Eklizia 2 - The Holy Bible In Alur (Lur) Revised Orthography

¹ Awacu yo i adundena kumae, Bin kawono, abimulo ii kud anyong’a; ka kumeno bed ku mutoro ku lembanyong’a; man, nen, maeni bende en e gin ma ie nanu.

² Awacu pi ng’iero kumae, En e abelu; man pi mutoro kumae, Etimo ang’o?

³ Ayenyo i adundena maram acopo nyayu ko mutoro i kuma ku pigulok, ma fodi adundena betelo wia ku rieko, man maram amak ko lem ma kite mbe, cil m’anen ko gin ma kulokane nuti ma wot dhanu tirao the polo i nindo ceke mi kwo migi.

⁴ Atimo ira tic ma dit; agomo ira udi; apidho ira podho mir ulok:

⁵ atimo ira podho man podho mir anena, man apidho yen ma kwond nyinge tung’ tung’ i igi;

⁶ atimo ira kut mi pi, kara umol pi i luli ka ma yen dongo i ie;

⁷ ang’iewo ng’eca ku bong’, man junyolo jutic i ot para; abedo ku piny ma dit bende mi dhiang’ ku rombe, ma sagu dhanu ceke ma gilar gibedo nuti ira i Yerusalem;

⁸ acoko ira mola ma tar ku mola ma kwar bende, man piny m’akana mi ju m’ubimo man mi ng’etker; agamu ira juwer ma co ku juwer ma mon, man jambanyong’a mi wot dhanu, man mon m’araga dupa dupa.

⁹ Kum kumeno a dwong’, man asagra ma sagu dhanu ceke m’ular ubedo nuti ira i Yerusalem: rieko para bende bedo kuda.

¹⁰ Man gin ma tek ubedo mit i wang’a atwono kogi ngo; acero adundena ngo ni mutoro moko; kum anyong’a nego adundena kum tic mi muli para ceke; man maeni en e makapiny para kum tic mi muli para ceke.

¹¹ Alund aneno wi tic ceke ma cinga timo, man wi tic mi muli m’asendra ku timo; man, nen, gin ceke en e gin ma ie nanu man kethocwiny kum yamu, man kuloka mbe the ceng’.

¹² Man alokra gira kara anen rieko, kud abelu, man lem ma kite mbe: kum ng’atu ma bilubo ubimo copo timo ang’o? ebitimo gin ma jugamu timo con.

¹³ Alund aneno nia rieko sagu lem ma kite mbe, cil calu der sagu mudho.

¹⁴ Wang’ ng’atu ma riek ni i wie, man jakasegu wotho i mudho: ento aneno nia gin acel wok i bang’gi ceke.

¹⁵ Alund awacu i adundena kumae, Calu ewok kum jakasegu, e ebiwok i kuma bende kumeca; e kan abedo riek ma sagu nedi? Alund awacu i adundena, nia maeni bende en e gin ma ie nanu.

¹⁶ Kum poi mbe mi nja kum ng’atu ma riek, cil calu kum jakasegu; kum i ceng’ ma bibino wie biwil ma gwei kum joni. Man ng’atu ma riek ke tho ndhu calu jakasegu!

¹⁷ Kum kumeno adagu kwo, kum tic m’utimbre the ceng’ en e mi can ira; kum gin ceke en e gin ma ie nanu man kethocwiny kum yamu.

¹⁸ Man adagu tic mi muli para ceke m’asendra kudo the ceng’, kum abiolo weke be ni ng’atu ma bilubo ng’eya.

¹⁹ Man ng’a ng’eyo tek ebibedo ng’atu ma riek kadi jakasegu? ento ebibimo wi tic mi muli para ceke m’asendra i ie, man m’anyuthra ko gira riek the ceng’. Maeni bende en e gin ma ie nanu.

²⁰ Ka kumeno alokra kara aketh adundena dieng’ kum tic mi muli ceke m’asendra kudo the ceng’.

²¹ Kum ng’atu moko nuti ma tic mi muli pare bedo ku rieko, man ku ng’eyong’ec, man ku riu; ento ni dhanu ma sendre i ie ngo ebiweke ni makapiny pare. Maeni bende en e gin ma ie nanu man gin ma rac dit.

²² Kum dhanu bedo kud ang’o kum tic mi muli pare ceke, man kum kethocwiny mir adundene, m’esendre kudo the ceng’i?

²³ Kum nindo pare ceke can kende, man sendri pare en e adieng’acwiny; eyo, cil ku diewor adundene yom ungo. Maeni bende gin ma ie nanu.

²⁴ Man gin moko mbe ma ber ni dhanu ma sagu tek ecamu emadhu de, man eketho anyong’a neg ng’eyong’ec pare kum gin ma ber mi tic mi muli pare. Maeni bende aneno, nia eai i cing’ Mungu.

²⁵ Kum ng’a ma copo camu, kadi ma anyong’a nege, ma sagu ani?

²⁶ Kum Mungu mio rieko ku ng’eyong’ec man mutoro ni ng’atu ma nyayu mutoro i ie; ento ni jadubo emio sendri, kara ucok man umed, kara emi ni ng’atu ma nyayu mutoro i Mungu. Maeni bende en e gin ma ie nanu man kethocwiny kum yamu.