moko mbe igi.

² Kum kumeno apaku ju m’utho m’utho con ma sagu ju ma kwo ma gibedo kwo;

³ eyo, afoyo ng’atu ma fok’uwok ungo ma sagu gin ario de, m’uneno tic ma rac m’utimbre the ceng’ ungo.

⁴ Alund aneno tic mi muli ceke man tic mi bodho ceke kubang’e kubang’e, nia dhanu nwang’u kumira pi maeni ni kum jadhugola pare. Maeni bende en e gin ma ie nanu man kethocwiny kum yamu.

⁵ Jakasegu dolo cinge, man ecamu ring’kume gire.

⁶ Gin ma pong’ cing’ acel, karacelo ku cwiny m’ukwio e ber, sagu gin ma pong’ cing’ ario ku tic mi muli man kethocwiny kum yamu.

⁷ Alund adwogo man aneno gin ma ie nanu the ceng’.

⁸ Ng’atu moko nuti ma bedo kende, man mir arionde mbe ire; eyo, kadok wode kadi umin de mbe ire: ento kajik mi tic pare ceke mi muli mbe, kadok wang’e de yeng’ ungo ku lonyo. Ewacu kumae, Alund amula ku tic man atwono ng’eyong’ec paxa ku gin ma ber pi ng’a? Maeni bende en e gin ma ie nanu, eyo, en e sendri ma dit.

⁹ Juario sagu ng’atu acel, kum gibedo ku sukulia ma ber kum tic mi muli migi.

¹⁰ Kum tek gipodho, acel biting’o wadi malu; ento can wi ng’atu m’ubedo kende kinde m’epodho, man ng’atu moko mbe kude m’uting’e.

¹¹ Kendo, tek juario vuto karacelo, kumgi bedo mor; ento kum ng’atu acel copo bedo mor nenedi e kende?

¹² Man tek ng’atu moko sagu ng’atu ma kende, juario bijai ire; man thol ma wang’ adek cot pio ngo.

¹³ Jalawobi ma jacan ma riek de e ber ma sagu ubimo m’uti ma jakasegu, m’ung’eyo ngo maram ejol ko juk kendo,

¹⁴ Kum eai kud i odkol kara ebed ubimo; eyo, cil i ker pare junyole jacan.

¹⁵ Aneno ju ma kwo ceke ma wotho the ceng’, nia gini karacelo ku jalawobi, mir arionde, ma cungo i kakare.

¹⁶ Kajik mi dhanu ceke mbe, cil mi dhanu ceke m’ebedo i wigi: ento anyong’a binego ju m’ulubo ng’eye ngo i kume. Andha maeni bende en e gin ma ie nanu man kethocwiny kum yamu.